“Iei Usun Letipom”

1. Pwata Jesus a “uren pwapwa” ren án Kot we manaman mi fel? (Ppii ewe sasing lepoputáán ei lesen.)

SÓTUN anchangei napanapen Jesus ewe atun a “uren pwapwa” ren án Kot we manaman mi fel. Neman a fókkun emelimel me an meseik a pwá me wóón mesan. Pwata? Pún i a kerán tinaló néún kewe 70a chón káé ar repwe afalafala ewe kapas allim usun ewe Mwúún Kot. Pokiten a wor manamanen chómmóng chón oputa ewe kapas allim, iwe, i a fókkun mochen silei ifa usun néún kewe chón káé repwe apwénúetá ewe wis a ngeniir. Ekkewe senseen allúk me Farisi mi fiti sukul tekia me tipachem iir ra kapachelong lein ekkena chón oput. Ra mochen pwe ekkewe aramas repwe eáni ewe ekiek pwe Jesus i chék emén chón táikú, me néún kewe chón káé iir aramas kisikis me iir ‘rese fiti sukul.’ (Föf. 4:13; Mark. 6:3) Iwe nge, lupwen ekkewe chón káé ra liwin seni ar féri wiser we, ra uren pwapwa. Ra afalafal inaamwo ika ra kúna koput, pwal mwo seni ekkewe chónláng mi ngaw! Pwata ra tongeni pwapwa me pwora?​—Álleani Lukas 10:1, 17-21.

2. (a) Ifa usun néún Jesus kewe chón káé ra usun semirit? (b) Met a álisi néún Jesus kewe chón káé ar repwe weweiti ekkewe pwóróus mi alóllóól lón Paipel?

² Jesus a ereni Jiowa: “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate. Ewer, Semei, pun iei usun ka pwapwaiti an epwe fis.” (Mat. 11:25, 26) Pwata Jesus a erá pwe néún kewe chón káé iir tipate are semirit? Pún iir ra usun semirit, ra tipemecheres le káé, me iir rese usun ekkewe senseen allúk me Farisi, ekkewe mi fiti sukul tekia me ekieki pwe iir mi tipachem. Ra káé ar repwe tipetekison, nge esap tipetekia. (Mat. 18:1-4) Pokiten iir mi tipetekison, Jiowa a álisiir ren an we manaman mi fel pwe repwe weweiti ekkewe pwóróus mi alóllóól lón Paipel. Nge ekkewe néúwisin lamalamen Jus mi tipetekia ra chun ren Satan me pwal ren pwisin ar lamalam tekia.

3. Met sipwe pwóróus wóón lón ei lesen?

³ Iwe, esap eú minen ámáirú ngenikich án Jesus a kon pwapwa! A pwapwa le kúna ifa usun Jiowa a pwáraaló ekkewe pwóróus mi alóllóól lón Paipel ngeni ekkewe mi tipetekison, ese lifilifil ika ifa úkúkún ar fiti sukul. Kot a tipeeú ngeni ei sókkun napanapen káit, me I ese siwil. Ifa usun a pwáraatá pwe a chúen tipeeú ngeni ei sókkun napanapen káit? Lón ei lesen, sipwe káé ifa usun Jiowa a áiti ngeni aramas mi tipetekison ikenái ekkewe pwóróus mi alóllóól lón Paipel.

ACH ÁWEWEEI PWÓRÓUS MI ALÓLLÓÓL NGENI MEINISIN ARAMAS

4. Ifa usun ewe esin Watchtower mi mecheres kapasen lón a usun eú liffang?

⁴ Lón ekkewe ier kukkuto chék, án Kot we mwicheich a alapaaló an menlapei an asukula aramas lón ewe napanap mi mecheres me fataffatéch. Sipwe pwóróus wóón úlúngát mettóch mi ánnetatá ena. Áeúin, a kawor ewe sókkun Watchtower mi mecheres kapasen lón.b Ina eú liffang mi álisi chómmóng aramas, kapachelong chókkewe mi weires ngeniir állea are fósun eú fénú. Ekkewe famili ra kúna pwe ena esin Watchtower mi mecheres kapasen lón a álisi néúr kewe le weweéchúti masouan. Chómmóng ra mak taropween kilisou ngeni ewe Mwichen Soupwúngúpwúng. Emén fefin Chón Kraist a erá pwe me mwan a kan niwokkus le uwawu meefian atun káéén Ewe Leenien Mas. Nge iei ese chúen! Mwirin katowuun ena esin Watchtower mi mecheres kapasen lón, iei met a apasa: “Iei, ua uwawu meefiei lap seni fán eú, me use chúen niwokkus! Ua kilisou ngeni Jiowa pwal ngenikemi.”

