Pokiten Chék ren eú Emelimel!

Helen a emelimel atun a útá únúkkún eú cart. Rúúemén fépwúl ra passini.

RÚÚEMÉN fépwúl ra fetál lón eú leeni lón Baguio City, Philippines. Ra kúna eú witnessing cart, nge rese kaúló ren. Ewe Chón Kraist fefin itan Helen mi útá únúkkún ena cart, a emelimel ngeniir fán kirekiréch. Ekkena fépwúl ra chék sópweló le fetál, nge ra chemeni án Helen na emelimel ngeniir mi fiti kirekiréch.

Mwirin, atun ekkena fépwúl ra fiti ewe bus ngeni imwer, ra kúna ewe watteen sain jw.org wóón ewe Leenien Mwich. Ra chemeni pwe pwal ina chék ewe mak ra kúna me wóón ewe witnessing cart iwe ekiseló. Ra tétiw me wóón ewe bus me ra cheki kulókun ekkewe mwich lón ekkewe sókkopaten mwichefel mi pachetá wóón ttitin ewe Leenien Mwich.

Pwal chék ikkena iir ekkewe rúúemén fépwúl mi emelimel atun ra kúna Helen lón ewe Leenien Mwich.

Ekkena fépwúl ra fiti eú me lein ekkewe mwich. Iwe ié ra kúna atun ra tolong lón ewe Leenien Mwich? Helen! Ra mwittir esilla pwe ina i ewe emén a emelimel ngeniir fán kirekiréch. Helen a erá: “Atun ra pwere ngeniei, ua oro niwokkus pwe use silei pwata ra pwere ngeniei.” Nge ekkena fépwúl ra áwewe ngeni Helen met a fis.

Ekkena fépwúl ra sani ewe mwich me pwapwaiti ar chiechi ngeni ekkewe chón mwich, ra chék kinamwe le nóm leir. Atun ra kúna án ekkewe ekkóch elimelim mwirin ewe mwich, ra eis ika ra tongeni álillis. Emén me lein ekkena fépwúl a fen ló seni Philippines, nge ewe emén a poputá le fiffiti ekkewe mwich me káé ewe Paipel. Meinisin ekkena ra fis pokiten chék eú emelimel!