Apéchékkúlatá Ámi Lúkú mi Unusen Pin

1, 2. Met sipwe féri pwe epwe péchékkúl inisich me éúmanaw, me pwata a lamot ena?

KICH meinisin sia mochen sipwe péchékkúl me éúmanaw. Nge ika sia mochen pwe inisich epwe péchékkúl me éúmanaw, iwe mi lamot sipwe mwéngé ekkewe mwéngé mi vitamin, annafa ach taiso, me túttúmúnú péchékkúlen inisich. Weween pwe sipwe achocho nge sisap fangetá pún a tongeni kkúú manawach iei me lón mwachkkan. Iwe nge, mi lamot sipwe pwóróus usun pwal eú sókkun mettóch sipwe péchékkúl lón. Met ena?

² Ewe chón káé Jutas a fós usun ena, atun a pese ngeni ekkewe Chón Kraist: “Oupwe chok nom non ewe tongen God.” A pwal erá lón ena wokisin ewe ákkáeúin mettóch epwe tongeni álisikich le féri ena. Iei alon: “Oupwe sopweino ne pwisin apochokunata . . . ami we nuku mi unusen pin.” (Jutas 20, 21, KG) Met kopwe tongeni féri pwe epwe péppéchékúleló óm lúkú pwe kopwe chék nóm lón án Kot tong? Sipwe pwóróus wóón úlúngát mettóch nge mi lamot sipwe ekieki usur.

ÁKKÁMÁÁRAATÁ ÓM LÚKÚ ÁN JIOWA KEWE ALLÚK MI PWÚNG

3. Satan a mochen otupuk pwe kopwe eáni met sókkun ekiek usun án Jiowa kewe allúk?

³ Akkomw, a lamot óm kopwe apéchékkúla óm lúkú án Kot kewe allúk. Atun ka kákkáé ei puk, ka fen káé chómmóng án Jiowa kewe allúk mi pwúng usun napanapen féfférúch. Iwe met meefiom usur? Satan a mochen otupuk pwe kopwe ekieki pwe án Jiowa kewe allúk me kapasen emmwen ra tichik pwal mwo nge áweires. Satan a fen ákkáeá ena sókkun minen otuputup, poputá seni sópwéchún an otuputup lón ewe Eten. (Keneses 3:1-6) Nge kopwe tup ren an na otuputup? Epwe fókkun lóngólóng wóón minne ka ekieki.

4, 5. Epwe itá ifa ach ekiek usun án Kot kewe allúk me met epwe fis ika a ina ach ekiek? Áweweei mwo.

⁴ Sipwe eáni ei kapas áwewe: Atun ka feffetál lón eú leeni mi lingéch, ka kúna eú ttit mi péchékkúl me tekia mi ttittieló eú kinikinin ewe leeni mi lingéch. Ena leeni lón ena ttit a fókkun ling. Neman akkomw ka ekieki ika pwata ena ttit a eppetuk le fetáleló ewe epek. Nge atun ka nennewu, ka kúna emén laion mi mwacho a kúkkútta liapan me ena epek! Iwe iei ka weweiti pwe ewe ttit ina eú minen túmún fán itom. Nge a wor emén mi eniweniw iei mi kúkkútók pwe epwe liapenuk? Iei éúréúrach me ren án Kot kapas: “Oupwe amolakemi o mamasa, pun Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.”​—1 Petrus 5:8.

⁵ Satan i emén chón elliapa aramas mi fókkun kirikiringaw. Pokiten Jiowa ese mochen ach sipwe wiliti liapen Satan, iwe a fératiw ekkewe allúk pwe epwe túmúnúkich seni án ewe mi ngaw kewe chómmóngun “angangen atuputup.” (Efisos 6:11) Ina popun iteiten ach ekilonei án Kot kewe allúk, sipwe kúna me lón án Semach we lón láng tong. Ika a ina ach ekiek, iwe án Kot kewe allúk repwe minen túmún ngenikich me apwapwa. Ewe chón káé James a makkeei: “Nge eman mi likitü le nenelong lon ewe allük mi unusöch, ewe a angasakich, o sopwela le föri ei, . . . epwe feiöch lon met a föri.”​—James 1:25.

6. Ifa ewe mettóch mi kon múrinné seni meinisin epwe apéchékkúla ach lúkú án Kot kewe allúk mi pwúng me kapasen emmwen? Áweweei mwo.