5. Ikkefa ekkóch feiéch seni ewe mineféén afféún New World Translation of the Holy Scriptures?

⁵ Oruuan, ewe Paipel New World Translation of the Holy Scriptures a wor minefé afféún mi katowu lón fósun Merika lón ewe October 5, 2013 atun eú mwich ach mwicheich a kan féri iteiten ier.c Lón chómmóng wokisin, a chókúkkúnúló ekkewe kapas, nge weweer ese siwil, me a mecheresiló ach weweitiir. Áwewe chék, lón Hiop 10:1 a wor 27 kapas lón, nge iei a chék wor 19, me lón Än Salomon Fos 8:6 a wor 20 kapas lón, nge iei a chék wor 13. Iir me ruu ekkena wokisin ra fataffatéchúló. Emén Chón Kraist mwán mi kepit mi angang ngeni Jiowa fán tuppwél ren fite fite ier, a erá, “Ua kerán álleani ewe puken Hiop lón ewe mineféén afféún Paipel, me ua meefi pwe usun ua kerán weweiti iei!” A pwal ina usun meefien chómmóng.

6. Met meefiom ren ewe mineféén áweween Mateus 24:45-47 mi ffatéchúló?

⁶ Aúlúngátin, ekieki usun ekkewe mineféén áweween ekkóch wokisin mi ffatéchúló. Áwewe chék, lón Ewe Leenien Mas minen July 1, 2013, a ffatéchúló áweween “ewe chon angang mi allükülük o tipachem.” (Mat. 24:45-47) A áweweei pwe ewe chón angang mi alúkúlúk a wewe ngeni ewe Mwichen Soupwúngúpwúng. Nge ekkewe pwal ekkóch “chon angang,” ikkena iir meinisin chókkewe mi angei ener mwéngé seni ewe chón angang mi alúkúlúk, weween pwe ekkewe mi kepit me pwal ekkewe ‘ekoch sip.’ (Joh. 10:16) Sia pwapwaiti ach káé usun ekkeei pwóróus mi enlet me sia pwapwa le asukula ngeni aramas! Nge ikkefa pwal ekkóch mettóch mi pwáraatá pwe Jiowa a tipeeú ngeni káit mi mecheres me ffat?

A MECHERESILÓ ÁWEWEEN EKKEWE PWÓRÓUS LÓN PAIPEL

7, 8. Ikkefa ekkóch pwóróus lón Paipel mi liosuetá ekkóch mettóch mi watte lamoter repwap fis mwirin?

⁷ Ika ka fen angang ngeni Jiowa ren fite fite ier, iwe neman ka kúna och siwil lón napanapen án néúch kewe puk áweweei ekkóch pwóróus lón Paipel. Me mwan, ra kan erá pwe ekkóch pwóróus ra liosuetá och mettóch mi watte lamotan epwap fis mwirin. Ewe pwóróus mi fis lón Paipel sia kan eita ngeni och minen lios. Nge minne a weneiti mwirin sia erá a liosutiw ren ewe pwóróus. Mi wor popun ach eáni ei sókkun áwewe? Ewer. Áwewe chék, Jesus a fós usun ewe “manaman mi fis ngeni ewe soufos Sona.” (Álleani Mateus 12:39, 40.) Jesus a áweweei pwe ewe fansoun Sona a nónnóm lón luken ewe iik a liosuetá ewe fansoun Jesus epwe nónnóm lón peiasan.

⁸ A pwal wor ekkóch pwóróus lón Paipel mi liosuetá ekkóch mettóch repwap fis mwirin. Ewe aposel Paulus a áweweei ekkóch me leir. Áwewe chék, án Apraham riri ngeni Hakar me Sara a liosuetá án Jiowa riri ngeni ewe mwúún Israel me kinikinin án Kot we mwicheich lón láng. (Kal. 4:22-26) Pwal ina chék usun, ewe imwenfel mangaku, ewe imwenfel, ewe Ránin Ácháchá (Ránin Asoren Omusomusen Tipis), ewe souasor mi lap, me pwal ekkóch kinikinin ewe Allúk, iir “chök ngünüen ekewe mettoch mi mürina repwe feito.” (Ipru 9:23-25; 10:1) Ach lúkú a kan péchékkúleló lupwen sia káé ekkeei pwóróus seni Paipel me minne ra liosuetá. Iwe nge, itá iteiten aramas, féffér, me mettóch lón Paipel ra liosuetá emén are och mettóch?

