ᏙᎯᏳ ᎡᎵᏭ ᎯᏯᎵᏍᎦᏍᏙ ᏣᏁᎳᏅᎯ!
“ᏌᏭ ᎤᏁᎳᏅ ᏂᎦᏓ ᏴᏫ ᏚᏬᏢᏁ.”—JOSEPH ᏗᏘᏂᏙ
1879, ᏄᎾᏓᎴ ᎠᏂᏐᎢ ᎠᏂᏴᏫᏯ Nez Percé ᏧᎾᏙᎢᏛ Joseph Ꮎ ᏗᏘᏂᏙ ᎯᎠ ᏁᎵᏍᎨ: ‘ᏓᎩᏯᏪᎪ ᏂᎦᎥ ᏩᏥᏅ ᎠᏥᎪᎥᏍᎨ Ꮭ ᎫᏍᏗ ᏱᎬᏙᏗ ᎧᏁᎬ.’ ᎢᎦ Ᏺ ᎦᎨᏛ ᎤᏓᏅᏖ ᎠᏅᏓᏗᏍᎨ ᎠᎦᏥᎪᎥᏁᎸ ᎠᎦᏚᎢᏍᏓᏁᎸ.
ᎤᏂᎪᏛ ᏧᎾᏓᎴᏅᏛ ᎠᏂᏴᏫᏯ ᎠᏁᎲ ᎤᎾᏚᎵ ᎩᎶ ᎤᏂᏩᏛᏗ ᎬᏩᎾᎵᏍᎦᏍᏙᏗ ᎨᏒ. Lone Man ᏧᏙᎢᏛ, ᎾᎿ ᎠᏂTeton Sioux ᎯᎠ ᏄᏪᏎ: “ᎠᏆᏙᎴᎰᏒ ᎢᏳᏍᏗᏮ ᎨᏒ ᏴᏫ ᎢᏯᏛᏁᏗ Ꮭ ᎡᎵ ᏂᎦᎥ ᎤᏩᏒ ᎤᏓᎵᏍᎦᏍᏙᏗ ᏱᎩ.”
ᎦᎲ ᎡᎵᏭ ᏙᎯᏳ ᎬᏰᏓᎵᏍᎦᏍᏙᏗ? ᎤᏁᎳᏅᎯ Ꮫ ᎤᏩᏒ!
ᏌᏭ ᎯᎠ ᎦᏰᎪᎩ ᏂᎨᏒᎾ
ᎢᎦᏁᎳᏅᎯᎮᏃ ᏴᏫ ᏚᏁᏤᎴ, ᎤᏁᏨ Ꮓ ᏕᎪᏪᎸ, ᏧᎭᎨᏛ ᏕᎪᏪᎸ ᎠᏃᏎᎰ. (ᏗᎹᏗ ᏔᎵᏁ ᎠᎪᏪᎳᏁᎸᎯ 3:16, 17) ᎤᏁᎳᏅ ᎤᏁᏨ ᎯᎠ ᏄᏪᏎ, ᎢᏳᏍᏗᏮ ᎨᏒ ᏂᎦᏛ ᎢᏤ ᏅᏛᎬᏁᎵ. (ᏈᏓ ᏔᎵᏁ ᎤᏬᏪᎳᏅᎯ 3:13) Ꮭ ᎸᎯᏳ ᏳᏩᎨᏫᏍᎪ ᏄᏍᏛ ᎤᏁᏨ ᎢᏯᏛᏁᏗ. ᏉᎳ ᎤᏬᏪᎳᏅ ᎯᎠ ᏂᏚᏪᏎᎴ: “ᎤᏁᎳᏅᎯᏰᏃ ᎥᏝ ᏂᏚᏳᎪᏛᎾ ᎢᎬᏩᏛᏁᏗ ᏱᎩ ᎾᏍᎩ ᎤᏩᎨᏫᏍᏗᏱ ᏕᏥᎸᏫᏍᏓᏁᎸ ᎠᎴ ᎬᏂᎨᏒ ᏂᏨᏁᎸ ᎢᏥᎨᏳᏒ ᏕᎤᏙᎥᎢ.” (ᎠᏂᏈᎷ ᏧᏬᏪᎳᏁᎸᎯ 6:10) Joseph ᏗᏘᏂᏙ ᏍᎩ ᏄᏪᏎ: “ᎪᎨᏲᏅ ᎰᏩ ᏱᎨᎵᏍᏗ ᎤᏁᎳᏅ ᎢᏳᏍᏗᏮ ᎨᏒ ᎠᎪᏩᏘᎰ ᏃᎴ ᎠᏛᎩᏍᎪ ᏃᎴ Ꮭ ᎸᎯᏳ ᏳᏩᎨᏫᏐ.”