⁶ Ach etipeeúfengeni manawach ngeni án Kot kewe allúk, ina ewe mettóch mi kon múrinné seni meinisin epwe tongeni apéchékkúla ach lúkú ewe Chón Awora Allúk me tipachemen an kewe allúk. Áwewe chék, a kapachelong lón ewe “allukun Kraist” ewe allúk pwe sipwe asukula aramas, mettóch ‘meinisin mine [a] allük ngenikich.’ (Kalatia 6:2, TF; Mateus 28:19, 20) Kich Chón Kraist sia pwal apwénúetáéchú ewe allúk le mwichfengen pwe sipwe fel ngeni Kot me apéchékkúlafengenikich me pwiich kewe. (Ipru 10:24, 25) A pwal kapachelong lón án Kot kewe allúk ewe pesepes ach sipwe iótek ngeni Jiowa iteitan, iótek fán chómmóng me epwe seni letipach. (Mateus 6:5-8; 1 Tesalonika 5:17) Atun sia etipeeúfengeni manawach ngeni ekkena sókkun allúk, iwe a unusen ffat ngenikich úkúkún ewe tong mi nóm lón ekkewe kapasen emmwen. Ach álleasochisiir epwe atoto ngenikich ewe sókkun pwapwa me menemenéch sisap fókkun tongeni kúna lón ei fénúfan mi fitikoko. Atun ka ekilonei ifa usun ka pwisin kúna feiéch seni óm manaweni eú manaw mi tipeeú ngeni án Kot kewe allúk, iwe a péchékkúleló óm lúkú ekkena allúk.

7, 8. Ifa usun án Kot we Kapas a apéchékkúla chókkewe mi lólilen le akkamwéchú ar pwúng lón ekkan ier repwe feito?

⁷ Ekkóch ra lólilen fán ekkóch pwe epwe kon weires ngeniir ar repwe álleasochisi án Jiowa kewe allúk lón ekkan ier repwe feito. Ra niwokkus pwe neman repwe fangetá. Ika a ina usun meefiom, iwe chechchemeni mwo ei wokisin: “Ngang ewe Samol mi Lapalap om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won. Amwo kopwe aüselinga ai kewe allük! Mürin om kinamwe epwe wewe ngeni eu chanpupu, nge om pwüng” epwe wewe ngeni ekkewe nó lemataw. (Aisea 48:17, 18) Ka fen awora fansoun le ekieki usun apéchékkúlen ekkena kapas?

⁸ Alon Jiowa na, a áchema ngenikich pwe sipwe pwisin kúna feiéch ren ach álleasochisi i. A pwonei ruu sókkun feiéch ika sia féri ena. Áeúin, ach kinamwe epwe usun eú chénúpupu mi ekinamwe, pupummong me pupu iteitan. Oruuan, ach pwúng epwe usun nónóón ewe mataw. Ika ka útá órosset me katol nónóón ewe mataw, kopwe meefi pwe ese wor muchchún. Ka silei pwe ekkewe nó repwe chék púppúngúri órosset tori feilfeiló. Jiowa a apasa pwe óm pwúng are óm féfféri minne mi pwúng esap wor muchchún ika kopwe álleasochisi. Esap fókkun likitukoló ika kopwe achocho le akkamwéchú óm tuppwél ngeni! (Kölfel 55:22) Esap pwe ekkena sókkun pwon mi apwapwa a apéchékkúlatá óm lúkú Jiowa me an kewe allúk mi pwúng?

“FEFEILO NGENI ASIMAU”

9, 10. (a) Pwata a mmen éch ngeni emén Chón Kraist an epwe achocho ngeni an epwe ásimawóló? (b) Ifa usun án emén eáni ekiekin Kot a atoto pwapwa?

⁹ Pwal eú mettóch epwe apéchékkúla óm lúkú, ina óm álleasochisi alon Kot ei: ‘Oupwe fefeilo ngeni asimau.’ (Ipru 6:1, TF) A mmen éch ngeni emén Chón Kraist an epwe achocho ngeni an epwe ásimawóló. Ese tufich án emén epwe unuséch lón ei fansoun, nge a tongeni achocho ngeni an epwe ásimawóló. Pwal och, atun Chón Kraist ra ásimawóló, ar pwapwa lón ar angang ngeni Jiowa a lallapóló. Pwata a ina usun?

¹⁰ Emén Chón Kraist mi ásimaw a eáni án Jiowa ekiek. (Johannes 4:23) Paulus a makkeei: “Chokewe mi manau lon pekin fituk ra nonom fän nemenien fituk.” (Rom 8:5) Án emén eáni manaw lón pekin futuk, a chék atoto ekis pwapwa pwe a ekieki chék pwisin i, miritingaw me akkomwa mettóchun aion. Emén mi eáni ekiekin Kot, a pwapwa pwe a nefotofot wóón mettóchun Jiowa, ewe Kot mi pwapwa. Emén mi wor an riri ngeni Kot, a mwasangasang le apwapwaai Jiowa pwal mwo nge pwapwa fán sóssót. Pwata? Pwe ekkewe sóssót ra atufichikich le ámááraatá ach tuppwél me ánnetatá pwe Satan emén mi chofona, ikkena met a apwapwaai Semach we lón láng.​—Än Salomon Fos 27:11; James 1:2, 3.

