Än Jiowa we Kapas A Manau
Menlapen Pworaus Seni ekkewe Taropwe Seni Jon me Juta
EKKEWE ülüchö taropwe nöün ewe aposel Jon a mak lon ewe ier 98 me lon Efisus, ra fit lein ekkewe amuchüloon puk lon ewe Paipel. Ekkewe rüüachö taropwe akkomw a pesei ekkewe Chon Kraist pwe repwe feffetäl lon ewe saram me achocho le ü ngeni ewe chon rikilo. Lon ewe aülüchöön, Jon ese chök kapas ussun ar repwe feffetäl lon ewe enlet nge a pwal pesei ekkewe Chon Kraist ar repwe angangfengen.
Lon nöün we taropwe a mak me Palestine, eli lon ewe ier 65, pwin Jises we Juta (emön chök iner nge ra semefesen) a öüröüra chienan kewe Chon Kraist ussun ekkewe mi ngaü mi ännifelong lon ewe mwichefel. Iwe, a awora kapasen emmwen ren ifa ussun repwe ü ngeni ekkewe etipetip mi ngaü. Ach älleasochisi ekkewe pworaus lon nöün Jon me Juta kewe ülüchö taropwe, epwe tongeni älisikich le akkamwöchü pöchökkülen ach lükü, inaamwo ika a torikich sossot.—Ipru 4:12.
FEFFETÄL LON EWE SARAM ME LON TONG ME PWAL REN LÜKÜ
Jon a makkei nöün we äechöön taropwe ngeni meinisin chokkewe mi tipeeüfengen me Kraist. Iwe, a awora kapasen fön fän iten epwe älisi ekkewe Chon Kraist pwe repwe ü pöchökkül le ü ngeni ekkewe chon rikilo me üppos lon ewe enlet me pwal lon minne mi pwüng. A apöchökkülatä ewe lamoten ach sipwe feffetäl lon ewe saram me lon tong me pwal ren lükü.
Jon a makkei: “Nge are sia fefetal lon saram, usun chok i [Kot] a nonnom lon saram, iwe, sia chiechifengen lefilach.” Pokiten Kot i ewe Populapen tong, ewe aposel a apasa: “Sipwe chok tongfengen lefilach.” Inaamwo ika “ewe tongen Kot”a achchüngükich pwe sipwe “alleasochisi an kewe alluk,” nge sipwe pworacho ngeni fönüfan ren “ach lükü” Jiowa Kot, an we Kapas, me Nöün we.—1 Jon 1:7; 4:7; 5:3, 4.
Pölüwen Kapas Eis Ussun Ekkeei Wokisin:
2:2; 4:10—Ifa ussun Jises i eü “minen omusamus ren ach tipis”? Jises a asoresini manauan pwe epwe eü asorun omusomus pwe epwe äwesi song, me atufichi pwüngiöch mi unusöch, weween, epwe äwesalo tipisin Atam. Ren ena asor, Kot a tongeni ümöümöch me omusalo tipisin chokkewe mi anganga ar lükü Jises.—Jon 3:16; Rom 6:23.
2:7, 8—Ifa ewe allük Jon a kapas ussun lupwen a apasa “minen lom” me “minefö”? Jon a kapas ussun ewe allükün tong lefilen Chon Kraist. (Jon 13:34) A erä pwe a “minen lom” pun Jises a nöünöü ekkena kapas lap seni 60 ier me mwen än Jon makkei nöün we äechöön taropwe. Ina minne, a fen nom ren ekkewe chon lükü “seni chök me lepoputän” ar wiliti Chon Kraist. A pwal “minefö” ewe allük pun epwe lap seni än emön ‘tongei chök chon orun ussun pwisin i,’ nge epwe pennüküolo manauan fän iten an epwe älisi aramas.—Lif. 19:18; Jon 15:12, 13.
5:5-8—Ifa ussun konik, chcha, me ewe ngün mi fel ra pwäratä pwe “Jises i Nöün Kot”? Konik, ina eü pisekin pwäratä pun atun Jises a papatais lon konik, Jiowa a pwisin apasa An pwapwaiti Nöün we. (Mt. 3:17) Pokiten chchaan Jises are manauan, a awora “penmanauen aramas meinisin,” a pwal pwäri pwe Jises mi Nöün Kot we. (1 Tim. 2:5, 6, TF) Ewe ngün mi fel a pwal affata pwe Jises Nöün Kot we atun a sotiu woon lon an fansoun papatais me atufichi an “fetalfeil ekis meinisin, [me] föri föför mürina o apöchöküla meinisin mi nom fän nemenien ewe Tefil”—Jon 1:29-34; Fof. 10:38.
