Atun A Uruk eú Samau Watte

Linda, 71 ierin a erá: “Lupwen ua silei pwe a kanser ammatei me affei, ua meefi pwe upwele chék máló. Nge, lupwen ua ló seni nei we tokter me liwiniti imwei we, iwe ua ekieki, ‘Esap ina met ua ekieki pwe a úriei nge mi lamot upwe kútta alen ai upwe tongeni likiitú fan.’”

Elise, 49 ierin a erá: “Ua riáfféú seni eú sókkun semmwen mi fókkun ámmetek mi oofi ekkewe waan memmeef wóón peliefefinin ón mesei. Fán ekkóch, a kon ssenúk metekin iwe ua poputá le letipechou. Fán chómmóng, ua kan meefi tipitipingaw, me ua pwal mwo nge ekiekin pwisin angealó manawei.”

Emén mwán mi samau fán waan wheelchair lein chókkewe a tongeer

KA SILEI alólilenin an uruk eú sókkun samau mi tongeni efisi máló are an úri emén en mi fókkun tongei. Kese chék aúreki ena samau, nge ka pwal aúreki me likiitú fán weiresin letipen ewe mi samau me chókkewe mi túmúnú. A pwal tongeni lapóló lólilenum me niwokkusum seni óm kewe appointment pioing, weiresin méén me óm kúnékún pekin sáfei, are áweiresin mwirimwirin únúmom kewe sáfei. Aúrekin samau mi chou a tongeni fókkun alólilenikich.

Ia sia tongeni sepiló ia? Chómmóng ra kúna watteen ourur seni ar lúkúlúk wóón Kot lón iótek, me ákkálleani ekkewe wokisin seni Paipel mi ekinamwei letiper. Ra pwal tongeni angei álillis me tong seni chón ar famili me chiechier kewe.

USUN ÁN EKKÓCH LIKIITÚ

Robert, 58 ierin a erá: “Kopwe lúkúlúk wóón Kot me epwe álisuk le likiitú ngeni óm samau. Kopwe ikkiótek ngeni Jiowa. Ereni meefiom. Tingorei an we manaman mi fel. Tingorei pwe epwe álisuk le péchékkúl fán iten óm we famili me amwéchú kinamween letipom lón óm likiitú ngeni óm we samau.

“A mmen éch ika chón ach kewe famili ra kan chék nónnóm me álisikich iteitan. Iteiten rán, emén are rúúemén me leir ra kan kériei wóón phone me eis ‘Ifa usum?’ Chiechiei kewe seni ekis meinisin ra kan apéchékkúlaei. Ra fókkun echimwaaeitá, me álisiei le likiitú.”

Ika emén chiechiom a samau nge ka ló áámwa, iwe nengeni meefien Linda ei: “Ese mwáál ewe mi samau a mochen pwe manawan epwe usuusun we chék ren úkúkún an tongeni me eli ese kan kon mochen fóffós usun an we samau. Ina popun, kopwe chék fós usun met ekkewe oua kan piin fóffós usur.”

Ren án Kot álillis, ourur seni Paipel, me pwal álillisin chón ach famili me chiechiach kewe, sia tongeni lúkúlúk pwe mi chúen wor lamoten ach sipwe manaw inaamwo ika sia nóm fán weiresin watteen samau.

Ekkewe Wokisin mi Álilliséch

Lúkúlúk wóón Kot.

“Üa iotek ngeni ewe Samol mi Lapalap, nge i a pälüeniei o angasaei seni ai kewe niuokus meinisin. Ewe chon mwelele a siö, nge ewe Samol mi Lapalap a aüselinga.”—Kölfel 34:4, 6.

Linda, ewe sia fen pwóróus usun, a erá: “Use kan eáni ei iótek, ‘Kot, kopwe echikaraei.’ Nge ua kan erá, ‘Álisiei pwe upwe péchékkúl, me elikiitúei fán ai ei semmwen.’””

Angei péchékkúl seni án Kot Kapas.

“Esap wor eman chon ewe fanü epwe apasa pwe a samau.”—Aisea 33:24.

Óm ekkekilonei án Kot kewe pwon fán iten mwachkkan epwe atoto ngonuk ápilúkúlúk allim mi tongeni elikiituk.

Kútta álillis seni chón óm famili me chiechiom kewe.

“Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.”—Än Salomon Fos 17:17.

Iei alon Elise, ewe sia fen pwóróus usun: “Kosap kan ákkáláeménúló. Mut ngeni chiechiom kewe ar repwe álisuk. Epwe wor atun eli kopwe kan meefi pwe usun itá ka chék áláeménúló me eli ka pwal mwo nge ekieki pwe Kot ese aúseling ngonuk, nge kosap chék ákkáláeménúló.”