EPADDI 1

Omathanddiwelo Mpaka Va Mpuloni

Erimu na elabo ya vati dhidhile wuvi? Koddi nzuwa, mweri na neneri, vina dhilobo dhinji dhili velaboni ya vati dhidhile okalawo dhavi? Bibilia onovaha yowakula ya ebaribari agalogaga wila esi dhithanddiwe na Mulugu. Noona nivuru nehu ninroma na mapadduwo a Bibilia a omathanddiwelo.

Ninsunza wila dhoothanddiwa dhooroma dha Mulugu, aali athu a omuyani ooladdana vañgono na iyene. Awene aali angelo. Mbwenye elabo ya vati yathanddeliwe athu ninga iyo. Noona Mulugu wahimuba mulobwana na muyana aatxemerhiwa Adamu na Eva nanda wahawika mmunddani wokoddela. Mbwenye awene ahinvanya Mulugu nanda awene ahiyeleela ofanyeelela okalagawovi.

Mwa dhotene, ovenya othanddiwa wa Adamu mpaka va Mpuloni munddimuwa, dhivirile vyaka 1.656. Mwari mwa mudhidhene obu athu enjene abure aahikalawo. Odhulu, wahikala athu oohoneya a omuyani, Satana na angelo aye abure. Velaboni ya vati, vaahikala Kaini na athu ena enjene abure, vamodha na athu ena a guru dhotikiniha. Mbwenye velaboni ya vati vaahikala vina athu aderetu​—Abeli, Enoki na Noe. Mu Epaddi YOROMA ninela wengesa mwaha wa athu aba na dhowireyedha.