ᎤᏁᎳᏅ ᏂᎪᎯᎸ ᏙᏛᏅᏓᏗ ᏴᏫ ᎤᏛᏁ. ᎼᏏ ᎤᏬᏪᎳᏅ, ᎯᎠ ᏄᏪᏎ: “ᏱᎰᏩ ᎤᏁᎳᏅᎯ ᏥᏚᏬᏢᏁ ᎡᎶᎯ ᏃᎴ ᎦᎸᎶᎢ.” (ᎼᏏ ᎢᎬᏱᏱ ᎤᏬᏪᎳᏅᎯ 2:4) ᎢᎦᏁᎳᏅ ᎤᏩᏒ ᏚᏓᏙᎡ, ᏱᎰᏩ ᎮᏃ ᏚᏓᏙᎡ ᎡᎶᎯ ᎤᏬᏢᏁ. ᏱᎰᏩ ᏚᏙᎥ ᎯᎠ ᎦᏛᎬ “ᏂᎬᏂᏏᏍᎪ ᎢᏳᎵᏍᏙᏗ” ᎯᎠ ᏥᏂᎬᏅ ᏚᏙᎥ ᎢᏳᏍᏗᏮ ᎨᏒ ᎤᏚᎵᏍᎬ ᏓᎧᎵᏍᎪ ᎤᏚᎢᏍᏔᏅ. ᏙᎲ ᎤᏍᏗ ᎢᏳᏓᎴᎩᏮ ᎨᏒ ᎤᏓᏅᏛ ᏱᎰᏩ ᎠᎯᏗᎨᏍᏗ ᎨᏐ ᎨᏓᎵᏍᎦᏍᏙᏗ?
ᎦᏙᎲ ᎤᏰᎸᏗ ᎢᎦᏁᎳᏅ ᏰᏓᎵᏍᎦᏍᏗ?
ᎠᏓᎨᏳᏗ: ᎤᏁᎳᏅᎯ ᎡᎶᎯ ᎤᏬᏢᏁ ᏅᏗᎦᎵᏍᏙᏗ ᏴᏫ ᏚᎨᏳᏒ. Geronimo ᏧᏙᎢᏛ, ᎠᏂApache ᏗᏘᏂᏙ, ᎯᎠ ᏄᏪᏎ: ‘ᎢᏧᎳᎭ ᎡᏥ ᏥᎨᏒ ᏅᏙ ᎧᎸ ᎠᎩᎦᏅᏬᏔᏅ ᏃᎴ ᎦᏃᎴᏍᎬ ᎠᏆᏁᏐᎳᏛᏔᏁ ᏃᎴ ᏕᏡᎬ ᎭᏫᏂᏗᏜ ᎤᏓᏩᏗᏒ ᏙᎯᏮ ᎾᏆᏛᏅ ᎠᎦᏍᏗ ᏥᎨᏒ ᎤᏠᏱ ᎠᏂᏐᎢ ᏧᎾᏍᏗ ᎠᏂᏴᏫᏯ ᏣᏁᎲ. ᎢᎸᏢᏮ ᏩᎩᎶᏒ ᎣᏍᏛ ᎠᏆᏓᏅᏓᏗᏍᏗ ᎨᏒ.’ ᏄᏍᏛᎮᏃ ᎤᏁᏨ Ꮭ ᎤᏥᎪᎥᏅ ᏱᎩ ᏅᏗᎦᎵᏍᏙᏗᎮᏃ ᏴᏫ ᏚᎨᏳᏎ ᏧᎾᏓᎴᏅᏛ ᎠᏂᏴᏫᏯ. ᎯᎠ ᏂᎦᏪ: “ᎤᏓᏅᏘᏳᏰᏃ ᏱᎰᏩ; ᎾᎵᏍᏆᏗᏍᎬᎾ ᎤᏓᏙᎵᏣᏘᏳ ᎨᏒᎢ; ᎠᎴ ᎾᏍᎩ ᎤᏙᎯᏳᎯ ᎤᏁᎢᏍᏗᏱ ᎤᎵᏍᏆᏗᏍᏗ ᏂᎨᏒᎾ ᏂᎪᎯᎸ ᏴᏫ ᎠᎾᏓᏁᏟᏴᏏᏒᎢ.”—ᏕᏫ ᏧᏃᎩᏛ 100:5.
