Tumunu Pwe Sipwe Akkomwa Ekkewe Mettoch Mi Lamot!

Epwe fis mwich lepwinei, nge mei wor om angang. Met kopwe akkomwa?

EN emon mwan pupulu pwal emon sam. Sarin eu ranin angang weires, ka poputa le ekiek ussun an ewe mwichefel mwich lepwinei. Ika kopwe muttir feilo, epwe naf fansoun pwe kopwe tutu, siwili ufom kewe, me mongo ekis me mwen om kopwe feilo fiti ewe mwich. Nge iei, noum we pos a tingorek om kopwe angang overtime. A pwon ngonuk watte moni. Iwe, ka osupwang ren moni.

Are en emon fin pupulu me emon in. Atun om ammolnata ewe mongoon lekunion, ke kuna chommong uf esaamwo aien, nge ekkoch leir chon ewe famili repwe ufeni lesor. Ka eisini pwisin en, ‘Ika upwe fiti ewe mwich le pwinei, inet epwe wor ai fansoun aien?’ Pokiten ka koran poputa le angang lukun imwom we, ka kuna iei weiresin om apwonueta wisom lon imwom we me pwal angang lon pekin business.

Are en emon chon sukul. Lon ruumwom we, om chepel a ur ren minne kopwe kaeo fan iten lesor. Ka fen angei ekkena assignment seni chok me lom, nge kese fori, iwe, iei a fen tori ewe fansoun pwe ekkoch leir repwe wespok. Ka ekiekin tingorei semom me inom ika kopwe tongeni etiwalo ewe mwich fan iten om kopwe angang won om kkewe lesen seni sukul.

Menni leir en kopwe ita akkomwa: ewe angang fan iten noum pos, ewe angangen leimw, ekkewe lesen seni sukul, are ewe mwichefel we mwich? Lon pekin ngun, met weween ach sipwe akkomwa minne mi lamot? Ifa ekiekin Jiowa?

Ita Met Epwe Akkom?

Ekis chok fansoun mwirin ekkewe chon Israel ra angei ekkewe Alluk Engol, ra kuna pwe emon mwan a os mwuuch lon ewe Ranin Pin. Ei angang a wesewesen pin lon ewe Alluk. (Numperis 15:32-34; Tuteronomi 5:12-15) Ita ifa ussun kopwe apwungu ena mettoch? Ita kopwe omusalo tipisin ewe mwan pun ese angang fan iten an epwe pisekisekilo nge fan iten an epwe awora tufichin an famili? Kopwe ita ekieki pwe kopwe omusalo emonewe pun epwe wor chommong fansoun pwe epwe tongeni alleasochisi ewe allukun Ranin Pin, nge eni ese fori fan eu chok pokiten an tumunugau?

A chou an Jiowa ekiek ussun ei mettoch. Ewe Paipel a apasa: “Mwirin och fansoun, Jiowa a ereni Moses: ‘Ewe mwan epwe ninnilo.’” (Numperis 15:35) Pwata a pochokkul an Jiowa memeef ussun minne ewe mwan a fori?

Mei tufich ngeni ekkewe aramas ar repwe os mwuuch pwal fori ekkewe ekkoch angang fan iten aner mongo, ufer kewe, me imwer. Ewe efisuen ran epwe fan iten chok minne a lamot ngeni ar osupwang lon pekin ngun. Inaamwo ika ese ngau an aramas os mwuuch, nge a ngau ar repwe aea ewe fansoun ar repwe ita fel ngeni Jiowa pwe repwe fori pwal och mettoch. Inaamwo ika ekkewe Chon Kraist rese nom fan ewe Allukun Moses, nge ena poraus ese aiti ngenikich eu lesen ussun met sipwe alamota lon manauch ikenai?​—Filipai 1:10.

Mwirin ar feilfetal ukukun 40 ier lon ewe fonu poon, ekkewe chon Israel ra mmolneta fan iten ar repwe tolong lon ewe Fonu Pwon. Ekkoch leir ra fen chipwang le mongo ewe manna Kot a awora ngenir lon ewe fonu poon, iwe, ese mwaal ra pwapwaiti ar ekiekin siwilin aner mongo. Ren an epwe alisir pwe repwe eani ewe ekiek pwung atun repwe tolong lon ewe fonu mi “milik me chonun punoch,” Jiowa a achema ngenir: “Aramas resap manau ren chok pilaua, nge repwe manau ren ekkewe kapas meinisin mi towu seni auen Jiowa.”​—Ekistos 3:8; Tuteronomi 8:3.

