Dhilebiwe na Mateu

24 Yezu abudduwaga mumparhani, anamasunza aye amususela wi amulagihe mparha wotene. 2 Venevo iyene ohawaddela dhahi: “Kamunowona dhotedhene esi? Ddinouwaddelani ebaribari, apa kavanahale nlugu vadhulu va nlugu nina nihinatolotxiwe.”

3 Yezu bali wogilatene Vamwangoni wa Oliveira, anamasunza aye amususela vawa-vene, ahinvuza dhahi: “Munaddele: Nsaka gani ninapadduwe dhilobo esi vina ezinddiyelo gani enonihe odha wenyu vina ogoma wa elabo?”

4 Yezu ohawakula: “Mukale txenjewa wila ahikalewo onaunyengetteni, 5 vowi enjene anele odha na nzina naga alogaga, ‘Miyo ddili Kristu,’ vina anele wanyengetta attu enjene. 6 Munele wiwa miselu dhinloga dha koddo mmimburoni dhottiyana-ttiyana. Mukale txenjewa wi muhitxutxeye, vowi enofuneya esodhá opadduwa, mbwenyi kahiyo ogoma wa elabo.

7 “Vowi nlogo ninele owana na nlogo nina, omwene na omwene mwina; onele okala orameya wa dhoja vina ottekenyeya wa mattaka mmimburoni dhottiyana-ttiyana. 8 Mbwenyi dhotedhene esi, dhinoniha wi omaromo wa goyi.*

9 “Venevo attu anele wutabutxani, wupani vina munele widdiwa na attu a malogo otene, sabwa ya nzina naga. 10 Enjene anele okwakwattuwa, anele osadduwelana vina anele widdana. 11 Anele woneya anamavuhulela enjene a ottambi, anapupurutxe attu awinjiva; 12 sabwa ya winjiva wa obure, okwela wa enjiyá onele wobana. 13 Mbwenyi ole onavilele mpaka omagomo ddinavuneye. 14 Miselu esi dhapama dha Omwene dhinele olaleyiwa mwilaboni mwetemwene wi attu a malogo otene ewe, ngamala panafiye ogoma wa elabo.

15 “Nona mugona elobo yonyakuwa entota masoso, ninga mwalogele namavuhulela Daniyel, bili mburo wokoddela (ole onengesa atamele ononelamo), 16 venevo abale ali mu Judeya attawele omyangoni. 17 Muttu oli vadhulu va nyumba* katitele ottukula dhobo dhaye, 18 muttu oli mmunddani keyelele ottukula mukumi waye. 19 Goyi dhinele wattabwela ayana anakane yari vina anamwihege nsaka-nene ntto! 20 Mudidele olobela wi siku ninfuna nyuwo ottawa nihikale nsaka n’oridha nne siku na Sabuddu;* 21 vowi onele okala goyi enddimuwa ehinoneyaga oromana muttanddeliwe elabo ofiyedha masaka abano, nne ehinoneye vina. 22 Txibarene, kohivuguliwa masiku abo, kavo nne mmodha ogavuneyile; mbwenyi sabwa ya abale asakuliwe, masikuyá anele ovuguliwa.

23 “Vano, akala muttu onouwaddelani eraga, ‘Mmone! Kristu oli veneva,’ obe ‘Oli apale!’ Munamurumele. 24 Vowi anele witeya Akristu a ottambi na anamavuhulela a ottambi anakose vizinddiyelo na matikiniho menjene wi anyengettena attu, egawodheya masiki na abaleyá asakuliwe. 25 Mukale txenjewa, miyo ddihuwaddelani mutanene. 26 Nona, attu agauwaddelani dhahi, ‘Mmone! Iyene oli mwiddeddereni,’ kamudhowe; obe ‘Mmone! Oli mba,’ nyuwo kamurumele. 27 Sabwani dhahene ninga ong’anima wa jayi onroma woneya omadhelo wa nzuwa, ofiyedha omaddowelo wa nzuwa, yakakene jinapadduwe nsaka na odha wa Mwana-muttu. 28 Vanakale muruttu, pavenevo vanagumane dhipungu.

