Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w17 June p. 28-32
  • Kopwe Ataweei Osukosuk me Álisatá Kinamwe?

Ese wor video fán iten ei kinikin.

Omusaaló, a wor osukosuk le eppietá ewe video.

  • Kopwe Ataweei Osukosuk me Álisatá Kinamwe?
  • Ewe Leenien Mas a Esilefeili án Jiowa We Mwú (Fán Iten ewe Mwichefel)—2017
  • Itelap Kisikis
  • Pwal Ekkóch
  • OSUKOSUK ME MINNE A PWÁKINI
  • SÓKKOPATEN NAPANAPEN ARAMAS A ATOTO PWAPWA LÓN EWE MWICHEFEL
  • KOSAP MUT NGENI TIPEFESEN AN EPWE SÓPWÓSÓPWÓLÓ
  • Kinamwe​—Ifa Usun Sipwe Eáni?
    Ewe Leenien Mas a Esilefeili án Jiowa We Mwú (Fán Iten ewe Mwichefel)—2018
  • Sópweló le “Aúfichikemiitá”
    Ewe Leenien Mas a Esilefeili án Jiowa We Mwú (Fán Iten ewe Mwichefel)—2022
  • “Apéchékkúla Ekkewe Mwichefel”
    “Unusen Pwáraatá” Pwóróusen ewe Mwúún Kot
  • “Ur ren Pwapwa me Ngún mi Fel”
    “Unusen Pwáraatá” Pwóróusen ewe Mwúún Kot
Pwal Och
Ewe Leenien Mas a Esilefeili án Jiowa We Mwú (Fán Iten ewe Mwichefel)—2017
w17 June p. 28-32
Emén pwiich Chón Kraist fefin mi song lón ewe mwichefel

Kopwe Ataweei Osukosuk me Álisatá Kinamwe?

JIOWA KOT a mochen pwe chón fel ngeni repwe pwapwaiti ewe mettóch kinamwe. A mochen ar repwe kinamwefengen lefiler. Lupwen ra ina usun, a wor kinamwe lón ewe mwichefelin Chón Kraist. Ena kinamwe a lukeato chómmóng aramas ngeni ewe mwichefel.

Áwewe chék, emén sourong lón Madagascar a kúna ewe kinamwefengen lefilen néún Jiowa kewe aramas me a erá, ‘Ika ua mochen fiti eú lamalam, iei ewe upwe fiti.’ Ló, ló, ló, a úkútiw le féri angangen roong, a féri siwil lón an pwúpwúlú, me a poputá le fel ngeni Jiowa, ewe Koten kinamwe.

Iteiten ier, a wor fitengeréú aramas ra pwal usun ena mwán le chóni ewe mwichefelin Chón Kraist me ra pwapwaiti ewe kinamwe ra fókkun mochen kúna. Nge sia álleani me lón Paipel pwe ika a wor “lolowo mi maras, o pwal anini” lón ewe mwichefel, a tongeni atai chiechifengen me efisi osukosuk. (Jas. 3:14-16, Testament Mi Fö) Nge ewe Paipel a ngenikich éúréúr mi múrinné ren ach sipwe ttii senikich ekkena osukosuk me apéchékkúla ach kinamwefengen me pwiich kewe. Sipwe ppii ifa usun ekkena éúréúr ra álisi ekkóch aramas lupwen a fis osukosuk lefiler me emén.

OSUKOSUK ME MINNE A PWÁKINI

“A weires ngeniei ai upwe kinamwe ngeni emén pwiich mwán aua angangfengen. Fán eú, atun aua chúwérúwérfengen, rúúemén aramas ra tolong rem me kúna ám ánini.”​—CHRIS.

Rúúemén Chón Kraist fefin ra meseafóchfengen

“A wor emén pwiich fefin aua kan mwin le afalafal, nge lón eú atun a úkútiw le fitiei le afalafal. Mwirin, ese fókkun chúen fóffós ngeniei. Use fókkun silei pwata.”​—JANET.

“Aua fósfengen wóón phone me pwal rúúemén mwán. Emén me leir a erenikem oulenóm, iwe tittipei pwe a fen hangup. Iwe, ua erá och fós ese éch fán itan, nge ren enletin ena emén esaamwo hangup.”​—MICHAEL.

