NIPADDUWO 1
Mulugu Ohiroma Okosa Dhilobo
DHILOBO dhotene dhaderetu dhinihuna dhidhile wa Mulugu. Iyene wahikosa nzuwa wila ninivahege txeza na omutana, vina mweri na neneri wila nikaanege muna txeza na mathiyu. Vina Mulugu wahikosa elabo ya vati wila iyo nikalegevo.
Mbwenye nzuwa, mweri, neneri na elabo ya vati kadhali dhilobo dhoroma dhakosile Mulugu. Weyo onoziwa txini yaromile? Voroma Mulugu wahakosa athu ninga iyene. Iyo kaninwodha wawoona athu aba, ninga muhinwodhelihu omoona Mulugu. Mbibiliani athu aba antxemerhiwa angelo. Mulugu wahakosa angelo wila akalege na iyene odhulu.
Mungelo woroma wamukosile Mulugu wali wa va woka vaddiddi. Oddu wali Mwana woroma wa Mulugu, vina iyene wahilaba na Babi waye. Iyene wahimukamiha Mulugu okosa dhilobo dhiina dhotene. Iyene wahimukamiha Mulugu okosa nzuwa, mweri, neneri vina elabo yehu ya vati.
Elabo ya vati yali dhavi? Omaromo kavo muthu wakala velaboni ya vati. Kavaali elobwene mbwenye bara munddimuwa ddaali va mathakani otene. Mbwenye Mulugu wanfuna wila athu akalege velaboni ya vati. Noona iyene wahiroma onisasanyedha dhilobo. Iyene wakosile eni?
Voroma, elabo ya vati yanfuna txeza. Noona modheela nzuwa Mulugu wahikosa txeza wila emoneyege elabo ya vati. Iyene wakosile wila vakalege midhidhi mili, mathiyu na mutana. Mumaleliye Mulugu wahipaddutxa mathaka odha vadhulu va bara.
Voroma va mathakani kavaali elobo. Yooneya ninga nladdaniho ninooniwe apa. Kavaali marhuwa obe miri obe dhinama. Nne vina mbara kamwaali oba. Mulugu wahikaana mabasa menjene a okosa a osasanyedha deretu elabo ya vati wila vakalege dhinama vamodha na athu.
Jeremiya 10:12; Kolosi 1:15-17; Wita 1:1-10.