Pwata me Ineet Emén Fefin Chón Kraist Epwe Pwélú Mékúran?

Me ren ewe Paipel, ineet me pwata emén fefin Chón Kraist epwe pwélú mékúran? Sipwe pwóróus wóón met ewe aposel Paulus a makkeei fán emmwenien ewe manaman mi fel usun ena mettóch. A awora ewe kapasen emmwen mi lamot ngenikich pwe sipwe kefiléch wóón ekkewe kefil mi elingaaló Kot. Lón 1 Korint 11:3-16, Paulus a affata ruu mettóch sipwe ekiekiéchú: (1) atun emén fefin Chón Kraist epwe pwélú mékúran me (2) popun an apwénúetá ena emmwen.

Atun emén fefin Chón Kraist epwe pwélú mékúran. Paulus a fós usun ruu fansoun: iótek me angangen pwáraatá met mi monomon are oesini. (Wokisin 4, 5) Iótek ina ewe atun sia fós ngeni Jiowa fán súfél. Lón ei fansoun, ewe angangen oesini a weneiti ewe sókkun asukul seni Paipel emén Chón Kraist chón afalafal a féri. Paulus a itá apasa pwe emén fefin epwe pwélú mékúran iteiten a iótek are asukula aramas ewe enlet seni Paipel? Aapw. Nge a wor atun mi lamot an epwe pwélú mékúran.

Paulus a apasa ineet ewe atun mi lamot án emén fefin Chón Kraist epwe pwélú mékúran lón famili me lón mwichefel. A apasa: “Mwän möküren fefin. . . . Nge are eman fefin epwe iotek ika pwärätä met mi monomon lon imwenfel, nge esap pwölüela möküran, neminei a aitengaua pwülüan möküran we.” (Wokisin 3, 5) Lón ewe kókkótun famili, Jiowa a ewisa ngeni ewe mwán pwe epwe mékúren ewe fefin. Epwe tongeni ásááwa pwúlúwan we ika epwe wisen féri met úrúrún wisen ewe mwán me ren Jiowa chilóón chék ika epwe pwáraatá súfél ngeni án pwúlúwan we nemenem. Áwewe chék, ika a lamot ngeni ewe fefin an epwe emmweni eú káéén Paipel nge pwúlúwan we mi rong me kúna, epwe pwáraatá pwe a súféliti án pwúlúwan we nemenem ren an epwe pwélú mékúran. Epwe féri ena inaamwo ika pwúlúwan we mi papatais are ese, pokiten ewe mwán i mékúren ewe famili.a Ika ewe fefin epwe iótek are káé ngeni emén nge néún we kúkkún át mi papatais a rong me kúna, iwe epwe pwal pwélú mékúran, esap pokiten ewe nau i mékúren ewe famili, nge pokiten an pwáraatá súfél ngeni pún i emén me lein ewe mwichen mwán mi papatais lón ewe mwichefelin Chón Kraist.

Paulus a apasa eú mettóch mi weneiti ewe mwichefel: “Nge are eman a mochen anini won ekei mettoch, üa chök tongeni apasa, pwe äm me ekewe mwichefelin Kot esap wor rem och sokun lapalap ika örüni.” (Wokisin 16) Ewe wis mékúren lón ewe mwichefelin Chón Kraist, ina wisen ekkewe mwán mi papatais. (1 Timoty 2:11-14; Ipru 13:17) Ekkewe chék mwán ra wisen chónálillisin mwichefel me mwán mi ásimaw, kapachelong ewe angang me ren Kot ar repwe túmúnú néún kewe siip. (Föför 20:28) Fán ekkóch, epwe wor atun pwe emén fefin Chón Kraist epwe féri eú wis ekkewe mwán mi papatais mi kefilitá me ren ewe mwichen mwán mi ásimaw ra eáni. Eli epwe lamot án neminna epwe wisen emmweni eú mwich fán iten ewe angangen afalafal pokiten ese nóm ewe mwán mi papatais mi kefilitá me ren ewe mwichen mwán mi ásimaw. Are neminna epwe káé Paipel ngeni emén nge emén mwán mi papatais a fiti. Pokiten ekkena mettóch iir wesewesen kinikinin án ewe mwichefelin Chón Kraist angangen asukul, iwe epwe pwélú mékúran pwe epwe pwáraatá pwe a féri eú wis itá úrúrún wisen emén mwán mi papatais.

Nge sap minne emén fefin Chón Kraist epwe pwélú mékúran lón meinisin kinikinin an fel ngeni Jiowa. Áwewe chék, esap pwélú mékúran ika a uwawu meefian lón án Chón Kraist kewe mwich, fiti pwúlúwan we are pwal emén mwán mi papatais lón ewe angangen afalafal imw me imw, me káéfengen are iótekfengen me néún kewe rese papatais. Mi pwal wor ekkóch kapas eis repwe piitá, nge ika neminna a tipemwaramwar ren, iwe epwe tongeni kúttafichi pwal ekkóch pwóróus.b Nge ese wor ngawen an epwe pwélú mékúran ika mi chúen tipemwaramwar me ese osukosuk mwelien letipan ren usun met ewe lios a áiti ngenikich.

Popun án emén fefin Chón Kraist apwénúetá ena emmwen. Lón wokisin 10, TF, sia kúna ruu popun án emén fefin Chón Kraist epwe apwénúetá ewe emmwen: “Mi chok murinno ngeni fefin pwe epwe wor esisinen nemenem won mokurer, pokiten ekkewe chonlang.” Áeúin popun, a pwá ren ewe kapas “esisinen nemenem.” Án neminna pwélú mékúran a pwáraatá pwe a mirititi ewe nemenem Jiowa a ewisa ngeni ekkewe mwán mi papatais lón ewe mwichefel. Ina popun a pwári an tongei me tuppwél ngeni Jiowa Kot. Oruuen popun, a pwá ren ewe kapas “pokiten ekkewe chonlang.” Ifa usun án emén fefin pwélú mékúran a tongeni kkúú ekkewe chónláng mi manaman?

Ekkewe chónláng ra pwapwa le kúna pwe án Jiowa mwicheich lón láng me wóón fénúfan ra súféliti an kókkótun nemenem. Ra pwal kúna álillis seni án ekkewe aramas rese unuséch leenien áppirú súféliti ena kókkót. Pún pwal mwo nge ekkewe chónláng a lamot ar repwe onómu pwisin iir fán án Jiowa kókkót, nge ekkóch me leir me lóóm rese féri ena. (Jutas 6) Lón ei fansoun, ekkewe chónláng ra tongeni kúna atun emén fefin Chón Kraist a kon lipwákéch, silelap, me tipachem seni emén mwán mi papatais lón ewe mwichefel, nge a tipemecheres le onómu pwisin i fán emmwenian. Ika ewe fefin i emén Chón Kraist mi kepit, iwe epwe wiliti emén me lein chienen Kraist chón álemwir. Epwe wiseni eú wis mi lap seni wisen ekkewe chónláng me epwe nemenem ren Kraist lón láng. A ifa me múrinnéén ena leenien áppirú ekkewe chónláng ra kúna iei! A ifa me échún ewe tufich ekkewe fefin Chón Kraist ra eáni le álleasochis fán tipetekison ren ar tuppwél me onómu pwisin iir mwen mesen ekkewe million chónláng mi tuppwél!