“Lón ám mwichefel, a wor rúúemén pioneer ra poputá le osukosukfengen. Ewe emén a poputá le soun mimmina ewe emén. Ar ákkáninifengen a eletipechowu ekkewe ekkóch.”​—GARY.

Neman kopwe ekieki pwe ekkena osukosuk rese kon chou. Nge ra tongeni atai kinamween ewe mwichefel me ekinása letipen aramas me a weires an epwe mwó seniir. Nge sia kilisou pún pwiich kana ra fiti án Paipel kewe kapasen emmwen me ra kinamwefengen sefál. Menni kapasen emmwen lón Paipel ka ekieki pwe a álisiir?

“Ousap aninifengen won al.” (Ken. 45:24) Iei ewe éúréúr mi múrinné Josef a ngeni pwiin kewe lupwen repwele liwiniti semer we. Lupwen emén ese nemeni meefian me i a mwittir song, iwe epwe tongeni lapóló eú osukosuk. A tongeni pwal asonga ekkewe ekkóch. Chris a mirititi pwe fán ekkóch a weires ngeni an epwe tipetekison me etiwa emmwen seni emén. A mochen siwili ekiekin, iwe a omusomus ngeni ewe emén ra áninifengen. Mwirin Chris a angang weires an epwe nemeni an song. Lupwen ewe emén a kúna án Chris fókkun achocho le siwil, iwe a pwal ina usun. Iei a wor kinamwefengen lefiler lón ar angangfengen ngeni Jiowa.

“Are esap wor kapasen öüröür [“pwóppwóróusfengen,” NW], esap fis mine aramas ra ekiekietä.” (SalF. 15:22) Lupwen chienen Janet we a úkútiw le fós ngeni, Janet a filatá an epwe apwénúetá ei wokisin. A ló ren chienan na me pwóróus ngeni. Janet a eisini ika a wor och mettóch a féri a aosukosuka i. Akkomwan, iir me rúúemén rese kon kinamwe le fósfengen. Nge atun ra sópweló le pwóróusfengen, ra ekis kinamweeló. Chienen Janet na a mirititi pwe a wewengaweiti och mettóch mi fen fis lóóm nge Janet ese wesewesen féri och mettóch an epwe asonga i. A omusomus ngeni Janet, iwe iei iir me rúúemén ra chiechisefál me angangfengen ngeni Jiowa.

“Are kopwe wätä om asor ngeni Kot won ewe rongen asor, o ikenan ka chechemeni pwe pwiüm a chou ngonuk, kopwe likiti om we asor mwen ewe rongen asor o liwinla, pwe kopwe achä ngonuk pwiüm.” (Mat. 5:23, 24) Iei ewe kapasen éúréúr Jesus a eáni lón an we Afalafal Wóón ewe Chuuk. Mwirin án Michael erá ekkewe mettóch ese éch fán iten chienan we, i a fókkun mengiringir. A filatá an epwe féri met chék mi lamot fán iten an epwe pwákini ewe osukosuk. Iwe a ló ren ewe emén me a omusomus ngeni. Met a fis mwirin? Michael a erá, “Pwii we a enletin omusaaló tipisi.” Iwe ra chiechifengensefál.

“Oupwe songomangfengen o amusamusfengen are eman a chou ngeni eman.” (Kol. 3:12-14) Ka chechchemeni ekkewe rúúemén pioneer mi áninifengen lón ewe angangen afalafal? Emén mwán mi ásimaw a álisiir fán kirekiréch le mirititi pwe ra aosukosuka ekkewe ekkóch me atai ar kinamwe. A áchema ngeniir pwe a lamot ar repwe mosonottamfengen me achocho le álisatá ewe kinamwe lón ewe mwichefel. Ra etiwa an éúréúr ngeniir me apwénúetá. Iei ra chiechiéchfengen atun ra afalafala ewe kapas allim.