11, 12. Met Paulus a apasa usun án emén Chón Kraist “peekin memmef” are tufichin ekiek me met weween an fós usun “sipeöch”? (b) Ifa ewe asóssót mi lamot ngeni emén ménúkol me emén chón saakas?

¹¹ Án emén ásimawóló, a fis seni an kákkáé ren fitu fansoun. Ekieki mwo met ei wokisin a erá: “Mwöngö mi pöchökkül ra fäniten chókana ra mwukóló, wewen, iir chókewe ra achocho le aörüni ngeni ar kewe peekin memmef pwe repwe sipeöch le älefiila lefiilen met mi mwirinnö me met mi ingaw.” (Ipru 5:14, Agapé) Atun Paulus a fós usun an epwe “sipeöch” ach “peekin memmef” are tufichin ekiek, a néúnéú ewe kapasen Krik mi terú lón ekkewe gym lón Kris me lóóm, pún a tongeni wewe ngeni ‘sipeéch usun emén chón saakas.’ Iei kopwe mwo ekieki met a kapachelong lón án emén chón saakas asóssót.

¹² Atun sia kerán uputiw, inisich ese mwo káit. Áwewe chék, emén ménúkol ese silei mwékútúkútún péún me pechen. Ina popun atun a amwékútúfetálei péún a pwal mwo nge kkúú wóón mesan me a efisi an rúké me kechiw. Nge ekis me ekis ewe ménúkol, a kan asóssót le amwékútú inisin. Iwe a té, mwirin a fetál me a ssá. Woi nge ifa usun ewe chón saakas? Atun ka kúna án emén chón saakas chang me saakas lón ewe ásepwál fán angéchún, ese wor tipemwaramwar pwe ka silei pwe ewe chón saakas a fen asóssót ren langattam fansoun pwe epwe sipeéch. Nge án emén chón saakas sipeéch ese pwúkún fisitá, nge a fis ren an awora fitu fitu awa le akkasóssót. Paipel a erá pwe ena sókkun asóssót are sipeéch, a “atoto ekis chök feiöch.” Nge an epwe sipeéch ach tufichin ekiek lón pekin lúkú, ina met a kon aúchea.​—1 Timoty 4:8.

13. Ifa usun sipwe emiriti ach tufichin ekiek?

¹³ Lón ei puk sia fen pwóróusfengen wóón chómmóng mettóch mi álisuk le emiriti óm tufichin ekiek pwe kopwe akkamwéchú óm tuppwél ngeni Jiowa usun emén mi eáni ekiekin Kot. Fán iótek, kopwe ekieki ifa usun kopwe apwénúetá ekkewe kapasen emmwen me allúk atun ka eáni kefil iteiten rán. Lón eú me eú ekkewe kefil kopwe eáni, kopwe pwisin eisinuk: ‘Ikkefa án Paipel kewe allúk are kapasen emmwen wóón ei mettóch? Ifa usun upwe apwénúretá? Met sókkun kefil epwe apwapwaai Semei we lón láng?’ (Än Salomon Fos 3:5, 6; James 1:5) Iteiten óm alónga óm kefil wóón ekkena mettóch, epwe alapaaló óm emiriti óm tufichin álefila lefilen minne mi éch me minne mi ngaw. Ena sókkun emirit epwe álisuk le wiliti emén mi ákkeáni ekiekin Kot.