9. Me mwan, ifa usun sia kan áweweei pwóróusen Napot?

⁹ Me mwan, néúch kewe puk ra kan áweweei pwe iteiten aramas, féffér, are mettóch lón ekkóch pwóróus lón Paipel ra liosuetá emén are och mettóch. Áwewe chék, ewe kiwin mi ngaw itan Isipel a akkóta án Napot epwe ninniiló pwe pwúlúwan we, Ahap, epwe tongeni eáni an we tánipiin kreip. (1 King 21:1-16) Lón ewe ier 1932, The Watchtower a áweweei pwe Ahap me Isipel ra liosuetá Satan me an we mwicheich, nge Napot a liosuetá Jesus, me málóón Napot a liosuetá ninniilóón Jesus. Iwe nge, lón 1961, ewe puk “Let Your Name Be Sanctified” (“Itom Epwe Pin”) a erá pwe Napot a liosuetá ekkewe mi kepit, nge Isipel a liosuetá ekkewe tipitipin lamalamen Chón Kraist. A pwal erá pwe án Isipel eriáfféúmwááli Napot a liosuetá án ekkewe mi kepit kúna riáfféúmwáál lón ekkewe ránin lesópwólóón. Ren fite fite ier, ekkena áwewe ra apéchékkúla án néún Kot aramas lúkú. Iwe, pwata a sókkóló ach áweweei mettóch lón ei fansoun?

10. (a) Ifa usun a lapóló án ewe chón angang mi alúkúlúk túmúnúéch lupwen a áweweei weween ekkóch pwóróus lón Paipel? (b) Met néúch kewe puk ra kan menlapei ikenái?

¹⁰ Lón ekkewe ier, Jiowa a ákkálisi ewe “chon angang mi allükülük o tipachem” an epwe tipachemeló me alapaaló an túmúnúéch. Ifa usun? Iei, ewe chón angang mi alúkúlúk a túmúnúéch ren an erá pwe och pwóróus lón Paipel a minen lios ika pwe a chék wor eú popun mi ffat lón Paipel an epwe erá ena. Ekkóch ekkewe áweween pwóróus lón Paipel usun minen lios me met ra liosuetá, a weires ach sipwe weweiti, chechchemeni, me apwénúetá lón manawach. Nge ewe mettóch mi alólilen seni ena, lupwen sia kon nefotofot wóón met ekkewe pwóróus lón Paipel ra tongeni liosuetá, iwe, sisap liapeni ekkewe lesen sia tongeni káé seni. Iwe, ikenái néúch kewe puk ra kon menlapei ekkewe lesen mi mecheres me álilliséch, ra fós usun lúkú, likiitú, tuppwél ngeni Kot, me pwal ekkóch napanap sia tongeni káé seni ekkewe pwóróus lón Paipel.d

11. Ikenái, ifa usun sia weweiti ewe pwóróus usun Napot, me ifa usun an leenien áppirú a álisikich?

¹¹ Iei, ach weweiti ewe pwóróus usun Napot a ffatéchúló me mecheresiló. Napot ese ninniiló pokiten a liosuetá Jesus are ekkewe mi kepit. Nge a máló pokiten a akkamwéchú an tuppwél ngeni Kot. A ákkálleasochisi án Jiowa Allúk inaamwo ika a kúna watteen riáfféúmwáál seni emén sou nemenem mi watte manamanan. (Num. 36:7; 1 King 21:3) A fókkun múrinné an leenien áppirú ngeni meinisin néún Kot kewe chón angang ikenái, iir kewe neman repwe pwal kúna riáfféúmwáál. (Álleani 2 Timoty 3:12.) Meinisin Chón Kraist ra tongeni weweiti, chechchemeni, me apwénúetá ena lesen mi apéchékkúlaló ar lúkú.

12. (a) Met itá sisap ekieki ren ekkewe pwóróus lón Paipel? (b) Pwata sia tongeni eáni áwewe mi fataffatéch pwal mwo nge usun ekkewe mettóch mi alóllóól? (Ppii ewe footnote.)