Ena kapasen éúréúr lón Kolose 3:12-14 a pwal tongeni álisuk le tipetekison, omusaaló tipisin emén mi ekinása letipom, me úkútiw le ekkekieki. Nge met sipwe féri ika sia fen sótun omusaaló tipisin nge sise tongeni? A wor eú kapasen emmwen mi mak lón Mateus 18:15 epwe tongeni álisikich. Inaamwo ika Jesus a fós usun ekkewe tipis mi chou, nge alon na a áweweei met sia tongeni féri atun mi wor ach osukosuk lefilach me emén pwiich Chón Kraist. Fán kirekiréch me tipetekison, sia tongeni ló ren ena emén me pwóróusfengen wóón ewe mettóch me achocho le pwákini ewe osukosuk.

Ewe Paipel a pwal awora chómmóng pesepes ren met sia tongeni féri. Ren án ekkena pesepes repwe álisikich, mi lamot sipwe uwaani “uän” án Kot we manaman mi fel ren choweán “chen, pwapwa, kinamwe, mosonotam, kirikiröch, aramasöch, allükülük, tipetekison me tipepwora.” (Kal. 5:22, 23) Ekieki ei kapas áwewe. Eú mwesin a tongeni fetáléch angangan ika pwe mi oil ekkewe kinikin lón. Pwal ina chék usun, epwe fen mecheres ngenikich le ataweei ekkewe osukosuk lefilach me ekkewe ekkóch me ririéch ngeniir ika pwe sia pwári ekkena napanap mi múrinné seni Jiowa.

SÓKKOPATEN NAPANAPEN ARAMAS A ATOTO PWAPWA LÓN EWE MWICHEFEL

Kich meinisin a wor en me pwisin napanapach. Emén me emén kich a sókkóló ekiekich wóón mettóch me napanapen ach pwáraawu meefiach. Ekkena sókkopaten napanapen aramas ra tongeni apwapwaai ach chiechifengen. Nge ekkena sókkopaten napanap ra pwal tongeni efisi ach sipwe wewengawfengen me tipefesen. Emén mi wiseni ewe wis mwán mi ásimaw ren fansoun langattam a áweweei ifa usun a tongeni fis ena, a erá: “Emén mi nisássáw a tongeni weires an epwe chiechi ngeni emén mi kon chiechiéch me fókkun sani le fóffós ngeni aramas.” A pwal apasa: “Sókkofesenin napanaper neman me rech mi chék lamotkisikis, nge a tongeni emmwen ngeni watteen osukosuk.” Ka lúkú pwe chókkewe mi fókkun sókkofesen napanaper rese tongeni chiechiéch? Sipwe ekieki pwóróusen rúúemén aposel. Lupwen sia ekieki usun Petrus, neman sipwe ekieki an soun mwittir apasa met chék a nóm lón ekiekin. Nge lupwen sia ekieki usun Johannes, neman sipwe ekieki usun an tongei aramas me kan akkomw ekiekiéchú minne epwele apasa are féri. A sókkofesen napanapen Petrus me Johannes. Nge ra chiechiéch lón ar angangfengen ngeni Jiowa. (Föf. 8:14; Kal. 2:9) A pwal tongeni ina usun kich ikenái. Pwal mwo nge ekkewe Chón Kraist mi fókkun sókkofesen napanaper ra tongeni chiechiéch lón ar angangfengen.

Nge epwe ifa ika án emén pwiium lón óm we mwichefel kapas are féffér a asongok? A éch kopwe chechchemeni pwe Kraist a máló fán itan usun chék an máló fán itom, me a lamot kopwe pwári tong ngeni pwiium na. (Joh. 13:34, 35; Rom 5:6-8) Ese pwúng óm kopwe filatá pwe kosap chúen chiechi ngeni ena emén are kopwe éménúngaw seni. Nge kopwe fen pwisin eisinuk: ‘Pwii nan a féri och mettóch mi atai án Jiowa allúk? I a enletin ekiekin áweiresiei? Are aua chék sókkofesen wóón napanapem? Nge mi nóm ren ekkóch napanap ngang ua mochen pwal napanapeni?’

