Pwata A Chúen Fiffis Maun me Osukosuk?

TIPIS

Kot a féraatá semelapach me inach kewe, Atam me If, lón pwisin napanapan. (Keneses 1:27) Weween a pwisin nóm rer napanapen Kot kewe, áwewe chék ren kinamwe me tong. (1 Korint 14:33; 1 Jon 4:8) Iwe nge, Atam me If ra álleasolapa Kot me ra tipis. Ina minne, kich meinisin sia álemwiri tipis me máló. (Rom 5:12) Pokiten sia tipis, fán chómmóng sia tongeni eáni ekiek ese pwúng, iwe mwirin sia féri met mi ngaw.—Keneses 6:5; Mark 7:​21, 22.

MWÚÚN ARAMAS

Kot ese férikich pwe sipwe nemeni pwisinkich. Ewe Paipel a apasa: “Aramas . . . resap pwal tongeni akota mine repwe föri.” (Jeremaia 10:23) Ina popun, ekkewe mwúún aramas rese tongeni unusen aúkatiw maun me féfféringaw.

SETAN ME NÉÚN KEWE TIMON

Ewe Paipel a apasa pwe “unusen fénúfan a nóm fán nemenien ewe mi ngaw.” (1 Jon 5:19) Ena “mi ngaw” a iteni Setan ewe Tefil, me i emén chón nieló aramas. (Jon 8:44) I me néún kewe timon ra kan etipetipa aramas ar repwe efisi maun me féfféringaw.—Pwáraatá 12:​9, 12.