Lón Ánein Manawem Áúa Káé Lesen Seni Néúch we Soukáit mi Lap

ÁN SEMEI KEWE ME INEI LEENIEN ÁPPIRÚ

Lefilen ekkewe ier 1950 me 1960, semei kewe me inei ra mwékút seni Italy ngeni Kindersley, lón Saskatchewan, Canada. Ekiseló mwirin, ra káé Paipel, me ina met a fókkun aúchea lón unusen ám we famili. Úa chemeni pwe me lekúkkúni úa kan fiti ái we famili le afalafal unusen rán, iwe fán ekkóch úa kan urumwot le erá pwe ú chék “auxiliary pioneer” me lón an wanú ieri!

Semei kewe me inei iir mi osupwang, nge ra isettiw eú leenien áppirú mi múrinné ren ar pennúkú ekkóch mettóch fán iten Jiowa. Áwewe chék, lón ewe ier 1963, ra améméló chómmóng pisekiir kewe pwe epwe wor néúr moni le fiti ewe international mwichelap lón Pasadena, California, U.S.A. Lón ewe ier 1972, áúa mwékút ngeni Trail, British Columbia, Canada ina epwe 620 mwail towauan pwe áúpwe álillis le afalafal ngeni chókkewe mi eáni fósun Italy. Semei we a kan eáni eú angangen elimelim. Ese etiwa ekkóch angang mi watte peioffun pwe epwe tongeni nefótófót lón an angang ngeni Jiowa.

Úa fókkun kilisou ren án semei kewe me inei isettiw leenien áppirú ngeniei me pwii we me fefinei kewe. Ar leenien áppirú, a apéchékkúlaei lón ái angang ngeni Jiowa. Ra áiti ngeniei och mettóch úpwe chechchemeni lón ánein manawei, pwe iká úa akkomwa ewe Mwú, iwe Jiowa epwe túmúnúei.—Mat. 6:33.

POPUTÁÁN ÁM ANGANG NGENI JIOWA FULL-TIME

Lón ewe ier 1980, áúa pwúpwúlú me Debbie, emén fefin Chón Kraist mi fókkun liéch me a nefótófót lón an angang ngeni Jiowa. Áúa mochen angang ngeni Jiowa full-time, ina minne Debbie a poputá le pioneer úlúngát maram mwirin ám apwúpwúlú. Eú ier mwirin ám pwúpwúlú, áúa mwékút ngeni eú kúkkún mwichefel, ikewe mi osupwangen álillis ie, me úa pwal fiti le pioneer.

Mwirin och fansoun, áúa meefi lichippúng me áúa mochen mwékút. Iwe nge, akkomw, áúa fós ngeni ewe chónemmwen mi wisen sáifetál. Fán tong, a wenechar le erenikem: “Oua chék pwisin áweiresikemi. Oua chék nefótófót wóón ekkewe osukosuk, nge iká oupwe kútta ekkewe mettóch mi múrinné, iwe oupwe kúna.” Ina eú kapasen fén mi fókkun lamot ngenikem. (Kölf. 141:5) Áúa mwittir apwénúetá me ekiseló áúa esilla pwe pwúngún a chómmóng ekkewe mettóch mi múrinné. A wor ekkóch lón ewe mwichefel ra mochen alapaaló ar angang ngeni Jiowa, kapachelong ekkewe kúkkún me chókkewe pwúlúwer esap iir Chón Kraist. Ina eú lesen mi fókkun aúchea ngenikem. Áúa káé ám áúpwe nefótófót wóón ekkewe mettóch mi múrinné me lúkúlúk pwe Jiowa epwe álisikem le likiitú fán ekkewe osukosuk eli epwe áweires. (Mik. 7:7) Áúa pwapwasefál me a taweló ám we osukosuk.

Néúm kewe chón emmwen lón ám we áeúin sukulen pioneer ra fen álillis lón ekkóch leeni. Atun ra pwáári ngenikem sasingiir kewe, me apwóróusa ekkewe weires me feiéch ra kúna atun ra álillis lón ekkóch leeni, ra alapaaló ám mochen fiti ewe angangen misineri. Iwe, áúa filaatá pwe ina met áúpwe achocho ngeni.

