Merelo a Arumiwi
27 Dhahene ninga mwamalelani wiwananeliwa wi nigahidhowa o Itália, Paulo vamodha na afugeliwi ena ahiperhekeliwa mwimeleli wa anyakoddo wakuweliwa Júlio wa nikuru na anyakoddo nakuweliwa Agusto.* 2 Niwela mpaporoni dhahi o Adramítio wafuna odhowa porto dhottiyana-ttiyana dha Provinsia ya Ázia, dhahene niroma oleddo wehu. Aristarko mukadda Masedónio w’o Tesalónika wali na iyo. 3 Mmangwananimwá nifiya o Sidónio, Júlio omweddiha pama Paulo, ohimurumeliha odhowa wawona akwaye, dhahene akwayeyá amukamihedha Paulo.
4 Nivenya, nivira sere-sere ya Xipre, sabwani nadhowa wadhela pevo. 5 Mmalelani nihabuwa bara y’o Silísia vina na y’o Panfília, mmalelihu nifiya porto y’o Mira elabo y’o Lísia. 6 Wenewo mwimeleli wa anyakoddo ohinfwanya paporo w’o Alexandriya wadhowa o Itália, oniweliha mwenemo. 7 Mumalelihu malabo menjene neddaga vang’ono-vang’ono na paporo nifiya o Knido na makattamiho. Vowi pevo kiyaniwodhiha odhowavi osogorho, nihedda sere-sere ya o Kreta waddamela o Salmoni. 8 Nihedda na makattamiho, nifiya mburo wakuweliwa Gombe Dhapama, wali waddamana na sidadi y’o Lazeya.
9 Ahivira masiku menjene vina wedda na paporo yanrutxa, sabwani siku n’ottuga* wa oleveleliwana dhoddawa nahivira, vano Paulo ohakokomeza: 10 “Alobwanani, ddinoona wi oleddo obu onele onidhelana makattamiho menjene, ninele oyelela mittorho, paporo, iyo vina nindhaga okwa.” 11 Vano mwimeleli wa anyakoddo ottiya onvuruwana Paulo, ovuruwanile dhaloga nameddiha paporo na mwinya wa paporoyá. 12 Vowi gombeya kiyali yofwanyelela wi akale wenewale nsaka n’oridha, enjiyá ahirumeela odhowa wi one akala agahifiya o Fenix, gombe y’o Kreta, ejuwene yattukulela omadhelo wa nzuwa na omaddowelo wa nzuwa, kuwenewo ogakalilani nsaka n’oridha.
13 Muromile woba pevo yadhana ogusuni,* yoba vang’ono-vang’ono ahubuwela wi yogana yawa ya ofiya o Fenix egahakwanihedheya, venevo amutapula nángura wa paporo ahivira o Kreta, sere-sere ya bara. 14 Vano mvirile mudhidhi mung’onovi, ehoneya pevo yoba n’owali yadha epaddi yina ya suwa, pevoya ejo enziweya ninga Eurakilau.* 15 Ninga paporoyá wela otukumiwa venjene na pevo, kanawodha omweddiha wi nidhowe osogorho, nona nivittiya otukumiwa na pevo. 16 Nivira sere-sere ya suwa eng’ono yakuweliwa Káuda, masiki dhawene yannirutxa wang’anela mwanddiya wamagelelehu mundduni mwa paporo. 17 Mmalelani ottukulela mwanddiyayá mpaporoni, ammaga paporoyá na kabala wi amulibihe. Ovaga wi paporoya anakokeye o Sirte, atapula kabala dha veladhá, dhahene avittiya otukumiwa na pevo. 18 Ninga nela otukumiwa na pevo enddimuwa, mmangwananimwá niroma oponyedha mbara mittorho dhali mpaporonimwa. 19 Siku nanoraru, anyene aponyedha mbara na mada awa dhilobo dhina dhali mpaporoni.