“ᏂᎯ ᏣᏁᎳᏅᎯ, ᏗᏦᏢᏅᎯ ᎦᎸᎶᎢ ᎠᎴ ᎡᎶᎯ ᎠᎴ ᎠᎺᏉᎯ ᎠᎴ ᏂᎦᏛ ᎾᎿ ᎠᏁᎯ.”—ᎨᏥᏅᏏᏛ ᏄᎾᏛᏁᎵᏙᎸᎢ 4:24
ᎠᎦᏔᎿᎢ: ᎤᏂᏣᏘ ᏴᏫ ᏗᎾᏘᏂᏙ ᎤᎾᏚᎵᏍᎪ ᎤᏲ ᎢᏳᎾᏛᎿᏕᎪ ᏧᏂᏍᏕᎸᏗ ᎠᏎᏃ Ꮭ ᏯᏂᎦᏔᎰ ᏧᏂᏍᏕᎸᏗ ᏴᏫ ᎣᏍᏛ ᏧᎾᎴᏂᏓᏍᏗ. ᏱᎰᏩᏍᎩᏂ ᎤᏩᏒ ᎠᎦᏔᎿ ᎣᏍᏛ ᎬᏂᏛ ᏂᎦᏓ ᎨᏥᏁᏗ. (ᎨᏥᏅᏏᏛ ᏄᎾᏛᏁᎵᏙᎸᎢ 17:25) Standing Bear ᏧᏙᎢᏛ, Ꮎ ᏗᏘᏂᏙ ᎠᏂDakotas ᎠᏂᏴᏫᏯ, ᏄᏪᏒ: ‘ᎬᏂᎨᏒ ᏄᎵᏍᏔᏁ ᏱᎰᏩ ᎠᎦᏔᎿᎥ ᎡᎶᎯ ᎤᏬᏢᏁ ᏴᏫ ᎤᎵᎮᎵᏍᏗ.’ ᎪᏪᎸ ᏧᎭᎨᏙ ᎯᎠ ᏍᎩ ᏄᏪᏒ: “ᏂᎯ ᏣᏁᎳᏅᎯ, ᏗᏦᏢᏅᎯ ᎦᎸᎶᎢ ᎠᎴ ᎡᎶᎯ ᎠᎴ ᎠᎺᏉᎯ ᎠᎴ ᏂᎦᏛ ᎾᎿ ᎠᏁᎯ.” (ᎨᏥᏅᏏᏛ ᏄᎾᏛᏁᎵᏙᎸᎢ 4:24) ᎯᎠ ᏄᏍᏗ Ꮓ ᏅᏗᎦᎵᏍᏙᏗ ᎢᎦ ᎠᎦᏔᎿᎥ ᎢᎦᏅᏔ ᏄᏍᏛ ᎢᎦᏚᎢᏍᏓᏁᎸ ᎢᎬᏩᏛᏁᏗ ᎨᏒ.
