Ámi Kana Át, Oua Achocho Ngeni Angangen ewe Mwichefel?
1. Ineet atun emén át a tongeni apwénúetá ewe emmwen lón 1 Timoty 3:1?
1 “Are emön mwän a mochen epwe angei ewe wiis . . . , a tipeni pwe epwe föri ew angang mi mwirinnö.” (1 Tim. 3:1, Agapé) Ekkena kapas mi pop seni Kot, ra pesei ekkewe mwán lón ewe mwichefel ar repwe achocho ngeni ekkóch wis lón ewe mwichefel. Itá a lamot óm kopwe wattetá iwe kopwap achocho ngeni ekkóch wis? Ren enletin, atun ka chúen kúkkún, a mmen múrinné ika kopwe poputá le achocho ngeni ekkóch wis. Ika ina, kopwe tongeni angei káit me atun kopwe wattetá ka tufichin pwáraaló pwe a fich ngonuk óm kopwe wiliti emén chónálillisin mwichefel. (1 Tim. 3:10) Ika en emén át mi fen papatais, ifa usun kopwe achocho ngeni angangen ewe mwichefel?
2. Ifa usun kopwe ámááraatá me pwáraatá óm pennúkú pwisin mochenum?
2 Pennúkú Pwisin Mochenum: Chechchemeni pwe óm achocho, esap fán iten óm kopwe eáni eú wis mi lap, nge ka achocho fán iten eú angang mi múrinné. Ina popun, kopwe ámááraatá óm mochen álisi pwiom kewe. Óm ekilonei án Jesus leenien áppirú mi múrinné ina eú mettóch epwe álisuk. (Mat. 20:28; Joh. 4:6, 7; 13:4, 5) Tingorei Jiowa epwe álisuk le áfánni ekkewe ekkóch. (1 Kor. 10:24) Ka tongeni álilliséch ngeni ekkewe chinnap lón ewe mwichefel me ekkewe mi apwangapwang? Ka tongeni álillis le ótót me féri ekkóch angangen túmúnún ewe Leenien Mwich? Ka tongeni eáni án emén kinikin lón ewe Sukulen Angangen Chón Kraist ika ese war? Kopwe kúna pwe óm pennúkú pwisin mochenum fán iten ekkewe ekkóch, epwe atoto reom pwapwa.—Föf. 20:35.
3. Ifa úkúkún lamoten óm riri ngeni Jiowa me ifa usun kopwe ámááraatá?
3 Óm Riri Ngeni Jiowa: A fókkun lamot ngeni emén chón angang lón ewe mwichefel an epwe ririéch ngeni Jiowa lap seni an eáni ekkewe tufich are napanap mi kkóló aúchean. Emén mwán mi ririéch ngeni Jiowa a achocho le eáni ekiekin Jiowa me Jesus. (1 Kor. 2:15, 16) A eáni “uän” ewe manaman mi fel. (Kal. 5:22, 23) I emén chón afalafal mi tinikken le akkomwa mettóchun ewe Mwú. (Mat. 6:33) Ka tongeni ámááraatá napanapen Chón Kraist ren óm akkótaéchú óm pwisin káé. A kapachelong óm álleani ewe Paipel iteiten rán, álleani Ewe Leenien Mas iteiten an katowu me ekkóch néúch kewe puk. A pwal lamot óm ammólnatá me fiffiti ekkewe mwich. (Kölf. 1:1, 2; Ipru 10:24, 25) Atun Paulus a pesei ewe alúwél Timoty le feffeitá lón pekin lúkú, iei met a makkeei: “Kopwe . . . tümwünü mine ka afalafal won.” (1 Tim. 4:15, 16) Ina popun kopwe angang weires le féri óm kewe kinikin lón ewe Sukulen Angangen Chón Kraist. Ammólnatá fán iten ewe angangen afalafal me fiffiti iteitan. Kopwe akkóta me achocho le apwénúetá met ka mochen tikeri lón óm angang ngeni Kot, usun chék ewe angangen pioneer, angang lón Bethel, are fiti ewe Sukulen Paipel fán Iten Ekkewe Mwán mi Lipich. Óm ririéch ngeni Jiowa epwe álisuk le “sü seni tipen alüal.”—2 Tim. 2:22.
4. Ifa aúchean anúkúnúk me tuppwél?
4 Anúkúnúk me Tuppwél: Pokiten ekkewe mwán lón ewe mwichefel mi kefilitá le eineti ekkewe mwéngé ngeni ekkewe Chón Kraist mi osupwang lón fansoun ekkewe aposel ra “itoch” ren ar anúkúnúk me tuppwél, iwe ekkewe aposel rese lólilen ika epwe fisiéch ewe angangen einet. Ena mettóch a efisi án ekkewe aposel repwe pwal tongeni féri ekkóch angang mi lamot. (Föf. 6:1-4, TF) Ina popun, ika mi wor wisom lón ewe mwichefel, kopwe féri úkúkún óm tufich. Áppirú Noa, ewe mi túmúnúéchú le apwénúetá ekkewe kapasen emmwen Kot a ngeni pwe epwe falei ewe waimw. (Ken. 6:22) Jiowa a aúcheani án emén pwáraatá tuppwél me ina esissillen emén mi ásimaw.—1 Kor. 4:2; ppii ewe pwóór “Sópwéchún Án Emén Angei Káit.”
5. Pwata ekkewe át repwe achocho ngeni angangen ewe mwichefel?
5 Usun met a fen oesini, Jiowa a emwittiri ewe angangen ionifengeni aramas. (Ais. 60:22) Órun 250,000 aramas ra papatais iteiten ier. Pokiten a chómmóng minefé mi etiwa ewe enlet, iwe a lamot an epwe wor ekkewe mwán mi lipwákéch me ásimaw pwe repwe túmúnú angangen ewe mwichefel. A wor chómmóng angang iei lón án Jiowa angang lap seni me lóóm. (1 Kor. 15:58) Ámi kana át, oua achocho ngeni angangen ewe mwichefel? Ika ina oua fókkun tipeni eú angang mi múrinné!
[Ekis Pwóróus lón pekin taropwe 2]
Pokiten a chómmóng minefé mi etiwa ewe enlet, iwe a lamot an epwe wor ekkewe mwán mi lipwákéch me ásimaw pwe repwe túmúnú angangen ewe mwichefel
[Pwóór lón pekin taropwe 3]
Sópwéchún Án Emén Angei Káit
Ekkewe át mi lipwákéch ra kúna álillis atun ekkewe mwán mi ásimaw ra ewisa ngeniir ekkóch angang me ngeniir káit. Áwewe chék, sárin eú mwich, emén chónemmwen mi wisen sáifetál a mómmót wóón ewe stage pwe epwe pesei emén chón afalafal. A tepereni pwe emén át a útá, iwe a eisini ika a witi an epwe fós ngeni. Ewe át a erá pwe iteiten sárin mwich a kan wisen elimelim wóón ewe stage. Seman kewe me inan ra mmólnetá le ló nge néúr na ese mochen ló ika ese akkomw féri wisan na. Ewe chónemmwen mi wisen sáifetál a pwapwa le mwékút seni ewe stage. A apasa: “Ekkewe mwán mi ásimaw lón ena mwichefel ra túmúnúéchú le awora káit ngeni ekkewe át mi lipwákéch ren ar ewisa ngeniir angangen ewe mwichefel. Iwe mwirilóón, iteiten ai chuuri ena mwichefel ra kan apasa pwe mi wor emén át mi fich ngeni an epwe emén chónálillisin mwichefel.”