20 Mwa malabo menjene nzuwa na vineneri kadhoneya, vina mwikomwa mwatatamuwa otagala onddimuwa wanifwanya, venevo niroma orimeliwa njedhelo n’ovuneya. 21 Mvirele masiku menjene ahijaga elo, Paulo ovenya vari vawa vina ohiloga: “Alobwanani, txibarene nyuwo mwanfwanyela ovuruwana malago aga, a ohibudduwa o Kreta. Kokosa dhawene kamugatabuwile nne vina kamugayelelile dhenyu. 22 Masiki dhawene ddinoukokomezani wi mulibe murima, sabwani kavo nne mmodha mwa nyuwo onakwe, mbwenyi paporo bahi ddunanongeye. 23 Mattiyu avirile anju mmodha wa Mulugu waga, onimuttiddelimi mabasa oddittanyuwela 24 vina ohiloga: ‘Kuwove, Paulo. Enofuneya ofiye vamentoni va Sézari! Ottiya ejo, Mulugu onele ouvuna weyo vamodha na otene ali na weyo, mpaporoni.’ 25 Nona alobwanani, mulibe murima, vowi miyo ddinomuroromela Mulugu wi dhinele opadduwa dhahene ninga mwaddeliwemi. 26 Mbwenyi, jofuneya wimela vanafwanyehu suwa.”
27 Mvirele masiku 14 mutana na mattiyu nitukumeliwaga oku-n’oku na pevo, bara y’o Adria, vari va mattiyu anameddiha paporo aroma waganyedha wi ninowaddamela otakulu. 28 Apima ovayawa, ahona wi wali wa meturu 36, ahedda vang’onovi, mpimelani wili ahona wi ovayawa wali wa meturu 27. 29 Ninga annova wi paporoyá anemele vamaluguni, atapula manangura manayi a mundduni onlelaga vati oya. 30 Mbwenyi anameddiha paporo afunaga ottawa, atitihedha mwanddiya mwiko akalaga ninga anfuna aponyedhe mwiko anangura a epaddi yosogorho, 31 Venevo Paulo ohiloga na mwimeleli wa anyakoddo vamodha na anyakoddoya: “Alobwana aba agahikale mwenemwa mpaporoni, nyuwo kamunavuneye.” 32 Venevo anyakoddoyá agwadda kabala dha mwanddiyayá, amottihedha mmanjeni.
33 Vati vafunaga oya, Paulo ohakokomeza otene wila aje, alogaga: “Ddabuno, ahakwana masiku 14 ali nyuwo ozuzumene mujedhaga vina kamunjile elo. 34 Nona ddinouwaddelani wi muje, ddinirela opama wenyu, vowi kaninarimele nne nttitti nimodha nenyu.” 35 Mmaleliye ologa dhotedhene eso, ottukula pawu omutamalela Mulugu, otene amonaga, omenya oroma oja. 36 Dhahene otene alibiha murima aroma oja vina. 37 Otene àli mpaporonimwa ali attu owakwana 276. 38 Mmalelani oja akwanana, amuttukula tiriguyá, amvokela mbara wi amululuvihe paporoyá.
39 Muyeli vati, kawodhile ozinddiyela elaboyá. Vano ahona suwa, nona ahigana wi kowodheya amwimetxe paporoyá venevale. 40 Venevo agwadda kabala dha ananguraya, amottiyedha mbara. Mudhidhi wakakene atapula kabala dha ng’ombo. Mmalelani orugunutxela vela y’osogorho wadhela pevo, atxapela nikome na bara. 41 Venevo paporoya ovada mutxesa mwinjene wali oku-n’oku mutxiddo mwa manje a mbara vina ohimela, epaddi y’osogorho ekoka ofiyedha ohiddiginyeyaga, mbwenyi epaddi ya mundduni eroma ogujuwa na manebe. 42 Nowidhawo, anyakoddoyá agana wapa afugeliwi otene ovaga wi anahabelele, attawe. 43 Vano mwimeleli wa anyakoddo wanfuna onvuna Paulo, nona ohakoddiha okosa yatadelilani. Iyene oruma wi abale aziwa ohabelela arome olupela mbara wi afiye otakulu, 44 oruma vina wi enayá ahalile akose yakakene, ena na tabwa, enagu na pedaso dha paporo wanongeyile. Dhahene, otene afiya otakulu agumene.