3 | Kúna Álillis Seni Pwóróusen Aramas lón Paipel

PAIPEL A FÓS USUN . . . Ekkewe mwán me fefin mi tuppwél mi eáni ewe esin memmeef sia pwal eáni.—JAMES 5:17.

Met Weween Ena?

Ewe Paipel a masou ren pwóróusen manawen ekkewe mwán me fefin mi eáni sókkopaten memmeef. Atun sia álleani pwóróuseer, eli sipwe kúna pwe emén me leir a meefi ewe esin memmeef sia pwal meefi.

Ifa Usun A Tongeni Álisikich?

Kich meinisin sia mochen pwe ekkewe ekkóch repwe weweiti meefiach. Nge a ákkáeúin lamot ena atun sia weires ren an úrikich semwenin ekiek. Atun sia álleani ewe Paipel, sipwe kúna pwóróusen chókkewe ar ekiek me memmeef mi usun chék ach. Iwe, sipwe kúna pwe a pwal wor ekkóch mi kúna riáfféú usun chék kich me sise chék áláemén lón ach weires ren aúrek me memmeef ese pwúng.

A mak lón ewe Paipel chómmóng meefien chókkewe mi meefi weires me riáfféú. Ka fen piin ekieki, ‘Use chúen tongeni likiitú’? Ina met Moses, Elias, me Tafit ra meefi.—Numperis 11:14; 1 King 19:4; Kölfel 55:4.
Ewe Paipel a pwal áiti ngenikich pwóróusen emén fefin itan Hana mi ‘fokun weires lon letipan’ pokiten ese tongeni néúnéú, me a kúna esiit me koput ren ena seni pwúlúwen pwúlúwan we.—1 Samuel 1:6, 10.
Ewe Paipel a áiti ngenikich pwóróusen emén mwán itan Hiop, emén eli sia tongeni weweiti meefian. Inaamwo ika a péchékkúl an lúkú Jiowa, nge a kúna watteen riáfféún letipan, me iei met a apasa lón eú atun: “Üa anioputa manauei, üsap chüen mochen manau.”—Hiop 7:16.

Ach silei ifa usun ekkena aramas lón Paipel ra sópwéch lón ar úppós fán ekiek ese pwúng, a pwal apéchékkúlakich le úppós fán ach kewe weires.

Usun Álilliséchún ewe Paipel—Kevin

Usun án ewe Semmwen Bipolar Disorder Áweiresiei

“A úriei eú semmwen itan bipolar disorder atun a arapakkan nime ieri. Fán ekkóch, ua meefi pwe usun itá ua tongeni pworacho ngeni ese lifilifil osukosuk epwe toriei. Nge fán ekkóch, ua meefi pwe usun ese wor lamoten ai upwe pwal manaw.”

Usun án Paipel Álisiei

“Meefien emén lón Paipel ua tongeni meefieni, ina meefien aposel Petrus. Minne a mwáálliló wóón a efisi an epwe meefi pwe ese wor aúchean. Petrus ese sópweló le eáni ena esin ekiek, nge a fen chiechi ngeni chókkewe mi chúngú i. Atun ua weires ren ai na semmwen bipolar disorder, iwe ai kewe apwangapwang ra akokaeitiw me efisi ai upwe meefi pwe ese wor aúcheai. Ua áppirú Petrus, ua káé ai upwe pacheéch ngeni chiechiei kewe mi mochen álisiei ai usap fangetá.

“Pwal eú pwóróus lón Paipel mi fókkun oururuei, ina pwóróusen King Tafit. Fán chómmóng a meefi letipechou ren met a fis ngeni me a niamam ren an kewe tipis. Ua tongeni meefi meefian pokiten fán ekkóch ua pwal féri me apasa ekkewe mettóch ua niamam rer me mwirin. Ua kúna oururun letipei seni alon Tafit ei lón Kölfel 51. Lón wokisin 3, Tafit a apasa: ‘Üa mefi ai pupungau, nge ai tipis a nonom fochofoch fän mesei.’ Ena wokisin a fókkun áweweei meefiei atun ua fókkun letipechou me atun a weires ai upwe eáni ekiek mi pwúng usui. Nge ua pwal meefi meefien Tafit lón ei wokisin 10: ‘Ai Kot, kopwe föri loi eu leluk mi limöch o fangelong loi eu ngün mi fö o pos.’ Ua pwal eáni ena esin tingor ngeni Kot an epwe álisiei le eáni ekiek mi pwúng usui. Sáingolóón, wokisin 17 a oururuei. A apasa: ‘Eu leluk mi tipetekison o liamam, en kosap oput.’ Ena wokisin a alúkúlúkú ngeniei pwe Kot a tongeei.

“Ua apéchékkúlaló ai ápilúkúlúk fán iten mwachkkan ren ai nefótófót wóón pwóróusen ekkewe aramas lón Paipel, me met Kot a fang ngeniei lón ei fansoun. Ina popun ua meefi pwe ekkewe pwon lón ewe Paipel iir wesewesan, me ra fókkun álisiei le likiitú.”