Álisi Noum we Chón Káé An Epwe Filaatá le Angang Ngeni Jiowa

1-2. (a) Pwata ekkóch chón káé ra tipemwárámwár le filaatá ar repwe angang ngeni Jiowa? (b) Met sipwele káé lón ei lesen?

A WOR met mi piin etipemwárámwárok óm kopwe wiliiti emén Chón Pwáraatá Jiowa? Eli óm niwokkus iká chienom chón angang, chienom kewe, are chón óm famili repwe ú ngonuk. Are eli óm meefi pwe kese tongeni álleasochisi án Kot kewe allúk. Iká ina met ka meefi, iwe ka tongeni meefi meefien ekkewe chón káé iir mi tipemwárámwár le filaatá ar repwe wiliiti Chón Pwáraatá Jiowa.

² Jises a silei pwe ekkena mettóch ra tongeni eppeti feffeitáán emén lón pekin ngún. (Mat. 13:20-22) Nge ese fangetá le álisi chókkewe mi tipemwárámwár le tapweló mwirin. Iwe, ren met a féri a isettiw eú leenien áppirú ngenikich ren ifa ussun sipwe álisi ekkena esin aramas le (1) esilla met a áweiresi ar repwe filaatá le angang ngeni Jiowa, (2) apéchékkúlaló ar tongei Jiowa, (3) akkomwa Jiowa lón manawer, me (4) silei met repwe féri atun aramas ra ú ngeniir. Ifa ussun sia tongeni áppirú napanapen án Jises asukul atun sia néúnéú ewe puk Eáni Manaw mi Pwapwa Tori Feilfeiló! le álisi emén chón káé le filaatá an epwe angang ngeni Jiowa?

ÁLISI NOUM CHÓN KÁÉ LE ESILLA MET A ÁWEIRESI AN EPWE FILAATÁ LE ANGANG NGENI JIOWA

3. Eli met a áweiresi Nikotemus le wiliiti néún Jises chón káé?

³ Nikotemus, emén néúwisin Jus mi iteféúló. Nge a wor met a áweiresi an epwe filaatá le tapweló mwirin Jises. Ina epwe chék wonu maram mwirin án Jises poputááni an angangen afalafal, Nikotemus a fen esilla pwe Jises i ewe Messaia. (Jon 3:1, 2) Iwe nge, Nikotemus a filaatá le fós ngeni Jises lemonomon pún a “niwokkusiti ekkewe chón Jus.” (Jon 7:13; 12:42) Eli a ekieki pwe epwe péút seni manan me wéún iká epwe wiliiti néún Jises chón káé.a

4. Ifa ussun Jises a álisi Nikotemus an epwe weweiti met Kot a mochen an epwe féri?

⁴ Nikotemus a silei ewe Allúkún Moses, nge a lamot ngeni álillis ren an epwe weweiti met Jiowa a mochen an epwe féri. Iwe, ifa ussun Jises a álisi? A tipemecheres le awora an fansoun le fós ngeni Nikotemus pwal mwo nge lepwin. Jises a pwal affata ngeni Nikotemus met a lamot epwe féri ren an epwe wiliiti néún chón káé, weween epwe áier seni an tipis, papatais lón konik, me anganga an lúkú Néún Kot we.—Jon 7:13; 12:42.

5. Ifa ussun sia tongeni álisi emén chón káé le esilla met a eppeti le feffeitá?

⁵ Inaamwo iká emén chón káé a fókkun silefichi ewe Paipel, nge a chúen lamot an epwe esilla met a eppeti an epwe feffeitá. Áwewe chék, eli an angangen moni are án an famili ú ngeni ikkena met ra eppeti an feffeitá. Ina minne kopwe awora óm fansoun ngeni. Eli ka tongeni etiwa ámi oupwe ekis aasoos are mwéngéfengen. Lón ekkena esin fansoun, eli ka tongeni álisi an epwe pwáári ngonuk pwóróusan me ka tongeni esilla met a áweiresi. Pesei noum we chón káé an epwe féri siwil mi lamot ren an epwe pwáári an tongei Jiowa, nge esap ren an epwe chék apwapwaok.

