NIPADDUWO 17
Anakono Aali Oothiyana
ANALOBWANA aba eeli ali apa bothiyana vaddiddi, kayo mwenemo? Weyo onoziwa mazina awa? Namatota ddi Ezau, nanda mwanamulobwana onkumbuza mabila ddi Yakobi.
Ezau na Yakobi aali ana anakono a Izaki na Rebeka. Babiya, Izaki, wanziveliwa vaddiddi Ezau, sabwani iyene wali namatota waderetu nanda wandana vatakulu dhoja wila murala ojege. Mbwenye Rebeka wamukweletxa Yakobi, sabwani iyene wali mwanamulobwana wofwaseya, wa murenddele.
Bibi Abramu wali baliwo, nanda iyo podi wubuwela mukalelo waziveliwa Yakobi onvuruwana iyene bagaloga mwaha wa Yehova. Omagomelowa Abramu ohikwa na vyaka 175, anakonoya bana vyaka 15 dha obaaliwa.
Ezau mwakaaneliye vyaka 40 dha obaaliwa iyene wahatela ayana eeli a elabo ya o Kana. Eji yahimusilidha vaddiddi Izaki na Rebeka, sabwani ayana aba kamwebedha Yehova.
Venevo siku niina yahipadduwa elobo yamuludduwihile vaddiddi Ezau momusadduwela mbali waye Yakobi. Wahifiya mudhidhi wa Izaki omureeliha mwana waye munddimuwaya. Vowila Ezau wali munddimuwa opitha Yakobi, Ezau wanjedhela wakela nreeliho nthi. Mbwenye Ezau wahimala omugulihedha Yakobi ofanyeelela wa wakela nreeliho. Vina analobwana aba eeli mwabaaleliwani Mulugu wahiloga wila Yakobi agahakela nreeliho. Nanda ji ejene yapadduwile. Izaki wahimureeliha mwana waye Yakobi.
Musogorho, Ezau mwaziweliye eji iyene wahiludduwa na Yakobi. Iyene wahiludduwa vaddiddi mpaka ologa wila onela ompa Yakobi. Rebeka mweweliye ejene, iyene wahizuzuma vaddiddi. Noona iyene wahimpanga mamuni waye Izaki dhahi: ‘Enakale yowopiya txibarene akala Yakobi onomutela vina mmodha mwa ayana aba a mu Kana.’
Venevale Izaki wahimutxemerha mwana waye Yakobi nanda wahimpanga dhahi: ‘Kumutele wene muyana wa o Kana. Mbwenye kadhowa vatakulu va bibi wawo Betueli o Hara. Kamutele mmodha mwa ana a mwana waye Labani.’
Yakobi wahinvuruwana babi waye, nanda mohigoneela wahiroma oleddo waye wolapa mpaka okule wakala amudhi aye o Hara.
Wita 25:5-11, 20-34; 26:34, 35; 27:1-46; 28:1-5; Aebreo 12:16, 17.