Lesen 7

Eu Minen Ourour Seni Loom

Jiowa esap mut ngeni aramas mi ngau ar repwe ataielo Paratis. Chiechien Jiowa chok repwe nonnom lon Paratis. Nge met epwe fis ngeni ekkewe aramas mi ngau? Ren om kopwe kuna poluen ena kapas eis, nengeni ewe poraus mi enlet ussun Noa. Noa a manau fite ngerou ier me loom. I emon aramas mi murinno a achocho le fori letipen Kot. Nge ekkewe ekkoch aramas won fonufan ra foffori mettoch mi ngau. Ina popun Jiowa a ereni Noa pwe epwe wato eu nooter epwe arosalo ekkena aramas mi ngau. Kot a era pwe Noa epwe falei efoch waaimw pwe i me an we famili resap malo lupwen epwe war ewe Nooter.​​—⁠Kenesis 6:​9-​18.

Noa me chon le imwan kewe ra falei ewe waaimw. Noa a ouroura aramas pwe epwe wor eu Nooter, nge rese mochen auseling. Ra chok sopwosopwolo lon ar kewe fofforingau. Mwirin a wes ewe waaimw, Noa a emmwenalong sokkopaten man lon ewe waaimw me i me chon le imwan kewe ra pwal tolong lon. Iwe, Jiowa a efisi eu molumol watte. Ran a pungutiu 40 ran me 40 pwin. Ewe konik a pwoluelo unusen fonufan.​​—⁠Kenesis 7:​7-​12.

Ekkewe aramas mi ngau ra malo, nge Noa me an famili ra manau. Jiowa a tumunuur atun ewe Nooter me a emmweniirelong lon eu fonufan mi limochuelo seni fofforingau. (Kenesis 7:​22, 23) Ewe Paipel a apasa pwe epwe pwal wor eu fansoun lupwen Kot epwe arosalo chokkewe rese mochen fori minne mi pwung. Aramasoch resap nninniilo. Repwe manau tori feilfeilo chok lon ewe Paratis won fonufan.​​—⁠2 Piter 2:​5, 6, 9.

Ikenai chommong aramas ra fori mettoch mi ngau. Ewe fonufan a ur ren osukosuk. Jiowa a tittiinalo noun kewe Chon Pwarata le ouroura aramas, nge lape ngeniir rese mochen auselinga an Jiowa kewe kapas. Rese mochen siwili manauer. Rese mochen etiwa minne Kot a apasa ussun pwung me mwaal. Met epwe tori ekkeei aramas? Repwe siwili lapalaper? Chommong resap siwil. Ewe fansoun epwe feito lupwen aramas mi ngau repwe nninniilo me resap chuen manau sefal.​​—⁠Kol Fel 92:⁠7.

Ewe fonufan esap talo; epwe wiliiti eu paratis. Chokkewe mi chiechioch ngeni Kot repwe nonnom tori feilfeilo chok lon ewe Paratis won fonufan.​​—⁠Kol Fel 37:⁠29.