Jakobi Onohalana Nifumo

Izaki vaniye vyaka 40 omutela Rebeka. Iyene wannimukwela vaddiddi. Mugumanelani, ahabala aima eeli—anakono.

Woromaya nzinanaye wali Ezaú, womarihaya wali Jakobi. Ezaú kakaletxa vatakulu, sabwa iyene wali namasapa. Jakobi waziveliwetxa okala vatakulu.

Masakene abo mwana wa muttajiya wanvahiwa dhilobo dhinji, akala babe wela okwa. Ejoya yakuweliwa nifumo. Murala wa Izaki, wahikana nifumo napama-wene: okala ziza nalibeleli Yehova onvaha Abramu. Ezaú kasirirha esuwene, mbwenye Jakobi wanziwa wila aboya ali malibelo aderetu.

Siku dhahi Ezaú bageyela omasapelo, wahilema vaddiddi. Iyene ohiwa onukela wa yoja yapiya Jakobi, omulogana dhahi: ‘Ddinokwa na dala! Karoma oddivaha sorhoko onimpiya weyo!’ Jakobi amwakula: ‘Weyo ogaddilibelela oddittiyedha nifumo nawo, ddinouvaha sorhoko.’ Ezaú omwiyihedha: ‘Nifumo ninddira eni? Kaddivahe yoja ddije. Ntto nifumo weyo ohalena.’ Weyo onubuwela ninga eji yakosile Ezaú yali yaderetu? Kiyali yaderetu. Ezaú ovaha nifumo naye sabwa ya muziyo wa sorhoko.

Muluvaleli Izaki, iyene wahifuna wi amururihe mwanaye muttajiya wi anvahe nifumo. Oku Rebeka bagamukamihedha Jakobi mwana wʼettogoyiya wi ahalena nifumona. Muziweli Ezaú wi Jakobi wafuna ahalena nifumo, wahisilidhiwa vaddiddi mpaka otamela ompa. Izaki na Rebeka afuna ambarele Jakobi, noona amwaddela: ‘Kadhowa wakalege na murogori wa mamayawo, Labau, mpaka Ezaú okurumuwa.’ Jakobi ohiwa malago a amambali aye, ohivenyavo.