Ikkeei Ekkoch Lesen Fän Itach:
2:9-11; 3:15. Ika emön Chon Kraist epwe mut ngeni och mettoch are emön epwe atai an tong ngeni chienan kewe Chon Kraist, a feffetäl lon rochopwak, ese silei ikewe epwe feilo ie.
“FEFFETAL LON EWE ENLET”
Jon a poputääni nöün we arüüachöön taropwe ren an apasa: “Iei ngang ewe elter [chinnap mwän], ngeni neminnan mi fifilita, pwal noun kewe semirit.” A pwäri an pwapwa le küna pwe “ekkoch me lein noum kewe pwe ra fefetal lon ewe enlet.”—2 Jon 1, 4, TF.
Mwirin an peseer pwe repwe ämääraatä tong, Jon a makkei: “Iei ewe tong, pwe sipwe chok fefetal usun an kewe alluk.” Jon a pwal öüröürer ussun “ewe chon otupu, o ewe mi u ngeni Kraist.”—2 Jon 5-7, TF.
Pölüwen Kapas Eis Ussun Ekkeei Wokisin:
1, 13—Iö na “neminnan mi fifilita”? Alon Jon a tongeni wewe ngeni emön fefin ren an nöünöü ewe kapas Kyria, ewe a wewe ngeni “fefin” lon fosun Krik. Are alon, epwe eü kapas monomon fän iten an epwe mak ngeni eü mwichefel nge ekkewe chon eriäfföü resap weweiti. Ika a pwüng ewe oruuan pworaus, nöün kewe repwe chon ewe mwichefel nge “noun pwin we” repwe wewe ngeni chon pwal eü mwichefel.
7—Met weween än Jises “feito” Jon a kapas ussun , me ifa ussun ekkewe chon otuputup “resap pwärätä”? Lon ei wokisin, ewe kapas “feito” ese wewe ngeni warotoon Jises le monomon lon mwachkkan. Nge, a wewe ngeni an wiliti emön aramas me an kepit me ren Kot. (1 Jon 4:2) Ekkewe chon otuputup rese lükü pwe a wiliti emön aramas. Rese lükü pwe Jises a uputiu woon fönüfan are a kepit me ren ewe ngün mi fel.
Ikkeei Ekkoch Lesen Fän Itach:
2, 4. Ren ach sipwe küna manau, a fokkun lamot ach sipwe silei me älleasochisi “ewe enlet,” weween meinisin ekkewe afalafal mi popu seni Paipel.—3 Jon 3, 4.
8-11. Ika sise mochen epwe pöüt senikich “chen, o umoumoch, o kinamwe . . . me ren Semach Kot, o pwal seni Jises” fengen me ach riri ngeni chienach kewe chon lükü, sipwe tüttümünü ach ririöch ngeni Kot me ü ngeni chokkewe rese “nonnom lon ewe afalafalen Kraist.”—2 Jon 3, TF.
SIPWE “ANGANGFENGEN LON EWE ENLET”
Jon a makkei nöün we aülüchöön taropwe ngeni chiechian we Kaius. A makkei: “Esor och pwapwa mi lap seni ai pwapwa lupwen ai rong pwe nei kena ra fefetal lon ewe enlet.”—3 Jon 4, TF.
Jon a apünga Kaius pokiten an “forata angang mi tuppwel” atun a älisi ekkewe wasöla chon lükü. Iwe, ewe aposel Jon a apasa: “Iwe, sipwe fakkun alisi ei sokkun aramas, pwe sipwe angangfengen lon ewe enlet.”—3 Jon 5-8.
Pölüwen Kapas Eis Ussun Ekkeei Wokisin:
11—Pwata ekkoch ra föfföringaü? Pokiten ra lükülükümmang, ekkoch rese silei Kot me aücheani napanapan kewe. Pokiten rese küna Kot ren wesewesen meser, ra ekieki pwe esap küna ar kewe föfför.—Is. 9:9.
14—Iö “chienach kena”? Lon ei wokisin ewe kapas “chienach” ese wewe ngeni än emön epwe chök chiechiöch ngeni emön. Jon a nöünöü ei kapas pwe epwe kapas ussun chon lükü meinisin.
