Ifa Ussun Epwe Úkútiw Maun me Osukosuk?

KOT EPWE ATAIELÓ MWÚÚN ARAMAS

Kot epwe ataieló mwúún aramas ren ewe maun ewe Paipel a eita ngeni, Armaketon.a (Pwáraatá 16:16) Lón ena fansoun, “ekkewe kingen unusen fénúfan” repwe kochufengen “lón ewe rán mi lap án ewe Kot mi Unusen Manaman.” (Pwáraatá 16:14) Armaketon, ina án Kot we maun ewe epwe aúkatiw meinisin maun.

Kot epwe siwili mwúún aramas ngeni an we Mwú, ewe epwe nemenem seni láng me esap fókkun taló. (Taniel 2:44) Kot a filaatá Néún we Jises Kraist an epwe King. (Aisea 9:​6, 7; Mattu 28:18) Ena mwú, ina ewe Mwúb Jises a áiti ngeni néún kewe chón káé ar repwe ióteki. (Mattu 6:​9, 10) Meinisin aramas repwe nóm fán eú mwú, ewe Jises epwe Sounemenem lón.

Jises a sókkóló seni ekkewe néúwisin mwú pún ese áeá an nemenem ren an epwe chék féri mochenin. Pokiten a pwúng me ese lifilifil aramas, ina minne ese wor emén epwe lólilen iká epwe kúna pwúngúngaw pokiten an einang are i chón ia. (Aisea 11:​3, 4) Me ese pwal lamot án aramas repwe protest ren ar kúna pwúngúngaw. Pwata? Pokiten Jises a túmúnú osupwangen emén me emén. “A angasa ekewe chon osupwang, lupwen ra kökköri, pwal ekewe mi mwelele me chokewe esap wor ar chon alilis. . . . A angaseer seni ar riaföü me ewe angangen mwäneson mi fis ngeniir.”—Kölfel 72:​12-14.

Án Kot we Mwú epwe amóeló ekkewe pisekin efeiengaw wóón unusen fénúfan. (Mika 4:3) Epwe pwal arosaaló ekkewe aramasangaw rese mochen úkútiw le fiu are atai kinamween ekkewe ekkóch. (Kölfel 37:​9, 10) Meinisin mwán, fefin, me semirit repwe meefi núkúnúkéch ekis meinisin wóón fénúfan.—Isikiel 34:28.

Aramas repwe pwapwaiti manawer fán án Kot nemenem. An we Mwú epwe áwesaaló ekkewe osukosuk mi efisi án aramas repwe fiu, áwewe chék ren wéúngaw, echik me nafangawen imw. Meinisin epwe chómmóng ener mwéngé mi vitamin me imwer mi kinamwe.—Kölfel 72:16; Aisea 65:​21-23.

Án Kot we Mwú epwe amóeló meinisin ekkewe mettóch maun a efisi. Esap chék kinásen inis, nge pwal semwenin ekiek me aúrek pokiten ekkewe mettóch mi ngaw aramas ra fen kúna seni maun. Pwal mwo nge ekkewe ra máló repwe manawsefál wóón fénúfan. (Aisea 25:8; 26:19; 35:​5, 6) Ekkewe famili repwe chufengensefál me aramas resap chúen chechchemeni ekkewe mettóch mi ngaw pún “ekkewe mettóchun lóóm ra móróló.”—Pwáraatá 21:4.

KOT EPWE AMÓELÓ TIPIS

Atun án Kot we Mwú epwe nemenem wóón unusen fénúfan, meinisin aramas repwe fel ngeni ewe emén chék Kot mi enlet, Jiowac, “ewe Koten tong me kinamwe.” (2 Korint 13:11) Aramas repwe káé le nónnómfengen fán kinamwe. (Aisea 2:​3, 4; 11:9) Meinisin iir mi apwénúetá met ra káé repwe ngase seni tipis.—Rom 8:​20, 21.

KOT EPWE AROSAALÓ SETAN ME NÉÚN KEWE TIMON

Án Kot we Mwú epwe arosaaló ekkewe chón efisi maun, Setan me néún kewe timon. (Pwáraatá 20:​1-3, 10) Atun esap chúen wor ar etipetip mi ngaw, “kinamwe epwe lapala.”—Kölfel 72:7.

Kopwe tongeni lúkúlúk pwe án Kot we pwon le aúkatiw maun me osukosuk epwe wesewesen pwénútá. A wor ren ewe tufich me ewe mochen le aúkatiw maun.

• A wor ren Kot ewe tipáchem me ewe manaman ren an epwe aúkatiw maun me féfférún akkachofesá. (Hiop 9:4) Ese fókkun wor och mettóch esap tufich ngeni an epwe apwénúetá.—Hiop 42:2.

• Kot a oput an kúna án aramas riáfféú. (Aisea 63:9) A pwal “oputa ekkewe ir mi mochen mwanesol.”—Kölfel 11:​5, Testament mi Fö.

• Kot a apwénúetá met a apasa fansoun meinisin, esap tongeni kapas chofona.—Aisea 55:​10, 11; Taitos 1:2.