Pwata A Chék Lallapoló Koput?

Pwata a kon lululó lapólóón koput wóón ei fénúfan? Ren ach sipwe silei popun, a lamot ach sipwe weweiti met weween koput, pwata aramas ra poputá le eáni koput, me ifa usun koput a chéúló.

Met Weween Koput?

Koput ina eú memmeef mi fókkun péchékkúl usun án emén oputa are koum ngeni emén are ngeni eú kúmiin aramas. Ina eú memmeef mi lap seni án emén chék song ren emén ren och fansoun.

POPUN A POPUTÁ ÁN ARAMAS KOPUT

A wor chómmóng popun pwata aramas ra poputá le eáni koput. Neman ra oputa meinisin chókkewe mi chóni eú sókkun kúmiin aramas inaamwo ika ese wor met mi ngaw chókkana ra fér ngeniir. Eli ra oputa chón ena kúmi pún ra ekieki pwe iir meinisin ra aramasangaw, efeiengaw, me resap tongeni ekkesiwil. Eli ra ekieki pwe iir mi aúcheangaw, eniwokkus, are chón efisatá osukosuk. Chókkana mi oputa ekkewe ekkóch neman ra riáfféú ren féfférún mwááneson, pwúngúngaw, are pwal ekkóch mettóch mi efisi an epwe fótóló lón letiper memmeefin koum.

USUN CHÉÚLÓÓN

Fán ekkóch, aramas ra oputa ekkóch inaamwo ika esaamwo fán eú ar chufengen. Áwewe chék, aramas ra kan eáni ewe memmeefin koput ar famili are chiechier kewe ra pwal eáni ngeni ekkóch aramas. Ina minne, ika ekkóch lón ar kewe famili ra oputa eú kúmien aramas, ekiseló chék iir meinisin repwe pwal poputá le oputa chón ena kúmi.

Atun sia weweiti mecheresin chéúlóón koput, sipwe pwal weweiti popun a chómmóng chón oputa aramas. Iwe nge, a pwal wor eú popun pwata a chéúló koput wóón ei fénúfan. Ren ach sipwe silei ena, a lamot sipwe silei ia koput a poputá me ie. Ewe Paipel a áiti ngenikich ena.

PAIPEL A ÁITI NGENIKICH IA KOPUT A POP ME IE

Eú diagram fán iten ruuoffóch arrow mi rokopwálfengen, mi pwári ifa usun lapólóón koput. 1. Pwóróus ese pwúng seni famili me chiechi, social media, me news. 2. Án aramas rese sissilei chón pwal eú fénú, lewo, are lamalam. 3. Niwokkus ika a fis siwil, a wor chón angei pisekiir, are rese silei met epwe fis. 4. Koput a efisi aapaap, eimwumwu, me mwááneson.

KOPUT MI KON SSENÚK ESAP INA KINIKININ MANAWEN ARAMAS ME LEPOPUTÁÁN. A poputá atun emén chónláng, ewe a wiliti Satan ewe Tefil, a ú ngeni Kot. Ena Tefil, i “eman chon niela aramas seni lepoputän” an angangen ú ngeni. Pokiten i emén mi “chofona me semen chon chofona,” iwe, a sópweló le efisi koput me lingeringer. (Johannes 8:44; 1 Johannes 3:11, 12) Ewe Paipel a áweweei pwe i emén mi ssenúk otuputupun, arochongawan, me lingeringerin.—Hiop 2:7; Pwärätä 12:9, 12, 17.

A MECHERES ÁN ARAMAS TIPIS REPWE OPUTA ARAMAS. Ewe áeménún mwán Atam a fitaaló Satan lón an féfférún tipis. Mwirilóón, aramas meinisin ra álemwiri tipis. (Rom 5:12) Kain, néún Atam we mwánichi, a nieló pwisin pwiin we pokiten a oputa. (1 Johannes 3:12) Ewer, chómmóng aramas ra pwári tong me kirekiréch, nge pokiten ra álemwiri tipis, chómmóng ra achéchééi pwisin iir, lólówó, me lamalamtekia, ikkena ekkewe napanap mi alapaaló koput.—2 Timoty 3:1-5.

A MECHERES ÁN EMÉN EPWE OPUT EMÉN MI SÓKKÓLÓ SENI. Chón ei fénúfan ra alapaaló koputfengen ren ar apéchékkúla féffér me ekiek mi efeiengaw me ekirikiringaw. A lallapoló án aramas rese sani chókkewe mi sókko seniir, aapaap, eáni kapas mi ámmetek, mesááni aramas, me ar atai pisekin ekkewe ekkóch pokiten “unusen fanüfan a nom fän nemenien Ewe mi Ngau,” Satan ewe Tefil.—1 Johannes 5:19.

Iwe nge, Paipel ese chék áiti ngenikich ia koput a pop seni ie. A pwal affata met epwe amóeló koput.