Ahebreu
2 Nona, jofuneya ofwaseyela ovuruwana vopitta esile dhewalihu wila nihipupuruwe. 2 Akala mazu alogiwe na anju ahakwanihedheya, akala muttu onkosa yottega vina ohiniwelela onottongiwa moligana, 3 ninawodhe dhavi ottawa ottongiwawa, nigapwaza ovuneya oku onddimuwa? Vowi Nabuya wehu ddiromile ologa mwaha wa ovuneya oku onddimuwa vina attu abale ewale anaddela. 4 Vano Mulugu ohoniha wi esile dhalogani dhali dhebaribari,* mwa wavaha vizinddiyelo, matikiniho, na ewodhelo yokosana matikiniho menjene na mvaho wa muya wokoddela wagaweliye, ninga mwafuneliye.
5 Txibarene, Mulugu kaattomele anju wila alamulelege elabo endha, ejuwene enlogihu. 6 Mbwenyi muttu mmodha ovahile onamoona, ohiloga dhahi: “Muttu txini ofiyedha nyuwo omubuwela, obe mwana-muttu txini ofiyedha nyuwo omuzuzumela? 7 Mumukosiha okala mung’ono wapitta anju, muhinvaha nttittimiho, nriho na owodha wila asogorhele esile dhikosilenyu. 8 Nyuwo mumuttiyedha dhilobo dhotedhene mutxiddo mwa manyalo aye.” Mmuttiyedhiye wi iyene alamulele dhilobo dhotedhene, kayiwo elo ehittiyile Mulugu wi elamuleliwe na Yezu. Mbwenyi, iyo kaninimona Yezu alamulelaga dhilobo dhotedhene. 9 Ovano iyo ninomona Yezu, banna nttittimiho na nriho mwaha wa otabuwa ofiyedha okwa, iyene ovikosiha okala mung’ono wapitta anju, mbwenyi mwaha wa mahala a Mulugu, iyene ohakwela attu otene.
10 Dhilobo dhotedhene dhihikosiwa wi dhimuttittimihege Mulugu vina dhinokalawo mwaha wa iyene. Nona, wila ana enjene àkele nttittimiho enofuneya wi Mwimeleli Munddimuwa akale wowakwana mmasosoni, Mulugu ononivuna amurumaga Mwimeleli Munddimuwa oddo wa egumi. 11 Yezu vamodha na abale ankoddelihiwa, otene aba anna babi mmodha, nona iyene kankana manyazo mwa wakuwela abalaga, 12 alogaga dhahi: “Ddinele waziwiha nzina nenyu abalaga vina ddinele outtittimihani na jibo vari va mulogo.” 13 Ohenjedhedha: “Miyo ddinele omuroromela.” Vina: “Moone! Miyo ddili veneva na aima addivahile Yehova.”
14 Nona, vowi “ana” abo attu anna nikami na maningo, iyene vina ovikosiha muttu onna nikami na maningo wila na okwa waye, amugomihe ole onna ewodhelo ya otota okwa, kuloga, Ddiabo. 15 Vina, wila àfurule otene akalilewo egumi yawa yotene ninga adhari, mwaha wa wova okwa. 16 Vowi iyene txibarene, kanakamihedha anju, mbwenyi onakamihedha attu a ziza* na Abrahamu. 17 Nona, iyene akala oligana na “abalaye” mwa mikalelo dhotedhene, wila akale namakutta munddimuwa, wa ttagaraga vina wororomeleya, onttidda mabasa a Mulugu wi aperheke mukutto wa oleveleliwana dhottega, onakosiha attu otene okala mmurenddeleni na Mulugu. 18 Vowi iyene otabuwa ehiwaga, onowodha wakamihedha abale anehiwa.