Dhilebiwe na Mateu
8 Mmaleliye otita vamwangoni, muttitti munddimuwa wa attu wanimfwara. 2 Venevo muttu wanna maranya omususela, omukokorela amulobaga dhahi: “Nabuya, mugafuna kaddivulumutxeni.” 3 Dhahene Iyene otapula nlada naye, omuddiginya mulobwana ole, alogaga: “Miyo ddinofuna! Kavulumuwa.” Mudhidhene obo muliba maranyayá, ovulumuwa. 4 Mmalelani, Yezu ohilogana: “Kumwaddele muttu, mbwenyi kadhowa wavyonihe wa namakutta vina waperheke mvaho ninga munrumela Nlamulo na Mizé wi awene aziwe ovulumutxiwa wawo.”
5 Mfiyedhiye o Kafarnau, mwimeleli mmodha wa anyakoddo odha vàliye, amunlelaga 6 dhahi: “Eh Nabuya! Mwimeleli waga muredda vaddiddi, oli vakamani, kanwodha ovenya vina onotabuwa venjene.” 7 Iyene omwaddela: “Ddigafiyawo, ddinele omvulumutxa.” 8 Mwimeleliyá wa anyakoddo omwaddela: “Nabuya, kaddinfwanyela ouwakelani vatakulu vaga, mbwenyi mugaloga bahi, mwimeleli waga onele ovulumuwa. 9 Vowi miyo vina ddili muttu onawiwelela abale anddittonga; ddikaana anyakoddo analamulemi. Ddigaloga na mmodha, ‘Kadhowa,’ iyene onodhowa; ddigamwaddela mwina, ‘Kadhawuno,’ iyene onodha; ddigaloga na mudhari waga, ‘Kakosa eji,’ iyene onokosa.” 10 Yezu mwiwaliye mazu abo, otikina venjene vina ohiloga na abale amfwara: “Ddinouwaddelani ebaribari, mw’Izrayel kaddinfwanyilemo muttu wa nroromelo ninddimuwa ninga oddu. 11 Ddinouwaddelani, enjene anele odha omadhelo wa nzuwa na omaddowelo, wila agilati vameza vamodha na Abrahamu, Izaki na Jakob, Mumweneni wa wirimu; 12 vano abale anfwanyelela Omweneyá anele oponyedhiwa otakulu widdimani. Wenewo anele wunla na okubanya onddimuwa vaddiddi.”* 13 Yezu ohiloga na mwimeleli ole wa anyakoddo: “Kadhowa, epadduwe mowiwanana na nroromelo nawo.” Mudhidhene obule mwimeleliyá ovulumuwa.
14 Mfiyedhiye vatakulu va Pedro, Yezu omona nyezeli wa Pedro bali vakamani, wanna febiri. 15 Vasogorhova, omuttidda nlada, febriyá evira, iyene ovenya vina oroma wapiyela. 16 Muribele vati, attukuleliwa vàliye attu enjene avolowiwe muya dhabure; iyene wanlamula, muyadhá dhanttawa, vina ohavulumutxa attu otene atabuwa, 17 wila akwanihedheye mazu a namavuhulela Izaiya walogile: “Iyene ottukula viredda dhehu vina onakela makattamiho ehu.”
18 Yezu moneliye wi vahikala muttitti mwinjene, ohakumbirha anamasunza aye wila abuwele kobela yina. 19 Namasunziha malamulo dhahi, ofiya vàliye, ohiloga: “Namasunziha, miyo ddinele oufwarani wego-wegovi ondhowa nyuwo.” 20 Vano Yezu omwakula: “Minyinga dhikana gurugudha dhawa, balame dhodhulu dhikana dhinddara dhawa, mbwenyi Mwana-muttu kanna mburo wogona.” 21 Namasunza mwina vina ohiloga: “Nabuya, karomani oddittiya ddidhowe ddamwinteri babaga.” 22 Yezu omwakula dhahi: “Weyo oddifwaregevi, wattiye amarafula enterigina amarafulavi.”
23 Iyene owela mmwanddiyani, anamasunza aye ahinfwara. 24 Venevo, ehiroma woba pevo enddimuwa munyaza, yatatamulile manebe, mbwenyi Yezu wela ogona. 25 Awene adhowa omvenyiha alogaga: “Nabuya munivune, ninfuna okwa!” 26 Yezu ohawakula: “Nyuwo attu oyeva nroromelo, munovela nni dhahene?” Iyene ovenya, onyanyuwela pevo na nyazayá, dhotedhene dhimaala noo. 27 Otene atikina, aroma ovuzana: “Ngani mulobwanayá oddu bani? Onwodha olamula, ofiyedha pevo na nyazayá omwiwelela.”
28 Mvaddelelani kobela yina, murudda wa Agadareno, alobwana eli avolowiwe muya dhabure, abudduwa vamasiye amugwaddela. Awene àli owopiha vaddiddi, nona dilayá kiyavireya. 29 Mmonelani, aroma okuwa: “Weyo Mwana Mulugu, onfuna nni na iyo, odhele onitolotxa nsakana nihinafiya?” 30 Wolapela-wene, wahikala guluwe dhinjidhene dhasapa. 31 Venevo muya esile dhabure, dhiroma omuttidda myeddo dhilogaga: “Akala ononittamagiha, onirumelihe ovolowa muguluweni.” 32 Iyene ohiloga: “Kadhowani!” Muyadhá eso dhittamagela muguluweni, guluwedhá dhittamagela munyaza, dhibwina, dhikwela mwenemo. 33 Mbwenyi abale asapiha guluwedhá attawa, avolowa musidadi vina alaleya dhotene dhipadduwile, n’esiledhá dhapadduwele abale avolowiwe muya dhabure. 34 Attu otene a musidadi abudduwa adhowa ogumana na Yezu, mmonelani amukumbirha obudduwamo musidadimwá.