Ren ám áúpwe tikeri met áúa mochen achocho ngeni, áúa mwékút lón ewe ier 1984 ngeni Quebec ikewe ra eáni fósun French, ina epwe 2,485 mwail towauan seni British Columbia. Me ikena, áúa káé fósun ena leeni me ar ééreni. Pwal eú weires, fán chómmóng ese naf néúm moni. Ren och fansoun, áúa chék mwémmwéngé lusun pweteto ekkewe chón atake rese angei. Debbie a fókkun angéch le ffér sókkopaten fférún pweteto! Inaamwo iká áúa kúna ekkena weires, nge áúa achocho le likiitú fán pwapwa. Nge lap seni ena, áúa kúna án Jiowa túmúnúkem.—Kölf. 64:10.

Lón eú atun, emén a kérikem me erenikem pwe áúa ketiw le angang lón Bethel lón Canada. Me mwen ena, áúa apply ngeni ewe Sukulen Gilead ina popun ikáámwo áúa pwapwa ren ám ketiw nge áúa pwal lichippúng. Nge áúa etiwa ena etiwetiw. Atun áúa tori ikena, áúa eisini Pwiich Kenneth Little, emén Chón Túmúnú Keangen Ofesilap, “Nge ifa ussun ren néúm kewe application fán iten Gilead?” A erá, “Sipwap ekieki ena iká oupwe ketiw.”

Eú wiik mwirin ena, ám me Debbie áúa ketiw le fiti Gilead. Iwe a lamot áúpwe féri eú kefil. Pwiich Little a erenikem: “Ese lifilifil met oupwe filaatá, pwe lón ekkóch atun oupwe áneán pwe amwo itá oua filaatá ewe eú. Iir me ruu taitap chék, Jiowa epwe efeiéchú.” Iwe áúa etiwa ewe etiwetiw ren ám áúpwe fiti Gilead, me lón ekkewe ier áúa kúna pwúngún alon Pwiich Little na. Áúa kan soun ereni ekkewe ekkóch alon na atun a lamot repwe féri eú kefil le filaatá eú me lein ekkewe wis repwe wiseni.

ATUN ÁM MISINERI

Áúa fókkun pwapwa le nónnóm lein ekkewe 24 chón sukul lón ewe 83 class sukulen Gilead, mi fis lón Brooklyn, New York, lón April 1987. Pwiich Ulysses Glass me Jack Redford iir néúm chón emmwen. Ekkewe nimu maram áúa sukul lón ra chék mwittir, iwe áúa sochungio lón September 6, 1987. Ám me John me Marie Goode áúa kewis ngeni Haiti.

Seni ewe ier 1962, ekkewe misineri seni Gilead rese chúen ttittiló ngeni Haiti atun chék ekkewe lusun misineri ra sú seni ena leeni fán osenimu. Úlúngát wiik mwirin ám sochungio, áúa poputááni wisem we lón Haiti lón eú kúkkún mwichefel mi nóm lón eú leeni mi towaw wóón ekkewe chuuk nge a chék wor 35 chón afalafal. Áúa chúen sáráfé me áúse silei chómmóng mettóch, me ám chék áúa nónnóm lón ewe imwen misineri. Aramas lón ena leeni ra fókkun osupwang, me lap ngeniir rese sile állea. Atun ám nóm ikena, ekkewe aramas lón ena leeni ra poputá le féfféringaw pokiten osukosuken politics, ra sótun ú ngeni ewe mwú, protest, me a pwal fis taifun.

Áúa káé chómmóng mettóch seni án pwiich kewe lón Haiti úppós me pwapwa. Chómmóng ra kúna weires, nge ra fókkun tongei Jiowa me aúcheani ewe angangen afalafal. Emén chinnap fefin ese tongeni állea nge a chechchemeni 150 wokisin. Ekkewe osukosuk mi kan fiffis a fen alapaaló ám mochen áiti ngeni aramas pwe ewe Mwúún Kot ina chék ewe a tongeni áwesaaló án aramas osukosuk. A mmen chúng letipem ám kúna ekkóch néúm kewe chón káé ra wiliiti regular pioneer, special pioneer, me mwán mi ásimaw.

Atun ám nónnóm Haiti, úa chuuri emén alúwél itan Trevor, i emén misinerin Mormon, a fán fite ám pwóppwóróusfengen wóón ewe Paipel. Fite ier mwirin, a toriei eché taropwe seni. A makkeei: “Úpwele papatais lón ei mwichelap! Úa mochen liwiniti Haiti me special pioneer ikewe úa piin misinerin Mormon ie.” Iwe, ina met ra féri me pwúlúwan we ren fite ier.

