Nivuru Naga Na Mapadduwo A Bibilia

Mazu ovolowana

NTHI nivuru na mapadduwo a txibarene. Aba athukuliwe mu nivuruni nddimuwa vaddiddi na elabo yotene, Bibilia. Mapadduwoya anowuvaha dhowireya dha mwilaboni ovenya mudhidhi oromile Mulugu othandda mpaka nsaka nehu na ovanene. Aba anologa vina ejile eroromelihile Mulugu okosa musogorho.

Nivuru nthi ninowuvaha moonelo wa yotene ejile eli Bibilia. Nthi ninologa mwaha wa athu a mBibiliani vamodha na dhilobo dhikosilani. Nthi vina ninolagiha njeedhelo nddimuwa na egumi ya mukalakala mparaizu wa elabo ya vati ninavahaga Mulugu athu.

Mu nivuruni mpu muli mapadduwo 116. Aba agumanihiwe mu dhipaddi tanu na tharu. Nikuku nili omaromo wa kadda epaddi ninologa vañgono esile dhinfanyeya mwipaddini eji. Mapadduwoya alebiwe mofarihedhana ninga mukoseyeli dhowireyadha. Eji enowukamiha osunza mudhidhi opadduwile dhilobo mmapadduwoni, moladdaniha na dhokoseya dhiina.

Mapadduwoya anlogiwa na mazu oohirutxa. Enjene mwa nyuwo aima munela owodha wengesa mwanya. Nyuwo ababi munela ozinddiyela wila ana enyu añgono anela oziveliwa wila mwawengeselege mapadduwo aba wili wili. Munela woona wila nivuru nthi nihikaana dhilobo vaddiddi dhinziveliwa nyuwo azombwe vina anddimuwa.

Malebo a Bibilia ahimala olebiwa omagomelo wa kadda nipadduwo. Munokokomeziwa wila mwengesege dhipaddi esi dha Bibilia mwenemwa munfanyeya mapadduwoya.