ᏚᏳᎪᏛ: Joseph ᏗᏘᏂᏙ ᎯᎠ ᏄᏪᏎᎸ: “ᏌᏭ ᎤᏁᎳᏅ ᏂᎦᏓ ᏴᏫ ᏚᏬᏢᏁ.” ᏅᏗᎦᎵᏍᏙᏗ ᏂᎦᏓ ᏴᏫ ᏚᏬᏢᏁ, Ꮭ ᏌᏭ ᎤᎪᏛ ᏓᏤᏢ ᏯᏥᎪᏩᏘ. ᏂᎦᏓ ᎤᏂᏠᏱ. ᏧᎭᎨᏛ ᏕᎪᏪᎸ ᎯᎠ ᏁᎩᏪᏎ: “ᏱᎰᏩ ᎤᏁᎳᏅᎯ, ᎤᏓᏙᎵᏣᏘ ᎠᎴ ᎤᏓᏅᏘ . . . ᎠᎴ ᏚᏳᎪᏛ ᎨᏒᎢ.” (ᎼᏏ ᏔᎵᏁ ᎤᏬᏪᎳᏅᎯ 34:6) ᏃᎴᏍᏊ ᎤᏁᎳᏅᎯ “ᎩᎶ ᏧᎸᏉᏙᏗ ᏂᎨᏒᎾ ᎨᏒᎢ; ᎾᏂᎥᏉᏍᎩᏂ ᏧᎾᏓᎴᏅᏛ ᏴᏫ ᎠᏁᎲᎢ ᎩᎶ ᎾᏍᎩ ᏳᎾᏰᏍᎦ ᎠᎴ ᏚᏳᎪᏛ ᏱᏚᎸᏫᏍᏓᏁᎭ ᎾᏍᎩ ᏓᎦᏓᏂᎸᎪᎢ.” (ᎨᏥᏅᏏᏛ ᏄᎾᏛᏁᎵᏙᎸᎢ 10:34, 35) ᏅᏗᎦᎵᏍᏙᏗ ᎮᏃ ᎢᎦᏁᎳᏅ ᎢᎩᎨᏳᏒ ᏳᏍᏗ, ᏚᏳᎪᏛ ᏅᏛᏛᏁᎵ. Ꮭ ᏱᏙᏛᏥᎪᎥᏁᎵ.
ᎤᎵᏂᎩᏛ: ᎢᎦᏛ ᎮᏃ ᏴᏫ ᏗᎾᏘᏂᏙ ᎤᎾᏚᎵᏍᎪ ᏚᏳᎪᏛ ᎢᏳᎾᏛᏁᏗ ᎠᏎᏍᎩᏂ Ꮭ ᎡᎵ ᏳᎾᎵᏂᎬᏙ ᎤᎾᏚᎵᎲ ᎢᏳᎵᏍᏙᏗ. ᎠᏎᏍᎩᏂ ᎢᎦᏁᎳᏅ ᏭᏨᏛ ᎤᎵᏂᎩᏗ. ᎯᎠ ᏕᎪᏪᎸ ᎬᏂᎨᏒ ᏁᎬᏁ: “ᏰᎵᏉ ᏂᎯ ᏣᎬᏫᏳᎯ ᎦᏰᏣᏁᎢᏍᏓᏁᏗ ᎡᏣᎸᏉᏗᏳ ᎨᏒ, ᎠᎴ ᎡᏣᎸᏉᏙᏗ ᎨᏒ, ᎠᎴ ᏣᎵᏂᎩᏗᏳ ᎨᏒᎢ; ᏂᎦᏗᏳᏰᏃ ᎪᎱᏍᏗ ᏦᏢᏅᎯ, ᎠᎴ ᎭᏓᏅᏖᏍᎬ ᎢᏨᏁᎵᏓᏍᏗᏱ ᎡᎭ, ᎠᎴ ᎪᏢᏅᎯ.” (ᏣᏂ ᏄᏍᏛ ᎠᏥᎾᏄᎪᏫᏎᎸᎢ 4:11) Ꮭ ᎩᎶ ᎤᎪᏛ ᏳᎵᏂᎬᎬ ᏏᏅ ᎢᎦᏁᎳᏅᎯ ᎨᏒ. ᏄᏪᏒ ᎮᏃ ᎡᎵᏭ ᏂᎪᎯᎸ ᎨᏒ ᏅᏛᏛᏁᎵ.
ᎡᏙᎵᏥ ᎢᎦᏁᎳᏅᎯ ᎡᎵᏭ ᎧᎵ ᎡᏓᎵᏍᎦᏍᏙᏗ ᎢᎦᏚᎢᏍᏓᏁᎸ. ᎦᎶᏁᏛ ᎯᎠ ᏂᎦᏪ “ᎧᏃᎮᏛ ᏣᏤᎵᎦ ᎾᏍᎩ ᎦᏰᎪᎩ ᏂᎨᏒᎾ.”—ᏣᏂ ᎤᏬᏪᎳᏅᎯ 17:17.
ᏙᎲ ᎤᏍᏗ ᎢᎦᏁᎳᏅ ᎢᎦᏚᎢᏍᏓᏁᎸ?