Ekkewe chon Israel repwe angang weires fan iten ar “milik me chonun punoch.” Mei wor sounfiu repwe pworaiti, ekkewe imw repwe aueta, ekkewe malamal repwe atake. Iwe nge, Jiowa a alluku ngeni ekkewe aramas pwe repwe isetiu och fansoun iteiten ran pwe repwe ekiekifichi won ekkewe mettochun ngun. Repwe awora fansoun pwe repwe asukula nour kewe ussun alen Kot. Jiowa a apasa: “Oupwe aiti ngeni noumi kewe ekkeei kapas, oupwe fos ngenir lupwen oua mot lon imwemi pwal lupwen oua fetal won al, lupwen oua konolo pwal lupwen oua pwata.”​—Tuteronomi 11:19.

A alluku ngeni ekkewe mwan me at chon Israel meinisin me proselyte lon ewe fonu pwe fan ulungat iteiten ier repwe uta mwen mesen Jiowa. Pokiten ra silei pwe unusen ewe famili epwe kuna feioch seni ekkena fansoun, chommong mokuren famili ra akkota pwe puluer me nour kewe repwe etiir. Nge io epwe tumunu imwer kewe me ar kewe atake seni ekkewe chon oputer ika rese nom? Jiowa a pwonei: “Nge esap wor emon epwe mocheniaiti fonuemi, lupwen oupwe feilo fan ulungat lon eu ier.” (Ekistos 34:24) A lamot ekkewe chon Israel ar repwe luku pwe ika repwe akkomwa ekkewe mettochun ngun, resap lus lon pekin pisek. Jiowa a ita akkapwonueta an pwon ngenir? A fokkun apwonueta!

Kukkutta Akkom ewe Muu

Jises a aiti ngeni noun kewe chon kaeo lamoten ar repwe akkomwa ekkewe mettochun ngun mwen ekkewe ekkoch mettoch meinisin. Lon ewe Afalafal won ewe Chuuk, a fonou ekkewe chon auseling: “Oute aureki o apasa, ‘Meeta sipwe ani?’ are ‘Meeta sipwe unumi?’ are ‘Meeta sipwe ufeni?’ Nge oupwe kuttafichi lom an muu o an pwung, iwe, ekkeei [mettoch lon pekin aion mi lamot] mettoch meinisin repwap kapach ngenikemi.” (Mattu 6:31, 33) Ekis chok fansoun mwirin maloon Jises, ekkewe chon Kraist mi koran papataiselo ra alleasochisi ena kapasen emmwen. Chommong leir ir chon Jus are chon Jentail chon luku mi sai ngeni Jerusalem fan iten ar repwe fiti ewe fetelapen Pentekos lon 33 C.E. Atun ar nonnom, a fis minne rese ekieki epwe fis. Ra rongorong me nguuri ewe kapas allim ussun Jises Kraist. Lon ar mwasangasang me mochen kakkaeo ussun ar minefoon luku, ra nonnom lon Jerusalem. Iwe, a kisikisilo aner mongo, nge ekkewe mettoch lon pekin inis a chok lamot kisikis ngenir. Ra kuna ewe Messaia! Pwiir kewe Chon Kraist ra fangelo aner mongo pwe meinisin repwe tongeni sopweilo le “likiitu lon afalafalen ekkewe chon kuno . . . o pwal lon iotek.”​—Foffor 2:42.

Mwirin och fansoun, ekkoch Chon Kraist rese chuen meefi lamoten ar repwe fiffiti ekkewe mwich iteitan. (Ipru 10:23-25) Eni ekkoch ra poputa le chechei pisek, iwe, ra tunalo ekkewe mettochun ngun nge ra achocho chok fan iten lukulukochun moni fan iter pwal ar kewe famili. Mwirin an pesei chienan kewe chon luku ar resap etiwalo ekkewe mwich, ewe aposel Paul a makkei: “Tongei moni esap nonnom lon letipemi, nge ami oupwe menei minne mi nom remi, pun pwisin i a fen apasa, ‘Usap fokkun likitukelo, o usap fokkun poutukelo.’”​—Ipru 13:5.