14. Met mi lamot sipwe mwoneiti pwe sipwe feffeitá lón pekin lúkú? Nge met mi lamot ach sipwe túmúnúkich seni?

¹⁴ Inaamwo ika sia tongeni tikeri ach sipwe ásimawóló nge sia pwal tongeni feffeitá lón pekin lúkú. Án emén mámmáár a lóngólóng wóón anan mwéngé. Ina popun iei met Paulus a erá: “Mwöngö mi pöchökkül ra fäniten chókana ra mwukóló.” Óm mwémmwéngé ekkewe mwéngé mi péchékkúl lón pekin lúkú, ina eú mettóch mi lamot pwe epwe apéchékkúla óm lúkú. Tipachem a wewe ngeni pwe ka apwénúetáéchú met ka káé, ina pwata Paipel a erá pwe tipachem, ina ewe mi aúchea lap seni meinisin. Ina popun, mi lamot ach sipwe ámááraatá ach wesewesen mwoneiti ewe enlet mi aúchea Semach we a awora ngenikich. (Än Salomon Fos 4:5-7; 1 Petrus 2:2) Nge ach akkangei sile me tipachem seni Kot ese wewe ngeni pwe sia tekia lap seni ekkewe ekkóch. Mi lamot pwe iteitan sipwe etittina pwisin kich pwe ete máár lón letipach ewe napanap lamalam tekia are ekkewe ekkóch apwangapwangen tipis. Paulus a makkeei: “Oupwe nennengeni o pwan pwisin apungu manauemi, pun oupwe tongeni sinei ika ami mi nukuchar non ami nuku.”​—2 Korint 13:5, KG.

15. Pwata a aúchea tong lón ach feffeitá lón pekin lúkú?

¹⁵ Neman emén a péchékkúl me éúmanaw nge mi chúen lamot an epwe mwémmwéngé me túttúmúnú pwisin inisin. Iwe nge met a lamot ngenikich pwe sipwe ásimawóló me akkamwéchú ach riri ngeni Kot? Tong, ina met a aúchea seni meinisin. Mi lamot an epwe chék mámmááritá ach tongei Jiowa me chienach kewe chón lúkú. Ika ese wor ach tong, iwe meinisin ach sile me féffér epwe lamotongaw usun nechen eú peen. (1 Korint 13:1-3) Ren tong, sia tongeni wiliti emén Chón Kraist mi ásimaw me sópweló le feffeitá lón pekin lúkú.

AKKAFÓTA ÓM EKIEK WÓÓN EWE ÁPILÚKÚLÚK JIOWA A AWORA

16. Met sókkun ekiek Satan a apéchékkúla me met sókkun minen túmún Jiowa a awora?

¹⁶ Pwal eú mettóch epwe apéchékkúla óm lúkú, mi lamot kopwe ánnefota óm ekiek wóón ewe ápilúkúlúk Jiowa a awora. Ren óm kopwe féri ena, mi lamot kopwe túmúnú met ka eáni ekiek. Satan ewe sounemenemen ei fénúfan, a mmen angéch le etipetipa aramas le eáni ekiek ese pwúng, ekiek ese lúkúlúk me ese wor ápilúkúlúkún. (Efisos 2:2) Ekkena sókkun ekiek a efeiengaw ngeni emén Chón Kraist usun chék efeiengawen irá mi mwotukotuk ngeni eú imw. Sia pwapwa pwe Jiowa a awora eú túmún mi kon lamot, ina ewe mettóch ápilúkúlúk.

17. Ifa usun Kapasen Kot a áweweei lamoten ewe mettóch ápilúkúlúk?

¹⁷ Ewe Paipel a eiteita ekkewe sókkópaten pisekin maun lón pekin lúkú mi lamot ngenikich pwe sipwe maun ngeni Satan me ei fénúfan. Eú pisekin maun mi lamot ina ewe akkaw itan “apilüköchün manau.” (1 Tesalonika 5:8) Emén soufiu me lóóm a silei pwe a tongeni máló ika ese wor imwan akkaw. Lap ngeni, ena akkaw a ffér seni mechá, nge lón a ffér seni únen man. Ena akkaw a túmúnú mékúren ewe soufiu pwe ete kon feiengaw ren ekkewe pisekin efeiengaw ika a kkúú. Usun chék án akkaw túmúnú mékúren emén soufiu, ina usun án ápilúkúlúk epwe túmúnú óm ekiek.

18, 19. Jesus a isetiw met sókkun leenien áppirú lón an akkamwéchú an ápilúkúlúk me ifa usun sipwe áppirú?

¹⁸ Jesus a isetiw eú leenien áppirú mi fókkun múrinné lap seni meinisin lón an akkamwéchú an ápilúkúlúk. Chechchemeni met a likiitú fan lón ewe sáingoon pwinin manawan wóón fénúfan. Emén chiechian a rawei fán iten moni. Emén a pwal amam. Ekkóch ra sú seni me péútaaló. Me pwisin chón fénúan we ra oput pwe iwe ra púchér le erá pwe epwe niniló ren án ekkewe soufiun Rom eriáfféwú. Ese wor tipemwaramwar pwe Jesus a fen kúna sókkun sóssót mi chou lap seni met sipwe kúna lón manawach. Met a álisi? Ipru 12:2, a apasa pwe “ewe pwapwa mi nom mwan esap ekieki itengauen an mäla won ewe iräpenges [“iráán ninni,” NW]. Iwe, iei a mottiu lepelifichin Kot.” Esap fán eú an péút seni Jesus “ewe pwapwa mi nom mwan.”