Áwewe chék, ika ewe emén a mmen sou fós, nge en ka kan chék soun fanafaneló, pwata ouse mwin lón ewe angangen afalafal me ppii ika met ka tongeni káé seni? Are epwe ifa ika a fen kon kisáseú lap sonuk? Ka fen kúna pwe ach liffang ngeni ekkewe chinnap, mi semmwen, me mi osupwang a kan atoto pwapwa? Ka tongeni káé seni ena emén ifa usun kopwe pwal alapaaló óm kisáseú? A ffat pwe inaamwo ika ámi me ena emén oua sókkofesen, nge ka tongeni nefotofot wóón napanapan kewe mi múrinné. Inaamwo ika ouse kon pwipwiéch, nge oua tongeni alapaaló ámi chiechiéchfengen. Ei mettóch epwe tongeni álisatá kinamween letipom me pwal ewe mwichefel.

Lón fansoun ekkewe aposel, a wor rúúemén fefin Chón Kraist iter Eutia me Sintike. Usun a mmen sókkofesen napanaper kewe, nge ewe aposel Paulus a peseer ar repwe “tipeeufengen usun chök pwipwi lon ach Samol.” (Fil. 4:2) Kich sia pwal mochen tipeeúfengen me pwiich kewe lón ach fel ngeni Jiowa me álisatá ewe kinamwe lón ewe mwichefel.

KOSAP MUT NGENI TIPEFESEN AN EPWE SÓPWÓSÓPWÓLÓ

Pwata mi lamot sipwe mwittir péútaaló ach kewe memmeef mi ngaw ngeni ekkewe ekkóch? Sia tongeni apépééi ekkena memmeef ngeni ekkewe pétéwélingaw mi pwúkutá lón eú tánipiin iráán ling. Ika sise útti ekkena pétéwel, iwe ra tongeni chéúló lón unusen ewe tánipi. Pwal ina chék usun, ach kewe memmeef mi ngaw ra tongeni péchékkúleló, iwe epwe tongeni kkúú unusen ewe mwichefel. Nge ika sia tongei Jiowa me pwiich kewe, sipwe achocho úkúkún ach tufich pwe sipwe túmúnú kinamween ewe mwichefel.

Rúúemén Chón Kraist fefin ra fósfengen me ra kinamwefengen

Ika ka achocho fán tipetekison le efisi kinamwe lefilemi me ekkewe ekkóch, ese mwáál kopwe máirú ren minne epwe fis mwirilóón

Lupwen sia achocho le ataweei osukosuk lefilach me ekkewe ekkóch, neman sipwe máirú ren échún met epwe fis mwirilóón. Ina met a fis ngeni emén fefin Chón Pwáraatá. Iei alon: “Ua meefi pwe emén pwiich fefin lón ewe mwichefel a eáni féffér ngeniei usun ngang emén semirit. An féri ena a wesewesen aosukosukaei. Atun a watteeló ai song ren, ua poputá le tuwenewen lón ai fós ngeni. Ua ekieki, ‘I ese pwári ngeniei ewe súfél mi fichiitiei, iwe usap pwal súféliti.’”

Mwirin, ei fefin a ekieki usun pwisin napanapan. “Ua poputá le kúna ngawen napanapei, me ua fókkun pwisin mángaweitiei. Ua mirititi pwe a lamot ai upwe siwili ekieki. Mwirin ai iótek ngeni Jiowa usun, ua mééni eú kúkkún liffang fán itan me makkeei eché taropwe ngeni pwe upwe omusomus ren napanapei mi ngaw. Aua tipeeúfengen pwe aupwele chék likitaló ám we osukosuk me aua foropachfengen. Mwirin ena, ese chúen fis osukosuk lefilem.”