6. Ifa ussun ka tongeni álisi emén chón káé le pwora le apwénúetá met a káé? (1 Korint 16:13)

⁶ Lupwen emén chón káé a lúkúlúk pwe Jiowa epwe álisi i le féri minne mi pwúng, epwe lapóló an pwora le apwénúetá met a káé. (Álleani 1 Korint 16:13.) Wisom a tongeni léllé ngeni wisen emén sense lón sukul. Ekieki ewe atun ka chúen sussukul, met sókkun sense ka kon sani? Eli ewe mi mosonottam le álisuk le alapaaló óm lúkúlúk pwe a wor óm tufich le féri eú mettóch. A pwal ina ussun ren emén chón asukul mi lipwákéch lón Paipel, ese chék asukula met Kot a mochen ach sipwe féri, nge a pwal alúkúlúkú ngeni néún we chón káé pwe ren án Jiowa álillis a tongeni féri ekkewe siwil mi lamot lón manawan. Ifa ussun ka tongeni féri ena?

ÁLISI NOUM CHÓN KÁÉ LE APÉCHÉKKÚLALÓ AN TONGEI JIOWA

7. Ifa ussun Jises a álisi ekkewe aramas le apéchékkúlaló ar tongei Jiowa?

⁷ Jises a silei pwe iká emén a tongei Kot, iwe epwe mochen apwénúetá met a káé. Fán chómmóng, a asukula ngeni néún kewe chón káé ekkewe mettóch epwe álisiir le alapaaló ar tongei Semer we lón láng. Áwewe chék, a aléllééi Jiowa ngeni emén sam mi tong mi fang ngeni néún kewe met mi múrinné. (Mat. 7:9-11) Ekkóch me lein chókkewe mi aúseling ngeni án Jises afalafal, eli semer kewe rese kan pwáári tong. Iwe nge, anchangei meefier atun Jises a eáni eú kapas áwewe ussun emén sam mi tong mi etiwasefáli néún we mi mwálecheló. Ekkena aramas ra tongeni meefi án Jiowa tongei néún kewe aramas.—Luk 15:20-24.

8. Ifa ussun ka tongeni álisi emén chón káé le apéchékkúlaló an tongei Jiowa?

⁸ Pwal en, ka tongeni álisi emén chón káé le apéchékkúlaló an tongei Jiowa ren óm menlapei napanapen Jiowa kewe atun ka káé ngeni. Iteiten ámi káé, kopwe álisi an epwe eriri minne a káé ngeni án Jiowa tong. Atun oua káé ussun ewe méén kepich, menlapei ifa ussun a weneiti. (Rom 5:8; 1 Jon 4:10) Ese mwáál, ena chón káé epwe mwékút le tongei Jiowa atun a ekieki úkúúkún án Jiowa tongei i wóón winikapan.—Kal. 2:20.

9. Met a álisi Michael le ekkesiwili manawan?

⁹ Iei pwóróusen Michael seni Indonesia. A silei ussun ewe enlet atun a mámmááritá, nge ese papatais. Lupwen a 18 ierin, a ló ngeni eú fénú pwe epwe eáni angangen chón uwou ekkewe tarakú watte. Ló, ló, ló, a pwúpwúlú, me a ló seni an we famili pwe epwe angang lón pwal eú leeni mi towaw. Nge lón ekkena atun, pwúlúwan we me néúr we nengngin ra káé Paipel me ra feffeitá. Mwirin málóón inen Michael we, a filaatá an epwele liwin pwe epwe wisen túmúnú seman we, me a tipeeú ngeni an epwe káé ewe Paipel. Atun Michael a káé ewe kinikin “Kúttafichi” lón ewe puk Eáni Manaw mi Pwapwa Tori Feilfeiló! lesen 27, a fókkun chúng letipan. Atun a ekieki úkúúkún weiresin letipen Jiowa atun a kúna riáfféún Néún we, a poputá le kechiw. Me atun a weweiti úkúúkún watteen án Jiowa me Jises tongei i, a fókkun kilisou me féri ekkesiwil lón manawan me papatais.