IUROP MWIRIN AFRIKA

Áúa kewis le feiló lón eú kinikin lón Iurop, ikewe ewe angangen afalafal ese kon chúen pinepin ie. Lón 1992 áúa wareiti Ljubljana, Slovenia, kane ngeni ewe leeni semei kewe me inei ra mááritá ie mwen ar mwékút ngeni Italy. A chúen fis maun lón ekkóch leeni únúkkún. Ewe keangen ofesilap lón Vienna, Austria a wisen túmúnú ewe angangen afalafal lón ena leeni, nge me lóóm a nóm fán túmúnúen ekkewe ofes lón Zagreb, Croatia me Belgrade, Serbia. Nge mwirin och fansoun, a pwúngúló pwe eú me eú ekkewe mwú mi piin nóm lón kinikinin Yugoslavia epwe wor en me an Bethel, kapachelong Slovenia.

Iwe a lamot áúpwe káé pwal eú fós me ééreni. Chón ena leeni ra kan erá, “Jezik je težek,” weween pwe “A weires ewe fós.” Iwe, wesen pwúngún! Áúa fókkun ingeiti túppwélún pwiich kewe me ar tipemecheres le etiwa ekkewe siwil mi fis lón ewe mwicheich, me áúa kúna ifa ussun Jiowa a efeiéchúúr. Iwe, áúa pwal kúna án Jiowa áwena mettóch fán tong lón fansoun mi fich. Atun ám nóm Slovenia áúa káé chómmóng lesen nge ekkewe lesen áúa fen káé ra álisikem le likiitú fán ekkewe weires áúa kúna me ikena.

Nge a pwal fis siwil lón manawem. Lón ewe ier 2000 áúa kewis ngeni Côte d’Ivoire lón Afrika. Mwirin, lón November 2002, áúa mwékút ngeni Sierra Leone pokiten a fis maun. Nge ewe maun mi fis ikena ren úkúúkún 11 ier a kerán wes. A mmen weires ám áúpwe sú seni Côte d’Ivoire pwe a chék weiweitá. Iwe nge, ekkewe lesen áúa káé a álisikem le akkamwéchú ám pwapwa.

Áúa nefótófót wóón án ekkewe aramas mochen káé ewe Paipel me án pwiich kewe tong me likiitú lón fitu ier ren ewe maun. Ra fókkun osupwang nge ra chúen mochen fang met mi wor rer. Emén Chón Kraist fefin a fang ngeni Debbie ekkóch úf, nge Debbie ese mochen angei. Iwe, neminna a ereni: “Atun ewe maun, pwiich kewe seni ekkóch leeni ra álisikem. Iwe iei ám fansoun le álillis.” Áúa achocho ám áúpwe áppirúúr.

Ló, ló, ló, áúa pwal liwiniti Côte d’Ivoire, nge osukosuken politics ikena a pwal efisi féfférún akkachofesá. Lón November 2004, áúa sú ren ám fiti efóch helicopter nge emén me emén ám a chék uwei eú bag. Áúa annut wóón ewe simen ren ewe leenien soufiu án chón French lón eú pwiin, iwe sorotáán áúa ló ngeni Switzerland. Atun áúa tori ewe keangen ofesilap ina epwe lukenipwin, ewe Chón Túmúnú Keangen Ofesilap me ekkewe senseen ewe Ministerial Training School me pwúlúwer kewe ra etiwaéchúkem me turufikem. Iwe, ra ngenikem mwéngé mi chék pwichikkar me chómmóng chocolate. A fókkun chúng letipem.

Áúa kewis ngeni Ghana nge ese pwal ttam ám nóm ikena, iwe áúa liwiniti Côte d’Ivoire mwirin an a kúkkúnútiw ewe maun. Án chienach kewe wóón unusen fénúfan pwáári kirekiréch a álisikem le likiitú fán weiresin ám sú seni ewe leeni me wisem kewe mi chék temporary. Ám me Debbie áúa silei pwe néún Jiowa kewe aramas ra fókkun tongfengen, ina popun áúsapw ménúki ewe álillis ra awora ngenikem. Ren enletin, áúa esilla pwe pwal mwo nge lón ekkena fansoun mi weires, pwal ikkena kinikinin ám angei káit.

