Kot A Mochen Ririéch Ngonuk

POPUN EKKÓCH RA TIPEMWARAMWAR: Chómmóng aramas mi lúkú Kot ra meefi pwe I a towau seniir. Iei meefien Christina, emén fin Ireland mi fiffiti fál iteiten wiik: “Me rei, Kot, i ewe chék emén a fératá mettóch meinisin, nge use silei I. Esap fán eú ua meefi pwe I chiechiei.”

MET ÁN KOT WE KAPAS A APASA: Lupwen sia meefi pwe sia fen towauoló seni Jiowa, Jiowa ese fangetá, a chúen mochen álisikich. Jesus a áweweei án Kot túmúnúkich, a erá: “Are eman aramas a nöüni ipükü sip, nge eman leir a mwalechela, ifa usun, esap likiti ekewe tiwe me tiweman won ekewe chuk pwe epwe feila o kütta ewe eman mi mwalechela?” Ifa ewe lesen? “Iei usun Semei lon läng esap mochen pwe eman lein ekei kükün epwe mwalechela.”​—Mateus 18:12-14.

Emén me emén ‘lein ekana kükün ’ a aúchea ngeni Kot. Ifa usun Kot a “kütta ewe eman mi mwalechela”? Me ren ewe wokisin lepoputáán ei lesen, Jiowa a kan panato aramas ngeni pwisin i.

Nengeni ifa usun Kot a akkomw mwékút me panato ngeni i ekkewe aramas mi letip wenechar. Lón fansoun ekkewe aposel, Kot a tinaló ewe Chón Kraist itan Filip an epwe chuuri ewe néúwis seni Itiopia me áwewe ngeni weween ewe oesini lón Paipel ena re Itiopia a álleani. (Föför 8:26-39) Mwirin, Kot a éúréúra aposel Petrus an epwe feiló lón imwen ewe meilapen soufiu itan Kornelius, ewe a fen ikkiótek ngeni Kot me a mochen fel ngeni I. (Föför 10:1-48) Kot a pwal emmweni aposel Paulus me chienan kewe ngeni eú chénúpupu lúkún ewe telinimw Filipi. Me ikena ie, ra chuuri emén fefin itan Litia, i “a fel ngeni Kot,” me Jiowa “a suki lelukan pwe epwe rongosochis ngeni än Paulus afalafal.”​—Föför 16:9-15.

Lón eú me eú ekkena pwóróus, Jiowa a túmúnú pwe epwe suuk ngeni chókkewe mi kútta i alen ar repwe silei i. Ikenái, ié kewe ra kan chuuri aramas lón imwer me lón ekkewe leeni ia a kan wor aramas ie pwe repwe áiti ngeniir ewe pwóróus lón Paipel usun Kot? Chómmóng repwe apasa, “Ekkewe Chón Pwáraatá Jiowa.” Pwisin eisinuk, ‘Itá Kot a néúnéú iir pwe repwe álisiei an epwe wor ai ririéch ngeni i?’ Ám aua peseok óm kopwe iótek ngeni Kot an epwe álisuk pwe kopwe etiwa an panukoto ngeni pwisin i.a