ᏱᎰᏩ ᎮᏃ ᎢᎦᏁᎳᏅᎯ ᎠᎦᏑᏰᏛ ᏥᏌ ᎦᎶᏁᏛ ᏙᏛᏘᏂᏙᎵ ᎾᏂᎥ ᏴᏫ. ᏚᏳᎪᏛ ᎤᎾᎵᎮᎵᏍᏗ ᎨᏎᏍᏗ ᏴᏫ ᎡᎶᎯ ᏂᎬᎾᏛ. ᏱᎰᏩ ᎯᎠ ᏂᎦᏪ ᏥᏌ ᎨᏒ. “ᎬᏂᏳᏉ [Ꮒ!, New World Translation] ᏥᏅᏏᏓᏍᏗ ᏥᏯᏑᏰᏛ ᏥᎨᏳᎢ ᏗᏆᏓᏅᏛ ᎢᏴᏛ ᎣᏍᏛ ᏥᏰᎸᎢ; ᏓᏥᏁᎵ ᎠᏆᏓᏅᏙ, ᎠᎴ ᏧᎾᏓᎴᏅᏛ ᏴᏫ ᏚᏳᎪᏛ ᏧᎾᏄᎪᏫᏎᏗ ᎨᏎᏍᏗ.” (ᎹᏚ ᎤᏬᏪᎳᏅᎯ 12:18) ᎤᏲ ᏄᎾᏛᎿᏕᎪ ᏥᏌ Ꮭ ᏴᏙᏓᏳᏩᎨᏫᏐ. ᏙᏛᏍᏕᎸᎯ. ᏕᎪᏪᎸ ᎯᎠ ᏂᎬᏅ ᏙᏛᏍᏕᎸᎯ. “ᏙᏛᏍᏕᎸᎯ ᎤᏂᏂᎩᏛ ᏧᏁᏥ, . . . ᏓᎫᏓᎴᏏ ᎢᏳᏃ ᏓᏠᏱᎮᏍᏗ; ᎤᏲ ᎢᏳᏛᎿᏕᎩ ᎾᏍᏉ, ᎠᎴ ᎾᏍᎩ ᏁᎲᎾ ᎤᏍᏕᎵᏍᎩ.”—ᏕᏫ ᏧᏃᎩᏛ 72:4, 12.
ᎯᎠ ᏄᏍᏕ ᏗᏓᎴᏂᏍᎬ ᎡᎶᎯ ᎤᏬᏢᏅ ᎤᏬᏚᏨ ᎨᏎ, ᏴᏫ ᎠᏥᏁᎴ ᏅᏩᏙᎯ ᎤᎾᎴᏂᏓᏍᏗ ᎡᎶᎯ ᏂᎬᎾᏛ. ᎤᏓᏁᏟᏴᏎᏍᎪᎲ ᏚᏭᎪᏔᏅ? ᎯᎠ ᏥᏂᎬᏅ ᏕᎪᏪᎸ. “ᏙᏓᎦᏅᎦᎸᎯ ᏂᎦᏛ ᏓᏂᎦᏌᏬᎢᎲᎢ; ᎥᏝ ᎠᎴ ᎿᏉ ᏰᎮᏍᏗ ᎠᏲᎱᎯᏍᏗ, ᎠᎴ ᎤᏲ ᎠᏰᎸᏗ ᎨᏒ, ᎠᎴ ᏗᏠᏯᏍᏗ ᎨᏒᎢ, ᎥᏝ ᎠᎴ ᎿᏉ ᏰᎮᏍᏗ ᎡᎯᏍᏗ ᎨᏒᎢ; ᎢᎬᏱᏱᏰᏃ ᏧᏓᎴᏅᏛ ᏤᎲ ᎤᎶᏐᏅ.” ᏂᎯᎾ? ᎰᏩᏍ ᎮᎵ? ᎯᎠ ᎧᏁᎬ: “ᎯᎠᏰᏃ ᎾᏍᎩ ᎧᏃᎮᏛ ᎬᏜᏏᏛᎡᏗ ᏂᎨᏒᎾ ᎠᎴ ᎤᏙᎯᏳᎯᏯ.”—ᏣᏂ ᏄᏍᏛ ᎠᏥᎾᏄᎪᏫᏎᎸᎢ 21:4, 5.