¹² Itá sipwe ekieki pwe ekkewe pwóróus lón Paipel iir mi álilliséch ngenikich nge esap pwal wor och mettóch ra weneiti? Aapw. Nge iei néúch kewe puk ra kan menlapei ifa usun eú pwóróus lón Paipel a weneiti pwal eú pwóróus, nge rese kon áweweer pwe iir minen lios. Áwewe chék, án Napot tuppwél inaamwo ika a kúna riáfféúmwáál me máló, a áchema ngenikich tuppwélún Kraist me ekkewe mi kepit. Iwe nge, sia pwal tongeni chechchemeni tuppwélún chómmóng me lein ekkewe ‘ekoch sip.’ Sia tongeni kúna ifa usun Jiowa a asukulakich lón ewe napanap mi mecheres.e

A MECHERESILÓ ÁWEWEEN ÁN JESUS KEWE KAPAS ÁWEWE

13. Ikkefa ekkóch kapas áwewe mi ánnetatá pwe iei a mecheresiló me ffatéchúló ach áweweer?

¹³ Jesus Kraist, i ewe Sense mi lap seni meinisin mi manaw wóón fénúfan. I a sani le áeá kapas áwewe lón an angangen afalafal. (Mat. 13:34) Kapas áwewe ra kan álilliséch pokiten ra áweweei ekkewe pwóróus mi alóllóól lón eú napanap mi mecheres. Ra álisikich le anganga ach tufichin ekiek me ra tongeni achchúngú letipach. Lón ekkewe ier, lón néúch kewe puk a mecheresiló me ffatéchúló áweween án Jesus kewe kapas áwewe. Áwewe chék, Ewe Leenien Mas minen July 1, 2008, a álisikich le weweéchúti án Jesus kewe kapas áwewe usun ewe iis, ewe féún sinapi, me ewe chew. Iei sia tongeni kúna pwe ekkena kapas áwewe ra weneiti án Kot we Mwú me a amwarar feffeitáán an ionifengeni ekkewe repwe tapweló mwirin Kraist seni lón ei fénúfan mi ngaw.

14. (a) Ifa usun sia kan áweweei ewe kapas áwewe usun ewe re Samaria mi kirekiréch? (b) Ikenái ifa usun sia weweiti án Jesus we kapas áwewe?

¹⁴ Nge ifa usun sipwe weweiti ekkewe kapas áwewe mi tichik pwóróusan Jesus a eáni? Ekkóch me leir oesini are ra masou ren minen lios. Ekkóch ra menlapei ekkewe lesen mi álilliséch. Nge ifa usun sipwe esiller? Ló, ló, ló, pélúwan a ffatéchúló. Áwewe chék, ekieki ifa usun sia kan áweweei án Jesus we kapas áwewe usun ewe re Samaria. (Luk. 10:30-37) Lón 1924, The Watch Tower a erá pwe ewe re Samaria a wewe ngeni Jesus me ewe al mi panetiw seni Jerusalem ngeni Jeriko a liosuetá ngangngawolóón nónnómun aramas seni ewe fansoun a fis angangen ú ngeni Kot lón Eten. Ekkewe chón solá wóón ewe al ra liosuetá ekkewe watteen kompeni me ekkewe chón sopai mi tipemmóng, nge ewe souasor me ewe chón Lefi ra liosuetá ekkewe tipitipin lamalamen Chón Kraist. Nge ikenái, néúch kewe puk ra áeá ena kapas áwewe ren ar repwe áchema ngeni meinisin Chón Kraist pwe a lamot resap lifilifil aramas. Sipwe álisi meinisin mi osupwang, ákkáeúin ren ach álisiir le káé ewe enlet usun Kot. Sia kan pwapwa lupwen sia kúna án Jiowa affata ewe enlet.

15. Met sipwe káé lón ewe lesen mwirin ei?

¹⁵ Lón ewe lesen mwirin ei, sipwe káé usun án Jesus we kapas áwewe usun ekkewe engol fépwúl. (Mat. 25:1-13) Ifa usun Jesus a mochen ekkewe chón tapweló mwirin lón ekkeei ránin lesópwólóón repwe weweiti ena kapas áwewe mi kkóló amwararan? Itá iteiten aramas, mettóch, are féffér lón ena kapas áwewe ra liosuetá emén are och mettóch mi watte lamotan epwap fis mwirin? Are, i a mochen ach sipwe káé lesen seni mi álilliséch ngenikich lón ekkeei ránin lesópwólóón? Sipwap kúna me lón ewe lesen mwirin ei.