A lamot watte an Paul we kapasen emmwen ngenir. Orun nimu ier mwirin an Paul makkei noun we taropwe ngeni ekkewe chon Ipru, ekkewe sounfiuen Rom fan nemenien Cestius Gallus ra pwellifeili Jerusalem. Ekkewe Chon Kraist mi tuppwol ra chechemeni an Jises we kapasen ourour: “Nge are oupwe kuna ewe [mettoch] . . . , emonewe a nom won sesarin won, esap totiu, are tolong lon imwan, pwe epwe angei och seni. Are emon a pwal nom le malamal, esap liwinsefal pwe epwe angei ufan.” (Mark 13:14-16) Ra fen silei pwe manauer esap alongolong won ar angang lon pekin sopai are pisekir kewe, nge epwe alongolong won ar alleasochisi an Jises kapasen emmwen. Ese mwaal, ir kewe mi apwonueta an Paul kapasen fon me akkomwa ekkewe mettoch ngun, ra kuna pwe a ekis mecheres ngenir ar repwe likitalo imwer kewe, ufer, me pisekir kewe mi auchea pwe repwe suri ewe chuuk, lap seni ir kewe resaamwo ngaselo seni ar tongen moni.

Ifa Ussun Ekkoch Ra Akkomwa Ekkewe Mettoch mi Lamot Ikenai

Ekkewe Chon Kraist mi tuppwol ikenai ra aucheani ar chiechifengen me pwiir kewe iteitan, iwe, chommong ra pennukuolo chommong mettoch fan iten ar repwe fiffiti ach kewe mwich. Lon ekkoch leeni, a chok wor ewe sokkun angang ikewe ie a kan sisiwil ar schedule iteitan. Emon brother a kan ereni chienan kewe chon angang pwe epwe wisen angang lon pwinin Ran Ammol atun chommong aramas ra efich ar repwe kukunou, ika repwe angang fan itan lon ekkewe pwinin an epwe fiffis ekkewe mwich. Pwal ekkoch brother lon ena esin angang ra fiffiti ekkewe mwich lon pwal eu mwichefel ika resap tongeni fiti pwisin ar kewe mwich. A ina ussun rese fokkun etiwalo och mwich. Emon fefin lon Canada mi keran poputa le kaeo a muttir esinna lamoten an epwe fiffiti ewe Theocratic Ministry School me Service Meeting, nge an schedule lon an angang a pinei an epwe fiffiti. Iwe, a pwisin moni emon chienan chon angang pwe epwe angang fan itan pwe epwe tongeni fiffiti ekkena mwich mi fokkun lamot.

Chommong mi uri semmwen watte rese fokkun mochen etiwalo ar kewe mwich. Ra auseling ngeni ewe program lon imwer won telephone are won teip ika resap tongeni feilo lon ewe Kingdom Hall. Ra pwarata pwe ra aucheani minne Jiowa a akkawora lon pekin ngun ren noun we “chon angang mi tuppwol o tipatchem”! (Mattu 24:45) Chon Kraist mi wisen tuttumunu semer kewe me iner ra meefi kilisou lupwen emon brother are sister epwe wisen nonnom ren ewe chinnap fan iten ewe chon tuttumunu epwe tongeni fiti ewe mwich.

Akkotaochu!

Ekkewe sam me in mi meefi ar osupwang lon pekin ngun repwe alisi nour kewe semirit ar repwe aucheani ekkewe mwich. Lap ngeni fansoun meinisin, repwe kutta pwe nour kewe repwe fori ar kewe lesen fan iten sukul atun a keran torir nge resap likitalo tori fansoun atapwalapwal. Lon ekkewe pwinin mwich, ekkewe semirit repwe fori ar angangen sukul atun repwe keran war me sukul. Rese mut ngeni ar kewe urumot are foffor ar repwe pinei ar repwe fiffiti ekkewe mwich.

En emon mwan pupulu me sam, ka kan alamota ami fiffiti mwich? En emon fin pupulu me in, ka kan akkota om kewe angang fan iten ami oupwe tongeni fiffiti ekkewe mwich iteitan? En emon sarafo, ka kan alamota ekkewe mwich lap seni om kkewe lesenin sukul are ka kan alamota om kkewe lesen lap seni ekkewe mwich?

Eu mwich lon ewe mwichefel, ina eu liffang mi kawor seni tongen Jiowa. Sipwe achocho ukukun ach tufich pwe sipwe fiffiti. Jiowa epwe efeiochuk ika kopwe akkomwa ekkewe mettoch mi lamot chapur!