29 “Momaguva-mwene goyi ya masiku abo egavira, nzuwa ninele ottima, mweri kunamoneye, vineneri dhinele omotta wirimu vina guru dha wirimu dhinele ottekenyeya. 30 Venevo wirimu onele woneya ezinddiyelo ya Mwana-muttu. Attu a malogo otene a vati, anele okubanya venjene vina anele omona Mwana-muttu adhaga mmiraboni wirimu na owodha vina nttittimiho ninddimuwa. 31 Iyene onele waruma anju aye na oruma onddimuwa wa parhaza; awene anele watugumaniha otene asakuliwe, anfwanyeya dhipaddi dhonayi* dha elabo, oromana komo ya wirimu mpaka komo dhawa.

32 “Kasunzani na yoladdaniha ya mfigera: Virasidhá dhigaroma opweta mataba maswa, munoziwa wi elimwe eli vakuvi. 33 Yakakene vina, mugona dhilobo esi dhotedhene, muziwe wi iyene* oli vakuvi, vamusuwo. 34 Ddinouwaddelani ebaribari, attu a nsaka nttino kanafiyedhe omala dhilobo esi dhotedhene dhihinatti opadduwa. 35 Erimu na elabo dhinele ovira, mbwenyi mazu aga txipo kanavire.

36 “Vano siku ntto vina mudhidhi obo kawo onziwa, nne anju a wirimu, nne Mwana, mbwenyi onziwa ddi Baba bahi. 37 Dhipadduwile masiku a Nowé, sakakene dhinapadduwe nsaka na odha wa Mwana-muttu. 38 Sabwani masiku abale Mpulo Munddimuwa ohinatti, attu anja, ammwa, alobwana antela, ayana antelihiwa, ofiyedha siku nivolowile Nowé mpangayani, 39 awene kakosile elobwene, ofiyedha odha Mpulo Munddimuwa wàselile otene, yakakene jinapadduwe nsaka ninadhe Mwana-muttu. 40 Alobwana eli anele ofwanyiwa mmunddani; mmodha onele ottukuliwa mwina onele ottiyiwa. 41 Ayana eli anele ofwanyiwa atxilaga va nlugu n’otxilana; mmodha onele ottukuliwa mwina onele ottiyiwa. 42 Nona mukale txenjewa, sabwani kamunziwa siku ninadhe Nabuya wenyu.

43 “Vano muziwe eji: Kowiliwa mwinya wa vatakulu wela oziwa mudhidhi wa mattiyu ondha mbava, iyene kagagonile; agayedhela wang’anela wi mbava anavolowe mba mwaye. 44 Nona nyuwo vina mukale omala-nawale, sabwani Mwana-muttu onadhe mudhidhi ohinubuwelinyu.

45 “Bani oli mwimeleli wororomeleya vina wamalago,* ottomiwe na nabuya waye wi aweddihege anamalaba a vatakulu vaye, agawelaga yoja vansakanivá? 46 Wohagalala ddi mwimeleli oddo onafwanyiwe na nabuya waye akosaga dhawene! 47 Ddinouwaddelani ebaribari: Iyene onele omwira nameddiha wa dhotedhene dhiniye.

48 “Mbwenyi akala mwimeleli oddo wabure onowubuwela mmurimani mwaye, ‘Nabuya waga onogonela,’ 49 venevo aroma wabubudda emeleli akwaye, ajaga, vina amwaga na alezeli, 50 nabuya wa mwimeleli oddo onadhe siku nihinjedheliye vina mudhidhi ohinziwiye; 51 iyene onele omutabutxa venjene, vina onele omuttiya mburo wa agwarhagwambi. Wenewo onele wunla na okubanya onddimuwa vaddiddi.*