Met Lamoten Ai Upwe Chúen Manaw?

IKA ka chuuri Diana,a kopwe kúna pwe i emén fépwúl mi fókkun chiechiéch ngeni aramas me tipachem. Inaamwo ika a ina usun, nge a wor och memmeefin letipengaw a kan ámmeef ngeni pwe ese wor lamoten manawan. A tongeni fis lón úkúkún fitu rán, wiik me pwal mwo nge fitu maram. Iei alon: “Iteiten rán ua chék ekieki pwe ua mochen máló. Ua fókkun lúkú pwe ewe fénúfan epwe múrinné ika use chúen nóm.”

Diana a apasa pwe ese fókkun tongeni pwisin nieló. Nge fán ekkóch a meefi pwe ese wor popun an epwe chúen manaw. Iei alon: “Ua fókkun áneán pwe upwe máló lón ákseten. Me rei máló fen chienei nge esap chón koputei.”

Chómmóng aramas ra tongeni weweiti meefien Diana kana, ekkóch me leir ra fen piin ekiekin are piin sótuni le pwisin nireló. Iwe nge, ekkewe sousile ra apasa pwe lap ngeni ekkewe aramas mi sótuni le pwisin nireló rese fókkun mochen asopwaló manawer nge ra chék mochen ngas seni ar riáfféú. Weween pwe ra lúkú pwe mi wor popun ar repwe máló nge ren enletin a lamot popun repwe meefi pwe mei wor aúchean ar repwe manaw.

Met lamoten óm kopwe chúen manaw? Ekieki úlúngát popun kopwe mochen manaw.