ÁLISI NOUM CHÓN KÁÉ LE AKKOMWA JIOWA LÓN MANAWAN

10. Ifa ussun Jises a álisi néún kewe chón káé le féri ekkesiwil pwe repwe akkomwa Jiowa? (Luk 5:5-11) (Pwal ppii ewe sasing.)

¹⁰ Ekkóch me lein chókkewe Jises a afalafal ngeniir, ra mwittir esilla pwe i ewe Messaia mi pwonetiw, nge a chúen lamot ngeniir álillis le weweiti pwe repwe akkomwa ewe angangen afalafal lón manawer. Piter me Andru ra fen wiliiti chón káé ren fitu fansoun atun Jises a etiwer ar repwe áeá unusen ar fansoun le tapweló mwirin. (Mat. 4:18, 19) Eli iir chienen Jemes me Jon lón ar business mi watte winnan, ina ar we angangen attaw. (Mark 1:16-20) Atun Piter me Andru ra “likitaaló néúr kewe epino,” ese mwáál ra fen féri kókkót ren ifa ussun repwe atufichi ar famili atun ra tapweló mwirin Jises. Pwata ra tipemecheres le likitaaló ar business? Ewe pwóróus lón Luk a áiti ngenikich pwe Jises a féri eú manaman mi alapaaló ar lúkúlúk lón án Jiowa tufichin awora met mi lamot ngeniir.—Álleani Luk 5:5-11.

11. Met sia tongeni ereni emén chón káé pwe epwe apéchékkúla an lúkú?

¹¹ Sise tongeni féri manaman ussun chék Jises, nge sia tongeni apwóróusa ngeni ekkewe ekkóch ifa ussun Jiowa a álisi chókkewe mi akkomwa i lón manawer. Áwewe chék, en mi chemeni ifa ussun Jiowa a álisuk atun ka poputá le fiffiti mwiich? Eli a lamot óm kopwe fós ngeni noum we boss me áwewe ngeni pwata kese tongeni angang overtime atun a sereni ránin óm mwiich. Áwewe ngeni noum we chón káé ifa ussun a péchékkúleló óm lúkú atun ka kúna ifa ussun Jiowa a efeiéchú óm kefil le akkomwa i lón manawom.

12. (a) Pwata a lamot ach sipwe etiwa ekkewe pwal ekkóch chón afalafal ar repwe fitikich le káé ngeni néúch we chón káé? (b) Ifa ussun ka tongeni néúnéú ekkewe video le asukulaéchú noum we chón káé? Áweweei.

¹² Noum we chón káé epwe pwal kúna feiéch iká a rong pwóróusen ekkewe ekkóch Chón Kraist mi féri siwil lón manawer pwe repwe akkomwa Jiowa. Ina pwata kopwe etiwa sókkopaten chón afalafal ar repwe fituk lón ámi káé. Ereniir ar repwe apwóróusa ifa ussun ra fiti ewe enlet me met ra féri pwe repwe akkomwa ar angang ngeni Jiowa lón manawer. Pwal och, kopwe awora fansoun le fichi ngeni noum we chón káé ekkewe video seni eú me lein ekkeei kinikin “Kúttafichi” are “Pwal Ekkóch Pwóróus” lón ewe puk Eáni Manaw mi Pwapwa Tori Feilfeiló! Áwewe chék, atun oua pwóróusfengen wóón lesen 37, ka tongeni menlapei ekkewe kapasen emmwen seni ewe video, Jehovah Will Care for Our Needs.

ÁLISI NOUM CHÓN KÁÉ LE SILEI MET EPWE FÉRI ATUN ARAMAS RA Ú NGENI

13. Ifa ussun Jises a ammólnatá néún kewe chón káé atun aramas repwe ú ngeniir?

¹³ Fán chómmóng, Jises a kan ereni néún kewe chón káé pwe repwe kúna koput seni aramas, pwal mwo nge seni pwisin aramaser kewe. (Mat. 5:11; 10:22, 36) Atun epwele much án Jises angangen afalafal, a ereni néún kewe chón káé pwe ra tongeni ninniiló pokiten ar fel ngeni Jiowa. (Mat. 24:9; Jon 15:20; 16:2) A peseer ar repwe túmúnúéch lón ar angangen afalafal. A ereniir ar resap ánini ngeni emén ese tipeeú ngeni ar lúkú me repwe túmúnú met repwe apasa are féri pwe repwe tongeni sópweeló ar angangen afalafal.