ÁÚA MWÉKÚT NGENI MIDDLE EAST

Lón 2006 a torikem eché taropwe seni ewe ofesilap lón New York ussun wisem minefé lón Middle East. Me ikena, áúa pwal káé minefé mettóch, kúna weires, káé mineféén fós, me ééreni. A chómmóng met áúpwe káé lón ena leeni mi uren osukosuk pokiten ra fókkun péchékkúl lón politics me lamalam. Áúa sani ekkewe sókkopaten fós lón ekkewe mwichefel me áúa kúna pwe a wor tipeeú lefilem atun áúa álleasochisi ekkewe emmwen seni án Jiowa we mwicheich. Áúa aúcheani chienem kewe pokiten lape ngeniir ra likiitú fán án ar famili, chiener chón sukul, chón angang me án chón óruur ú ngeniir.

Lón ewe ier 2012 áúa fiti ewe special mwichelap lón Tel Aviv, Israel. Epwe kerán ina an epwe chómmóng néún Jiowa aramas iir mi fiti ena mwichelap lón ena leeni ussun lón ewe Pentikos ier 33. Ina eú rán mi fókkun aúchea!

Lón ekkena ier, áúa ttittiló ngeni eú leeni mi pinepin ach angang ie. Áúa uwei ekkóch néúch kewe puk, fiti ewe angangen afalafal me ekkewe mwiich lón kúkkún kúmi. Ekis meinisin a wor checkpoint me soufiu fán néúr pistor, nge áúa túmúnúéch atun áúa mwékútfetál me fitemén chienem chón afalafal.

ÁÚA LIWINITI AFRIKA

Lón ewe ier 2013 áúa angei eú wis mi fókkun sókkóló ren ám áúpwe angang lón ewe keangen ofesilap lón Kinshasa, Congo, eú watteen leeni mi fókkun ling nge a kan fiffis watteen lengita me maun. Me akkomwan áúa apasa, “Áúa mmólnetá, pún áúa fen silei nónnómun Afrika.” Nge a chúen chómmóng mettóch áúpwe káé, ákkáeúin atun áúa ló ngeni ekkewe leeni ese wor al me piriis ie. Áúa nefótófót wóón ekkewe mettóch mi múrinné, kapachelong án pwiich kewe úppós me pwapwa inaamwo iká a áweires ar atufichi manawer, ar aúcheani ewe angangen afalafal, me ar achocho le fiti ekkewe mwiich me mwichelap. Áúa pwisin kúna pwe a sópwéch ewe angangen afalafal ren chék án Jiowa álillis me an efeiéchú. Ám angangen full-time lón Congo a áiti ngenikem chómmóng lesen mi fókkun aúchea me a wor chienem mi ussun ám famili.

Lesópwólóón ewe ier 2017, a pwal wor eú wisem lón South Africa. Epwe kerán ina ám áúpwe angang lón eú keangen ofesilap mi fókkun watte, me áúa kewis le féri eú angang lón Bethel áúsaamwo féri fán eú. Iwe nge, a chómmóng met áúpwe káé nge ekkewe lesen áúa káé me akkomw a álisikem. Áúa tongei pwiich kewe ra fen likiitú ren fite fite ier. Me a fókkun amwarar ám kúna ewe familien Bethel angangfengen fán tipeeú inaamwo iká a sókkofesen ar ééreni me fénúer. A ffat pwe Jiowa a efeiéchú néún kewe aramas ren an fang ngeniir kinamwe, pokiten ra ekkesiwili napanaper me apwénúetá án Paipel kewe kapasen emmwen.

Lón ekkewe ier ra ló, ám me Debbie áúa angei ekkewe wis mi apwapwa, tipemecheres le káé sókkopaten ééreni, me mineféén fós. Esap fansoun meinisin a mecheres, nge iteitan áúa meefi án Jiowa enletin tong seni an we mwicheich me chienach kewe. (Kölf. 144:2) Áúa lúkúlúk pwe ám angangen full-time a álisikem le wiliiti chón angang mi lipwákéch fán iten Jiowa.

Úa fókkun aúcheani met semei kewe me inei ra áiti ngeniei, án pwúlúwei we mi áchengicheng Debbie álisiei, me án chienach kewe wóón unusen fénúfan leenien áppirú mi fókkun múrinné. Atun ám me pwúlúwei we áúa kan ekkekieki met áúpwe féri lón ekkan rán mwach, áúa úppós le sópweeló le káé seni ekkewe lesen ach we Soukáit mi Lapalap a awora.