ᎤᏁᎳᏅ ᎠᎦᏔᎿᎢ ᎯᏯᎵᏍᎦᏍᏓ
ᏱᎰᏩ ᎧᏁᎬ: “ᏱᎰᏩᏍᎩᏂ ᎤᏤᎵ ᏗᎧᎿᏩᏛᏍᏗ ᎣᏏ ᎤᏰᎸᏐᎢ, ᎠᎴ ᎾᏍᎩ ᎤᏤᎵ ᏗᎧᎿᏩᏛᏍᏗ ᎠᏓᏅᏖᏍᎪ ᏗᎬᏩᎩᏨᏗ. ᎠᎴ ᎾᏍᎩ ᏡᎬ ᏓᏤᎴᏍᏗ ᎠᎹ ᏕᎨᏴ ᎤᎶᏗ [ᎠᎹᏳᎶᏗ] ᏥᎦᎧᎰᎢ . . . ᎠᎴ ᎾᏍᎩ ᎤᎳᏍᏚᏒ ᎥᏝ ᏱᎧᏴᏍᎨᏍᏗ; ᎠᎴ ᏂᎦᎥ ᏚᎸᏫᏍᏓᏁᎲ ᎠᏎ ᎧᏁᏉᎨᏍᏗ.” (ᏕᏫ ᏧᏃᎩᏛ 1:2, 3) ᏱᏣᏕᎶᏆ ᎤᏁᎳᏅ ᏓᏕᏲᎲᏍᎬ ᏭᏓᎪᎾᏛ ᎣᏍᏛ ᏴᎭᎴᏂᏗ, ᎢᏳᏃ ᏧᎭᎨᏛ ᏕᎪᏪᎸ ᏱᏗᏣᎦᏌᏯᏍᏔᏂ, ᏴᎭᏕᎶᏆ ᎤᏰᎸᏗ ᏥᏓᎴᏂᏙ. ᎡᎵᏭ ᏣᏕᎶᏆᏍᏗ ᏅᏩᏙᎯ ᎢᎦᎵᎪᏂᏓᏍᏗ ᏱᎩ ᎠᏂᏐᎢ ᏃᎴ ᏙᎯᏳ ᎤᎵᎮᎵᏍᏗ ᎯᏩᏛ.—ᎷᎦ ᎤᏬᏪᎳᏅᎯ 6:27-31; 11:28.
ᏙᎲ ᎤᏰᎸᏗ ᎤᎾᏓᏅᏘ ᏴᏫ ᎢᎦ ᏣᏂᎩᎵᏲᎪ? ᎭᏢ ᏫᏂᎦᎵᏍᏗ ᏴᏫ ᏳᏲᎱᏌ? ᎡᎵᏭᏍᎪᎲ Ꮫ ᎠᏛᏂᏗ ᎤᏲᎱᏒ ᏥᎩ? ᎢᏳᏍᏗᏮ ᎨᏒ ᎯᏯᏛᏛᎲᏍᎬ ᎢᎦᏁᎳᏅ ᎤᏩᏒ ᎬᏂᎨᏒ ᏅᏓᏨᏁᎵ ᏣᏚᎵᏍᎬ ᏦᎵᏍᏗ.
ᎢᎦᏁᎳᏅᎯ Ꮭ ᎸᎯᏳ ᎤᏥᎪᎥᏅ ᏱᎩ. ᎢᎦ ᎮᏃ ᎡᎵᏭ ᎡᏓᎵᏍᎦᏍᏙᏗ ᏅᏗᎦᎵᏍᏙᏗ Ꮓ ᎢᎩᎨᏳᏐ. ᏱᏣᏚᎵᎨ ᎤᎪᏛ ᎯᏲᎵᏍᏗ ᏱᎰᏩ ᏣᏁᎳᏅᎯ? ᏱᎰᏩ ᎠᏂᎦᏔᎯ ᏯᎾᎵᎮᎵᎩ ᎨᏣᏎᎮᏗ ᏂᏕᎬᏅ ᏕᎪᏪᎸ. “ᏱᎰᏩ ᎡᏣᎵᏍᎦᏍᏙᏓ.” (ᏕᏫ ᏧᏃᎩᏛ 4:5) ᎢᏳᏃ ᎯᏯᎵᏍᎦᏍᏔᏂ ᏱᎰᏩ “ᏂᎦᎥ ᎪᎱᏍᏗ ᎡᏗᏔᏲᏏ ᎢᏗᎦᏔᎰ ᎢᎩᏁᎲ ᎢᏳᏍᏗ ᎡᏗᏔᏲᏎᎸᎢ.”—ᏣᏂ ᎢᎬᏱᏱ ᎤᏬᏪᎳᏅᎯ 5:15.