NIPADDUWO 7
Mulobwana Woliba Murima
VOWILA muthengo wa athu wahiroma winjiva velaboni ya vati, enjiya mwa athu aba ankosa dhilobo dhabure ninga Kaini. Mbwenye mulobwana mmodha kaaligana na awene. Iyene ddi mulobwana oddu ontxemerhiwa Enoki. Enoki wali mulobwana woliba murima. Athu otene aamurijile iyene ankosa dhilobo dhabure vaddiddi, mbwenye Enoki wahididelavi omulaba Mulugu.
Weyo onoziwa sabwa yakosela athu a nsaka nthile dhilobo dhinjidhene dhabure? Kobuwela, Bani wamutoteli Adamu na Eva onvanya Mulugu nanda oja musapo walogile Mulugu wila kaje? Indde, oddu wali mungelo wabure. Bibilia onimutxemerha Satana. Nanda iyene onotamela wakosiha athu otene okala abure.
Siku nimodha Yehova Mulugu wahimuruma Enoki wapanga athu elobo yahaafunani wiwa. Yali eji: ‘Siku sikuvi Mulugu onela watolotxa athu otene abure.’ Txino athuya aahisilidheya vaddiddi sabwa ya wiwa ejene. Txino aahitamela ompa Enoki. Noona Enoki wanfanyeela okala woliba murima vaddiddi wila aapange athu mwaha wa ejile yafuna okosa Mulugu.
Mulugu kamuthiyile Enoki okalawo mudhidhi mwinjene vari va athu abale abure. Enoki okalilewo bahi vyaka 365 dha obaaliwa. Ninlogela eni “bahi vyaka 365”? Sabwani masiku abale athu anvadda vaddiddi opitha ovanene nanda angoneela vaddiddi. Ji sabwa ya ejene yakaleliwo mwana Enoki Metusalemi vyaka 969 dha obaaliwa!
Dhaene, mukweli Enoki, athu ahidhowa bagathabwavi. Bibilia onloga wila: ‘Dhilobo dhotene dhobuwelani mudhidhi wotene dhali dhabure,’ nanda ‘elabo ya vati yahidha odhaala otimbwini.’
Weyo onoziwa sabwa modha yakalelitxiwo makathamiho velaboni ya vati mmasikuni abale? Sabwani Satana wahikaana mukalelo muswa wa wakosihana athu dhilobo dhabure. Ninela osunza mwaha wa eji vasogorho.
Wita 5:21-24, 27; 6:5; Aebreo 11:5; Yuda 14, 15.