14. Ifa ussun sia tongeni álisi emén chón káé le mmólnetá ngeni án aramas ú ngeni? (2 Timoty 3:12)

¹⁴ Sia tongeni áwewe ngeni emén chón káé met ekkóch chienan chón angang, chiechian, me chón an famili ra tongeni apasa are féri ngeni pokiten an kákkáé Paipel. (Álleani 2 Timoty 3:12.) Eli ekkóch chienan kewe chón angang repwe turunufasei ren sókkólóón manawan. Ekkóch, pwal mwo nge aramasan kewe, repwe esiita met a eáni lúkú. Ach mwittir ammólnatá néúch kewe chón káé epwe álisiir ar resap rúké, me repwe silei met repwe apasa are féri atun ekkewe ekkóch repwe ú ngeniir.

15. Met a tongeni álisi emén chón káé le likiitú atun a kúna koput seni chón an famili?

¹⁵ Iká noum we chón káé a kúna koput seni an we famili, álisi le ekieki iká pwata ra song. Eli ra ekieki pwe a tupuló, are eli ra chék aapaap ngeni Chón Pwáraatá Jiowa. Pwal mwo nge Jises a kúna koput seni chókkewe a tongeer. (Mark 3:21; Jon 7:5) Álisi noum we chón káé an epwe mosonottam me fós pwetete ngeni chón an famili me pwal ekkewe ekkóch.

16. Ifa ussun sia tongeni álisi emén chón káé an epwe apwóróusa ngeni ekkewe ekkóch an lúkú fán kirekiréch me tipemirit?

¹⁶ Inaamwo iká aramasen noum we chón káé ra mochen silei met a káé, nge a múrinné an esap áweweei ngeniir chómmóng pwóróus fán eú chék, pwe iká ina, iwe repwe chipwang le fóssefál ngeni ussun an lúkú. Ina popun, kopwe peseei noum we chón káé an epwe apwóróusa ngeniir an lúkú lón ewe napanap epwe efisi ar repwe pwal mochen pwóróus sefál. (Kol. 4:6) Eli a tongeni etiwa aramasan kewe ar repwe tétá wóón jw.org. Ena mettóch epwe atufichiir le alapaaló ar silei ussun Chón Pwáraatá Jiowa ineet ra mochen me filaatá úkúúkún met ra mochen silei ussun.

17. Ifa ussun ka tongeni áiti ngeni emén chón káé le pélúweni án aramas kapas eis ussun Chón Pwáraatá Jiowa? (Pwal ppii ewe sasing.)

¹⁷ Ka tongeni áeá ewe kinikin “Frequently Asked Questions” wóón jw.org le álisi noum we chón káé le ammólnatá pélúwen ekkóch kapas eis eli aramasan kewe are chienan chón angang repwe eisini. (2 Tim. 2:24, 25) Iteiten lesópwólóón ámi káé eú me eú lesen, enniwili ei kinikin “Ekkóch Ra Erá” lón ewe puk Eáni Manaw mi Pwapwa Tori Feilfeiló! Pesei le asóssót pélúwen ekkena kapas eis lón pwisin an fós. Iká mi lamot, kopwe álisi le émúrinnéló napanapen an áweweei met a eáni lúkú. Ena esin asóssót epwe álisi le lúkúlúk le penaatá an lúkú.