A lamot ngeni meinisin ewe mettóch kinamwe. Nge ika emén a lamalamtekia are ese meefi núkúnúkéch, epwe efisi an epwe eáni féffér mi atai kinamwe. Lón ei fénúfan, a chéú ena sókkun, nge Jiowa a mochen pwe néún kewe chón fel ngeni resap ina usun. Itá epwe wor kinamwe me tipeeú lein néún Jiowa kewe Chón Pwáraatá. Jiowa a emmweni Paulus an epwe mak ngeni ekkewe Chón Kraist me ereniir ar repwe “manaueni eu manau mi fich ngeni ewe kö seni Kot” ra fen angei. Iei met a pesei ngeniir: “Oupwe tipetekison fansoun meinisin, oupwe tipepwetete o mosonotam. Oupwe echenifengenikemi ren ämi songomangfengen lefilemi. Oupwe fokun achocho le tümwünü ämi tipeeufengen lon ewe Ngünmifel ren ewe kinamwe mi rifengenikemi.” (Ef. 4:1-3) ‘Ewe kinamwe mi rifengeni’ néún Jiowa kewe aramas a mmen fókkun aúchea. Iwe, kich meinisin sipwe achocho úkúkún ach tufich le apéchékkúlaló ena riri me ataweei osukosuk lefilach me pwiich kewe.

Paulus me Parnapas Ra Pwipwiéch Inaamwo ika Ra Sókkofesen

Paulus me Parnapas

Paulus, i emén mi eáni memmeef mi fókkun péchékkúl. Me mwen an wiliti emén Chón Kraist, i a “eniweniwa ekewe chon lükü ach Samol pwe epwe niirela.” (Föf. 9:1) Mwirin, a áweweei meefian lóóm usun ekkewe Chón Kraist, a erá pwe a fókkun “lingeringeritiir.”​—Föf. 26:11.

Mwirin án Paulus papatais, i a ekkesiwil. Nge aramas ra chúen chechchemeni napanapan me lóóm. Pwal mwo mwirin och fansoun an a fen wiliti emén Chón Kraist, ekkewe Chón Kraist “meinisin ra niuokusiti, pun resap lükü pwe i wesewesen eman chon kaiö.”​—Föf. 9:26.

Lupwen Paulus a ló Jerusalem, ekkewe Chón Kraist rese lúkú i. Nge emén Chón Kraist seni Saipros itan Josef a álisi. Josef i emén mi kirekiréch me chón ewe mwichefel ra tongei me súféliti. Ra pwal mwo nge eita ngeni Parnapas, weween “Eman mi apöchöküla letipen aramas.” (Föf. 4:36, 37) Ifa usun Parnapas a álisi Paulus? Paipel a erá: “Parnapas a alisi o emwenala ren ekewe soukünö. A awewe ngeniir usun än Saul küna ach Samol won ewe al, pwal usun än ach Samol kapas ngeni. A pwal apworausa ngeniir usun än Saul pworacho le afalafal usun iten Jesus lon Tamaskus.” (Föf. 9:26-28) Mwirin án chón ewe mwichefelin Jerusalem rongorong met Parnapas a erá, ra poputá le lúkú Paulus me etiwa i usun emén pwiir Chón Kraist. Ekiseló mwirin, Paulus me Parnapas ra poputá le angangfengen lón ewe angangen afalafal lón wiser wisen misineri.​—Föf. 13:2, 3.

Ese mwáál Parnapas a aúcheani án Paulus tinikken me wenechar pokiten Paulus ese pireir le apasa are féri met chék mi lamot. Me ese mwáál Paulus a fókkun kilisou ren ar tongeni angangfengen me Parnapas, emén mi kirekiréch me fókkun tongei aramas.

Nge esap pwe Paipel a erá pwe a wor eú atun “a fis eu watten aninifengen” lefilen Paulus me Parnapas? Pwata ra áninifengen? Paulus me Parnapas rese áninifengen pokiten an sókkofesen napanaper kewe. Nge ra tipefesen wóón emén itan Johannes Markus ika mi fich an epwe emén misineri me fitiir lón ar angang.​—Föf. 15:36-40.

Inaamwo ika Paulus me Parnapas ra sókkofesen wóón napanaper kewe, nge ra chiechifengen lón ar angangfengen. Usun ra pwal pwákini minne ra tipefesen wóón, pún Paulus me Johannes Markus ra angangfengensefál. (Kol. 4:10) Kich sia pwal usun Paulus me Parnapas pún kich meinisin sia sókkofesen wóón napanapach kewe. Ikaamwo ina, nge sia tongeni pwapwaiti ach angangfengen ngeni Jiowa.

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share