¹⁹ Ifa ewe pwapwa mi nóm mwen Jesus? A silei pwe ren an likiitú a tongeni álisatá pinilóón iten Jiowa we mi pin. Epwe awora eú pisekin pwáraatá mi lap seni meinisin pwe Satan emén mi chofona. Ese pwal wor eú sókkun ápilúkúlúk epwe efisi án Jesus pwapwa chapur! A pwal silei pwe Jiowa epwe fókkun efeiéchú manawan fán tuppwél pún ekiseló chék epwele nómsefál ren Seman we, ina ewe fansoun mi fókkun apwapwa. Jesus a akkamwéchú lón an ekiek ena sókkun ápilúkúlúk mi apwapwa lón unusen fansoun an kúna riáfféú mi lap. A lamot sipwe pwal áppirú. A pwal wor ewe pwapwa mi nóm mwach. Jiowa a pwáraatá an súfélitikich ren an ngenikich ewe wis mi aúchea, ina ach sipwe álisatá pinilóón itan we. Sia tongeni ánnetatá pwe Satan emén mi chofona ren ach filatá pwe Jiowa ach Sounemenem me onómukich fán núkúnúkéch lón án Semach we tong ese lifilifil met sókkun sóssót me weires sipwe kúna.

20. Met epwe tongeni álisuk le ákkeáni ekiek mi pwúng me ápilúkúlúk?

²⁰ Jiowa ese chék mochen efeiéchú néún kewe aramas mi tuppwél nge a pwal mwétéres le féri ena. (Aisea 30:18; Malakai 3:10) A pwapwa le ngeni néún kewe chón angang mochenin letiper mi fich. (Kölfel 37:4) Kopwe tipeppós le ánnefota ewe ápilúkúlúkún kúna pwénúetáán án Kot kewe pwon. Kosap fangetá ren ekiekin án Satan ei fénúfan mi fókkun ngaw, limengaw me poison. Ika ka meefi pwe a té ekiekin fénúfan lón ekiekum me letipom, iwe kopwe iótek ngeni Jiowa fán tinikken, fán iten an “kinamwe mi tekia seni” ekiek meinisin. Ena kinamwe seni Kot epwe túmúnú letipom me ekiekum.​—Filipi 4:6, 7.

21, 22. (a) Ifa ewe ápilúkúlúk mi ling chókkewe mi chóni ewe “mwich mi fokun chocho” ra aúcheani? (b) Ifa kinikinin án Chón Kraist ápilúkúlúk ka fókkun aúcheani me met ka tipeppós le féri?

²¹ A ifa me ámmeseiken ewe ápilúkúlúk kopwe ekilonei! Ika en chóchóón ewe “mwich mi fokun chocho,” chókkewe repwe “towu seni riaföü mi lapalap,” iwe kopwe ekieki ewe manaw kopwele eáni. (Pwärätä 7:9, 14) Pokiten Satan me néún kewe chónláng mi ngaw resap chúen nóm, iwe kopwe meefi ewe sókkun ngaseló kese tongeni weweiti iei pún ese wor emén leich mi piin eáni eú sókkun manaw ese wor án Satan angangen etipetip lón. Pokiten epwele móróló ena etipetip, iwe a ifa me apwapwaan ewe angangen ewilisefáli ei fénúfan ngeni eú paratis fán emmwenien Jesus me chienan kewe 144,000 sounemenem seni láng! A ifa me meseikach ren ewe ápilúkúlúkún ach kúna pwe esap chúen wor meinisin semmwen me terin inis me sipwele souni attongach kewe seni peiaser, me eáni ewe sókkun manaw me ren otaen Kot! Atun sia ukkunuséchúló, epwe pwal wor eú feiéch mi lap epwe torikich. Ina ewe pwon mi pwá lón Rom 8:21 pwe sipwe “eti nöün Kot kewe lon ar ngasala me ling.”

²² Jiowa a mochen kopwe pwapwaiti ewe sókkun ngaseló, mi lap seni met ka pwal mwo nge tufichin ekieki. Alen óm kopwe kúna ena ngaseló, epwe lóngólóng wóón óm álleasochis. Esap pwe a fókkun lamot óm achocho iei le ákkálleasochisi Jiowa iteiten rán? Iwe kopwe sóssópweló le akkapéchékkúla óm lúkú mi unusen pin, pwe kopwe chék nóm lón án Kot tong tori feilfeiló chék!