Itá ewe Paipel A Tongeni Álisuk lón Óm Semmwenittam?

Pélúwan me ren Paipel

Ewer. Kot a chúngú néún kewe chón angang iir mi semmwen. Iei met Paipel a apasa usun emén néún chón angang mi tuppwél: ‘Ewe Samol mi Lapalap epwe tümwünü won an kiekien samau.’ (Kölfel 41:3) Ika ka sessemwenittam, iwe ekkeei úlúngát mettóch ra tongeni álisuk le likiitú:

1. Iótek pwe epwe wor óm péchékkúl le likiitú. Ka tongeni angei “än Kot kinamwe mi tekia seni ach tongeni weweiti,” ewe mi tongeni álisuk le sópweló le likiitú fán ese lifilifil weires ka nóm fan.​—Filipi 4:6, 7.

2. Eáni ekiek mi pwúng. Iei alon Paipel: “Eman mi pwapwa lon lelukan iei eu säfei mi mürina, nge eu leluk mi lolilen a asemweni eman.” (Än Salomon Fos 17:22) Ákkeáni ekkóch minen atakirikir pokiten a tongeni ekisikisaaló letipechowum me a álilliséch ngeni péchékkúlen inisum.

3. Apéchékkúla óm ápilúkúlúk fán iten mwachkkan. Eú ápilúkúlúk mi núkúchar a tongeni álisuk inaamwo ika ka sessemwen ren langattam fansoun. (Rom 12:12) Ewe Paipel a oesini usun eú atun “esap wor eman chon ewe fanü epwe apasa pwe a samau.” (Aisea 33:24) Kot epwe echikara ekkewe sókkun semmwen mi úri aramas ren langattam fansoun, pekin science rese tongeni echikara. Áwewe chék, ewe Paipel a apasa pwe ekkewe chinnap repwe sáráfésefál: ‘Inisir epwe wiliti inisin eman alüal, repwe liwiniti pöchöküler lealüalür.’​—Hiop 33:25.

Chemeni: Inaamwo ika Chón Pwáraatá Jiowa ra silei usun ewe álillis mi kawor me ren Jiowa, nge ra pwal kútta álillis seni pekin pioing ika a úriir eú semmwen ren langattam fansoun. (Markus 2:17) Iwe nge, sise kan pesei aramas ar repwe nóm wóón och sókkun sáfei, pokiten sia silei pwe emén me emén epwe pwisin filatá met epwe féri lón pekin sáfei.