NIPADDUWO 28
Nyenye Moize Wavuniwe Dhavi
KAMOONE nyenye oddu muñgono bagalila, vina bathiddeeli ebuno ya nyanyi. Oddu ddi Moize. Weyo onomuziwa bani nyanyi oddu wokoddela? Iyene musano wa mukudda Ejipito, mwana wa mwinyene Farao.
Mai wa Moize wahinvita nyenye waye mpaka okaana myeri miraru dha obaaliwa, sabwani iyene kafuna wila mwana waye apiwe na akudda Ejipito. Mbwenye iyene wahiziwa wila Moize agahifanyiwa, noona ji ejene yakosiliye wila anvune iyene.
Iyene wahithukula muddanga nanda basasanyedha deretu wila muhivolowe manje. Mumaleliye iyene wahimwikamo Moize, nanda beka muddangaya mmanini oolapa nikome na Mwinje Nilu. Murogori wa Moize, Miriamu, wahipangiwa wila eemele vakukuvi nanda oone txini egapadduwile.
Mohigoneela mwana wa muyana wa Farao wahidha ohaba mMwinjeni Nilu. Morurumutxa iyene wahoona muddanga mmanini oolapa. Iyene wahimutxemerha mudhari waye mmodha wa mwanamuyana: ‘Kaddidhowelele muddanga obule.’ Musano mwafuguleliye muddangaya, mukoddelelo gani wa nyenye wamooniliyemo! Moize muñgono wela olila, nanda musano wahimweddela thagaraga. Iyene kafuna wila nyenye oddu apiwe.
Vasogorhova Miriamu wahithwanyuwa. Weyo podi omoona iyene va nladdanihoni. Miriamu wahinvuza mwana wa muyana wa Farao dhahi: ‘Ddidhowe ddamutxemerhe muyana wa Muizraeli wila owamwihedheni nyenye oddu?’
Musano wahiloga wila: ‘Indde kadhowa.’
Noona Miriamu wahithamaga na omaguva wila ampange mai waye. Mai wa Moize mwafiyeliye va musano, musanoya wahiloga dhahi: ‘Kamuthukule nyenye oddu nanda kaddamwihedhe, ddigamala miyo ddinela wuthambirhiha.’
Noona mai wa Moize wahimukoya mwana waye. Vasogorhova Moize munuweliye deretu, iyene wahimuthukulela wa mwana wa muyana wa Farao, oddulene wamuthukulile ninga mwana waye wa ombaala. Bu mukalelo obu wadhile Moize wunuwa vatakulu va Farao.
Obudduwa 2:1-10.