Lesen 11

Oputalo Lamalam Chofona!

Setan me noun kewe timon rese mochen pwe kopwe angang ngeni Kot. Ra mochen okullu aramas meinisin seni Kot ika ir mi tongeni. Ifa ussun repwe sotun le fori ena? Ra sotun le fori ren lamalam chofona. (2 Korint 11:​13-​15) Eu lamalam a chofona ika ese asukula ewe enlet seni lon ewe Paipel. Lamalam chofona a ussun tipitipin moni​—⁠a nikinikin wesewesen moni, nge esor lamotan. Epwe tongeni efisi osukosuk watte.

Afalafal mi chofona ese apwapwai Jiowa, ewe Koten enlet. Lupwen Jises a nonnom won fonufan, chon eu lamalam ra mochen nnielo. Me rer, ar we lamalam ewe lamalam mi pwung. Ra apasa: “Mei wor emon chok Semem, Kot.” Jises a tipeeu ngeniir? Aapw! A ereniir: “Ami mi chok seni sememi ewe Tefil.” ( Jon 8:​41, 44) Ikenai, chommong aramas ra ekieki pwe ra fel ngeni Kot, nge ra wesewesen angang ngeni Setan me noun kewe timon!​​—⁠1 Korint 10:⁠20.

Ussun efoch ira a uwani uwa mi ngau, lamalam chofona a uwani aramas mi fori mettoch mi ngau. Mei wor chommong osukosuk won fonufan pokiten ekkewe mettoch mi ngau aramas ra foffori. Mei wor lisowu mwaal, fiffiu, sola, kirikiringau, nni manau, me achou manau. Chommong lein ekkewe aramas mi foffori ekkeei mettoch mi ngau ra fiti lamalam, nge ar we lamalam ese amwokutuur le foffori minne mi pwung. Rese tongeni chiechioch me Kot tori ra fen ukutiu le foffori mettoch mi ngau.​—⁠Mattu 7:​17, 18.

Lamalam chofona a asukula aramas le iotek ngeni uluulun. Kot a apasa pwe sisap iotek ngeni uluulun. Mi och ena. Kopwe pwapwa ika emon ese fos ngonuk nge a chok fos ngeni sasingum? Weween pwe ena emon a ita chiechioch ngonuk? Aapw. Jiowa a mochen pwe aramas repwe fos ngeni i, nge sap ngeni eu uluulun are lios, esor manau lon.​​—⁠Ekistos 20:​4, 5.

Lamalam chofona a asukula aramas pwe esor ngauen an aramas nni manau atun fansoun maun. Jises a apasa pwe chiechien Kot kewe repwe tongeefengenniir. Sise tongeni nnielo ekkewe aramas sia tongei. ( Jon 13:35) Mei pwal mwo mwaal ach nnielo aramas mi ngau. Lupwen ekkewe chon oputa Jises repwele aresini, Jises ese mut ngeni noun kewe chon kaeo ar repwe fiu fan iten ar repwe tumunu.​​—⁠Mattu 26:​51, 52.

Lamalam chofona a asukula pwe aramas mi ngau repwe riaffou lon ekkeiin ell. Nge ewe Paipel a asukula pwe tipis a emmwen ngeni malo. (Rom 6:​23) Jiowa emon Kot mi tong. Emon Kot mi tong epwe ita eriaffou aramas tori feilfeilo chok? Aapwi! Lon Paratis, epwe wor eu chok lamalam, ewe lamalam Jiowa a pwapwa ren. (Pwarata 15:⁠4) Ekkewe lamalam meinisin mi alongolong won an Setan kewe kapas chofona repwe fen morolo.