18. Ifa ussun ka tongeni pesei noum we chón káé an epwe wiliiti chón afalafal esaamwo papatais? (Mattu 10:27)

¹⁸ Jises a pesei néún kewe chón káé ar repwe afalafala ewe kapas allim ngeni aramas. (Álleani Mattu 10:27.) Án emén chón káé mwittir le poputá le áiti ngeni ekkewe ekkóch met a eáni lúkú, epwe pwal ina mwittirin an káé le lúkúlúk wóón Jiowa. Ifa ussun ka tongeni álisi ewe chón káé an epwe achocho ngeni ena? Iká epwe wor angangen campaign epwe fis lón óm we leenien afalafal, pesei noum we chón káé an epwe ekieki met a lamot an epwe féri pwe epwe wiliiti emén chón afalafal. Áweweei pwata chómmóng chón afalafal ra kúna pwe a mecheres ar repwe poputá afalafal atun a fis ena esin angangen campaign. Pwal eú mettóch a tongeni achocho ngeni, ina an epwe poputá le eáni afalafal lón ewe mwiich lón weekday. Atun a achocho le tikeri ena, epwe káé ifa ussun epwe apwóróusa ngeni ekkewe ekkóch fán lúkúlúk met a eáni lúkú.

PWÁÁRI ÓM LÚKÚLÚKÚ NOUM WE CHÓN KÁÉ

19. Ifa ussun Jises a pwáári an lúkúlúk wóón néún kewe chón káé, me ifa ussun sia tongeni áppirú?

¹⁹ Me mwen án Jises feitá láng, a ereni néún kewe chón káé pwe repwe pwal chufengensefál. Iir rese weweiti pwe Jises a fósun ar repwe feitá láng. Iwe nge, Jises a nefótófót wóón ar túppwél, nge esap wóón ar tipemwárámwár. (Jon 14:1-5, 8) A silei pwe a lamot ngeniir fansoun ren ar repwe weweiti ekkóch mettóch, áwewe chék ren ar ápilúkúlúkún manaw lón láng. (Jon 16:12) Kich sia pwal tongeni pwáári ach lúkúlúk pwe néúch kewe chón káé ra mochen apwapwaai Jiowa.

20. Ifa ussun emén Chón Kraist fefin lón Malawi a pwáári an lúkúlúkú néún we chón káé?

²⁰ Kopwe lúkúlúk pwe noum we chón káé a mochen féri minne mi pwúng. Áwewe chék ren pwóróusen Chifundo, emén Chón Kraist fefin lón Malawi. A poputá le káé ngeni emén fépwúl, i emén Katolik, itan Alinafe lón ewe puk Eáni Manaw mi Pwapwa Tori Feilfeiló! Atun ra wes le pwóróusfengen lón lesen 14, Chifundo a eisini iká met meefian ussun néúnéún lios lón fel. Alinafe a song me a erá, “Ina pwisin filien emén me emén!” Mwirin ena, Chifundo a ekieki pwe neman Alinafe esap chúen mochen sópweeló an káé. Nge a mosonottam le sópweeló le káé ngeni Alinafe, me a lúkúlúk pwe ekis me ekis epwe weweiti pwe mi mwáál néúnéú lios lón fel. Mwirin fitu maram, Chifundo a eisini ewe kapas eis lón lesen 34: “Ifa ussun óm káé ewe Paipel me óm káé ussun ewe Kot mi enlet, Jiowa, a álisuk?” Iei met Chifundo a erá ussun alon Alinafe, “A fósun chómmóng mettóch mi múrinné, eú me leir ina án Chón Pwáraatá rese féri ekkewe mettóch Paipel a apasa pwe mi mwáál.” Iwe ekiseló mwirin, Alinafe a úkútiw le néúnéú lios me a fich ngeni an epwe papatais.

21. Ifa ussun sia tongeni álisi néúch we chón káé an epwe filaatá le angang ngeni Jiowa?

²¹ Sia tongeni álisi ewe chón káé an epwe feffeitá inaamwo iká Jiowa ewe a wisen “ámááraatá.” (1 Kor. 3:7) Me lúkún ach áiti ngeni met Jiowa a mochen an epwe féri, sia pwal álisi an epwe alapaaló an tongei i. Sia pwal pesei an epwe pwáári an tongei i ren an filaatá le akkomwa i lón manawan. Sia pwal áiti ngeni ifa ussun epwe lúkúlúk wóón Jiowa atun ekkewe ekkóch ra ú ngeni. Atun sia ereni pwe sia lúkúlúkú, epwe alapaaló an lúkúlúk pwe i a pwal tongeni álleasochisi án Jiowa kewe allúk, me pwora le filaatá le angang ngeni.