Echö Taropwe Seni ewe Mwichen Sou Pwüngüpwüng

Ngeni Pwiich kana Chon Pwäratä Jiowa:

A ifa me ammwötöresin ekkeei fansoun! Ämi pwiich kana mi ächengicheng, aua enletin pwapwaiti ach angangfengen “fän tipeeu” le pwäratä ewe enlet usun Semach lon läng, Jiowa.​—Sef. 3:9; Jon 14:12.

Inaamwo ika sia pwapwa le angang ngeni Jiowa, nge sipwe pwal kükküna osukosuk. Lon ewe ier, ekkoch leimi oua küna riäfföü seni chechchechin fönü, taifun, noo, me mölümöl watte. (Mattu 24:7) Chommong ra weires ren semwen me apwangapwangen chinnap. Lapoloon ekkewe “riäfföü” mi fiffis ra kküükich meinisin. (Mt. 24:8, TF) Chommong pwiich kewe ra kalapus pokiten ar lükü, äwewe chök, lon Armenia, Eritrea, me South Korea.​—Mt. 24:9.

Met a fen älisikich le akkamwöchü ekiek mi mürinnö fän ekkeei weires? Ewe lesenin ier fän iten 2010 a äkkächemakich usun eü mettoch mi lamot: ‘Tong a likiitu fan mettoch meinisin. Tong esap muchulo.’ (1 Kor. 13:7, 8, TF) Pwüngün, ach tongfengen me pwal ach tongei Jiowa a akkapöchökkülakich le likiitü.

Chommong mi erä pwe iir chon Kraist ra ingelo ren lapoloon me fiffisin ach angangen afalafal. Inaamwo ika rese tipeeü ngeni ach lükü me ach kewe afalafal, nge ekkoch leir ra fen pwal mwo nge erä, “Ämi oua föri ewe angang itä ürürün aupwe föri!” Ifa ewe mettoch a atufichi Chon Pwärätä Jiowa le akkafalafal iteitan? Pwal chök ach tong. Sia usun Semach we lon läng pun sise mochen pwe emön epwe pöütmwäälilo. (2 Pit. 3:9) Ach na mochen a pwälo ren lapaloon chochoon chon afalafal lon ewe ier pwe a tori 7,508,050. Itä pwal menni lamalam lükün ach ei a wor chommong chon afalafal ra fangaffatolo ar fansoun fän tong le afalafal ngeni aramas?

Sia pöchökkületä ren pwöppwönütään än Aisea we oesini mi erä: “Lon fansoun sopolan, ewe chuk ia a nom ie imwenfelin ewe Samol mi Lapalap epwe fefeita o nukunuk, epwe pwal tekia seni chuk meinisin. Chon ekewe mwu won fanufan repwe mwicheto ren.” (Ais. 2:2-4) Ekkewe 294,368 mi papataiselo lon ewe ier ra kapachelong lein chokkewe mi feffeitä ngeni imwenfelin Jiowa we. Sia etiwalong chokkana lon ach mwicheichen pwipwi. Amwo ach tongen Chon Kraist epwe amwökütükich le älisiir lon ar fiffiu ngeni ewe chon oputakich, Setan ewe Tefil.​—1 Pit. 5:8, 9.

Chochoon chon fiti ewe Ächechchem lon ewe March 30, 2010 a kerän tori 18,706,895. Iwe, a pwäratä pwe a chüen wor fitu million aramas repwe tongeni fitikich le fel ngeni Jiowa. A ifa me pwapwaach ren än Jiowa esaamwo asopwalo ei otot! Lon ei fansoun, ach tong a kan äkkälisikich le lillikiitü.​—2 Tes. 3:5.

Ewe ülüngät ränin Mwichelap, itelapan “Akkarap Ngeni Jiowa!” a fis woon unusen fönüfan lon ewe 2010 a fen apöchökkülalo ach riri ngeni Semach we lon läng, Jiowa. A ifa me pwüngün alon ewe sou makken köl ei: “Ekkewe aramas mi ani [Jiowa] ar Kot repwe pwapwa!” (Kölf. 144:15, TF) Ese lifilifil met epwe fis lon mwachkkan, nge sia meefi nükünüköch pwe sisap niueiti och mettoch ika Jiowa a nonnom rech. (Kölf. 23:4) Ekiselo chök Jiowa epwele nöünöü Nöün we le “atala än Tefil angang.” (1 Jon 3:8) Pwüngün, sia äneänei pwe ena rän epwele war! Nge atun sia witiwit, a wor chommong angang sipwe föri.​—1 Kor. 15:58.

Oupwe lükülük pwe ause “mo ukutiu le chechemenikemi” lon am iotek fansoun meinisin. (Rom 1:9, TF) Amwo “oupwe iseis pwisin ami lon ewe tongen Kot, oupwe witiwiti umoumochun ach Samol Jises Kraist ngeni ewe manau esemuch.”​—Juta 21 TF.

Aua tongekemi meinisin!

Pwiimi,

Mwichen Sou Pwüngüpwüng än Chon Pwärätä Jiowa