Ammólnatá Epwe Ámúrinnééló Ach Asukul

Mi chék léllé án rúúemén mwán kapas eis ngeni Jesus usun pwóróusen manaw esemuch nge mi sókkofesen fansoun ra kapas eis. Napanapen án Jesus pélúweni a lóngólóng wóón minne a lamot ngeni ekkewe chón kapas eis. (Luk. 10:25-28; 18:18-20) Ina popun, inaamwo ika sia sileéchú masouen ewe puken álillisin Paipel sia néúnéú le káé ngeni aramas, nge mi lamot sipwe ammólnatá me mwan sipwe káé ngeni ewe aramas me ekieki met a lamot ngeni. Áwewe chék, met sókkun pwóróus ese kon weweiti are tipeeú ngeni? Menni lein ekkewe wokisin mi mak sipwe tongeni álleani? Ifa úkúkún ewe pwóróus sipwe káé lón eú atun? Neman a lamot ach sipwe ammólnatá fán iten ach sipwe áweweei ewe pwóróus, eáni eú kapas áwewe, are eáni ekkóch kapas eis mi tongeni álisi ewe chón káé le weweiti ewe pwóróus. Pwal och, pokiten Jiowa a wisen ámááraatá ewe pwikilin enlet lón letipan, iwe sipwe tingorei Jiowa an álillis lón ach fansoun ammólnatá fán iten ewe káé, ewe chón káé me fán iten epwe asópwéchú ach achocho le álisi ewe chón káé le riri ngeni Kot.​—1 Kor. 3:6; Jas. 1:5.