NIPADDUWO 20
Dina Ohivitotela Makathamiho
WEYO onowawoona Dina anabageliye wawoona? Iyene ondowa awoone anayana ena ankala elabo ya o Kana. Babi waye Yakobi onela oziveliwa ejene? Mwa okamiha wakula nivuzo nthi, katamela wubuwela ejile yobuwela Abramu na Izaki mwaha wa ayana a o Kana.
Abramu wahifuna wila mwana waye Izaki amutele mwanamuyana wa o Kana? Nne, iyene kaafunile. Izaki na Rebeka aahifuna wila mwana wawa Yakobi amutele mwanamuyana wa o Kana? Nne, awene kaafunile. Weyo onoziwa sabwaya?
Sabwani athu aba a mu Kana annawebedha amilugu ahili a ebaribari. Awene kaali athu aderetu a ofanyeela okaana ninga amamuni vina ateliwi, nanda awene kaali athu aderetu a ofanyeela okaana ninga amarho vaddiddi. Noona iyo podi okaana ebaribari yawila Yakobi kanahagalale sabwa yawila mwana waye wankosa omarho na anayana aba a o Kana.
Txibarene wene, Dina wahivitotela makathamiho. Onomoona mulobwana oddule wa mukudda Kana oli va nladdanihoni bagamwañgana Dina? Nzina naye ddi Sikemu. Siku nimodha Dina mwadheeliye wawoona anayana a o Kana, Sikemu wahimuthidda Dina nanda bammagelela ogona na iyene. Eji yali yabure, sabwani alobwana na ayana atelanile bahi banfanyeela ogona vamodha. Elobo eji yabure yamukoseli Sikemu Dina yahitota makathamiho mena menjene.
Arogori a Dina mwewelani ejile yapadduwile, awene aahiludduwa vaddiddi. Eeli mwa awene, Simeoni na Levi, aahiludduwa vaddiddi mpaka othukula masupadda nanda badhowa mu sidadi nanda baathidda alobwanaya morurumutxa. Awene vamodha na abali awa aahimpa Sikemu vamodha na alobwana ena otene. Yakobi wahiludduwa sabwani ana aye aahikosa elobo eji yabure.
Makathamiho aba otene aaromile dhavi? Sabwani Dina wahikosa omarho na athu aakodda wiwelela malamulo a Mulugu. Iyo kaninfuna okosa omarho ninga obwene, kayo mwenemo?
Wita 34:1-31.