Ikkeei Ekkoch Lesen Fän Itach:
4. Chon ewe mwichefel mi äsimaü lon pekin lükü ra pwapwa atun ra küna än ekkewe alüwöl me föpwül “manaueni ewe manauen let.” Ese wor aükükün watteen än ekkewe sam me in pwapwa lupwen ra küna sopwöchün ar älisi nöür kewe pwe repwe wiliti chon angang ngeni Jiowa!
5-8. Lein chokkewe mi angang weires fän iten pwiir kewe pokiten ar tong ngeniir me Jiowa, ikkena iir ekkewe elter mi säifetäl, elter lon ekkewe mwichefel, misineri, chokkewe mi angang lon ekkewe Bethel are keangen ofesilap, me ekkewe pioneer. Mi fich ach sipwe äppirü ar lükü, me älisiir lon ar angang.
9-12. Sipwe äppirü tuppwölün Temetrius, nge esap ewe chon pweni, Taiotrefis.
“OUPWE ISEIS PWISIN AMI LON EWE TONGEN KOT”
Juta a kapas ussun chokkewe mi ännifelong lon ewe mwichefel pwe iir “chon ngunungunungau, ra chok tapwelo mwirin pwisin ar kewe mochenia-ingau.” Ra “kapas pochokkul ren ar sikasini; ra michi aramas pwe letiper chok epwe pwonueta.”—Juta 4, 16, TF.
Ifa ussun Chon Kraist repwe ü ngeni ekkewe etipetip mi ngaü? Juta a makkei: “Oupwe chechemeni, ami mi achengicheng, ekkewe kapasen oesini me ren ekkewe chon kuno an ach Samol Jises Kraist.” A pwal apasa: “Oupwe iseis pwisin ami lon ewe tongen Kot.”—Juta 17-21, TF.
Pölüwen Kapas Eis Ussun Ekkeei Wokisin:
3, 4—Pwata Juta a pesei Chon Kraist ar repwe “maun fänäsengesin ewe lükülük”? Pun ‘ekkewe aramasangaü ra ännifelong lon ewe mwichefel.’ Chokkeei ra ‘siwili ewe tongen Kot pwe epwe wor ar kunetipingen pokiten ra föfföringaü.’
20, 21—Ifa ussun sipwe tongeni “iseis pwisin [kich] lon ewe tongen Kot”? Sia tongeni föri ena ren älillisin ekkeei ülüngät mettoch: (1) ren ach sipwe apöchökkülatä ach “lükülük mi unusen pin,” ren ach tinikken le käeö ewe Paipel me pwal ren ach achocho le fiffiti ewe angangen afalafal; (2) ren ach iotek “ren manamanen ewe ngünmifel,” weween, sipwe atipeeü ngeni manauach; me (3) ren ach anganga ach lükü än Jises we asorun möön kepich mi atufichi manau esemuch.—Jon 3:16, 36.
Ikkeei Ekkoch Lesen Fän Itach:
5-7. Ekkewe mi ngaü ra tongeni sü seni än Jiowa we kapwüng? Me ren ekkewe ülüngät kapasen öüröür Juta a eiteita, ese fokkun tufich.
8-10. Sipwe äppirü Maikiel ewe chonläng mi lapalap me pwäratä süföl ngeni ekkewe tettelin nemenem seni Kot.
12. Ekkewe chon rikilo mi elingepin lon ar tong, iir minen efeiengaü ngeni ach lükü ussun chök ekkewe faü fän säät ekkewe sip are chon tükken repwe tongeni feiengaü ren. Ekkewe sense chofona ra nikinikin kisäseü, nge ra ussun chök ekkewe kuchu ese wor konik lon pun esor ar älillis lon pekin lükü. Chokkana ra ussun chök ekkewe irä mi pwas, rese uwa. Repwe küna kitetter ussun chök ekkewe irä mi ütütä me le popun. Sipwe mirit ika sipwe ü ngeni ekkewe chon rikilo.
22, 23. Chon Kraist ra oput minne mi ngaü. Ren ar seläni “chokewe mi tipemwaramwar” seni mälofochofoch, ekkewe mi äsimaü lon ewe mwichefel, äkkäeüin ekkewe elter, repwe älisiir pwe repwe akkamwöchü ar lükü.
[Ekkewe sasing lón pekin taropwe 12]
Konik, ngün mi fel, me chcha ra pwäratä pwe “Jises i Nöün Kot”