Wita

42 Jakob muziweliye wi o Ejipitu wahikala dhoja, ologa dhahi na anaye: “Munkalelani wang’ananavi muttu na mukwaye?” 2 Vina ohenjedhedha: “Ddihiwa wi mu Ejipitu muhikala dhoja. Kadhowani mwanigulele dhoja wi ninakwe na dala.” 3 Dhahene abali kumi a Jozé ahidhowa o Ejipitu wi agule dhoja. 4 Mbwenyi Jakob kamurumelihile Benjami, mbali wa Jozé odhowa na abalaye, vowi wahiloga: “Enodhaga ompadduwela ngovi yowopiha.”

5 Ana Izrayel adhowa na attu ena adhowa ogula dhoja, vowi dala yahifiya mwilaboni y’o Kaná. 6 Jozé wali munddimuwa mwilaboni y’o Ejipitu, vina wali iyene wàgulihedha dhoja attu otene a nlogo. N’eji abali a Jozé ahinfiyedha vina akunama vamentoni vaye. 7 Jozé mwawoneliye abalaye, momaguva-mwene ohazinddiyela, mbwenyi ohavitela wi anamuziwe. Venevo ohavuza na mazu ovadda: “Mundana wuvi?” Awene ahimwakula: “Mwilaboni y’o Kaná, nidhele ogula dhoja.”

8 Dhahene Jozé ohazinddiyela abalaye, mbwenyi awene kawodhile omuzinddiyela. 9 Momaguva-mwene Jozé ohubuwela dhoroha dhakaniliye mwaha wa awene, vina ohawaddela: “Nyuwo muli anamarheza! Mudheli wona mpule mobanile elaboya!” 10 Venevo ahimwakula: “Kahiyo mwenemo nabuyehu, adhari enyu adhile ogula dhoja. 11 Iyo notene nili ana a babi mmodhene. Nili attu okuluveleya. Adhari enyu kahiye anamarheza.” 12 Mbwenyi iyene ohalogana: “Kahiyo mwenemo! Nyuwo mudhile moone dhipaddi dhowobana dha elaboya!” 13 N’eji, awene aloga: “Adhari enyu abali 12. Nili ana a babi mmodhene mwilaboni y’o Kaná womarihaya ohalile na babihu, mwina kawo.”

14 N’eji, Jozé ohawaddela: “Miyo ddiloga—‘Nyuwo muli anamarheza!’ 15 Munele wehiwa: Ddinomuddubelela Faraó oliwo, kamunattiyiwe odhowa muhimudhilena mbalinyu mong’onoya. 16 Mmurume mmodha wa nyuwo amudhowele mbalinyu oku ena anohalavi bafugeliwe mukambura. Ddinomuddubelela Faraó oliwo, mugahimudhena mbalinyu ddinele oziwa wi nyuwo muli anamarheza.” 17 N’eji, ohafugeliha mukambura malabo mararu.

18 Siku na neraru, Jozé ologa na awene: “Kosani eji wi mukalewo, vowi miyo ddinomova Mulugu. 19 Akala muli attu okuluveleya, mbalinyu mmodha afugeliwe mukambura, nyuwo mudhowena dhoja wi amudhenyu anakwe na dala. 20 Mugamala muddidhelena mbalinyu mimaya, dhahene enele woneya wi munloga ebaribari vina kamunapiwe.” Awene arumela okosa ejuwene.

21 Ahiloga woka-woka: “Txibarene, ninotxinutxiwa sabwa ya ejile emukoselihu mbalihu, vowi nihona goyi yaye oku anunlelaga wi nimweddele ttagaraga, mbwenyi kaninvuruwanile. Nona nigweliwa segedho esi.” 22 Ruben ohiloga na awene: “Miyo kaddawaddeleni: ‘Kammuttegele mima?’ mbwenyi nyuwo kamuddivuruwanile. Ddabuno ninowakulela vamentoni va Mulugu sabwa ya okuttula nikami naye.” 23 Mbwenyi awene kaziwa wi Jozé wannonelamo dhalogani, vowi iyene waloga elogelo y’o Ejipitu muttu mwina ddatapulela na elogelo ya abalaye. 24 Dhahene, iyene osusavo valani vina oroma wunla. Veyelile iyene ohiloga wili na awene, vina omuttidda Simeau ohimmaga vamentoni va abalaye. 25 Jozé ohiruma wi dhidhalihiwe saku dhawa na dhoja, awiyihedhe kobiri dhawa ekaga musakuni ya muttu-muttu vina àvahe dhoja dha okosana oleddo. Awene avirihamo dhirumiliye.

26 Venevo, ahimaga mittorho dhawa vaburuni vina akosa oleddo. 27 Mufiyelani mburo wafunani ogona, mmodha otapula saku yaye wi avahe oja buru yaye, venevo ohona wi kobiri yaye yali musakuni. 28 N’eji ohawaddela abalaye: “Ddihiyihedhiwa kobiri dhaga, esi dhili musakuni!” Venevo attiddiwa wova onddimuwa vina aroma ogurumela ang’anagana muttu na mukwaye, ahiloga: “Ejiya txini enikosile Mulugu?”

29 Mufiyelani mwilaboni y’o Kaná, amwaddela babiwa Jakob dhotedhene dhapadduweli, alogaga: 30 “Munddimuwa wa mwilabonimwa ohiloga mazu ovadda vaddiddi na iyo, vina onimagedha wi nili anamarheza mwilabonimwa. 31 Mbwenyi iyo nimwaddela: ‘Nili attu okuluveleya. Kanili anamarheza. 32 Nili abali 12, ana a babi mmodhene. Mwina kawo vina womarihaya ohalile na babihu mwilaboni y’o Kaná.’ 33 Mbwenyi mulobwana oli munddimuwa wa elaboya ohiloga dhahi: ‘N’eji ddinele oziwa akala muli attu okuluveleya: Mmuttiye mbalinyu mmodha na miyo, nyuwo muttukule dhoja vina mudhowe wi amudhenyu anakwe na dala. 34 Vina muddidhelena mbalinyu womarihaya, dhahene ddinele oziwa wi kamuli anamarheza mbwenyi muli attu okuluveleya. Venevo ddinowiyihedhani mbalinyu vina munottiyiwa okosa marhondda mwilaboni.’”

35 Akuttulaga dhoja dhali musakuni, buddu na kobiri na muttu-muttu nali musakuni mwaye. Monelani vamodha na babiwa, attiddiwa wova onddimuwa. 36 Jakob ohiloga: “Munddittiya miyo se anaga! Jozé kawo, Simeau vina kawo, ovano munfuna mmuttukule Benjami! Ddi miyo onfwanyela ovilela dhotedhene esi?” 37 Ruben ologa na babe: “Wape anaga eli miyo ddigahimudhena. Kaddiperhekeleni mmadani mwaga, miyo ddinele owiyihedhani.” 38 Mbwenyi, iyene ohiloga: “Mwanaga kanadhowe na nyuwo, sabwani mbalaye okwa, ddihalilena odduwene. Kompadduwela elobo mwanaga bali muleddoni nanda bakwa, nyuwo mugahidditotela okwa na okubanya muwuluvalani mwaga.”