NIPADDUWO 29
Moize Wathawelini
KAMWAÑGANE Moize bagathawa mu Ejipito. Onowawoona alobwana aba animuthamagiha? Weyo onoziwa sabwa enfunelani ompa Moize? Ndoweni noone akala ninela oziwa sabwaya.
Moize wonuwile vatakulu va Farao, mulamuleli wa Ejipito. Iyene wahidha okala mulobwana wa zelu vina munddimuwa vaddiddi. Moize wahiziwa wila iyene kaali mukudda Ejipito, mbwenye yawila amambali aye a txibarene aali adhari Aizraeli.
Siku nimodha, bana vyaka 40 dha obaaliwa, Moize wahubuwela odhowa woona mukalelo wali nlogo naye. Mukalelo weeddihiwani wali wowopiya vaddiddi. Iyene wahimoona mukudda Ejipito bagambubudda mudhari wa Muizraeli. Moize wahañgana noku noku, nanda vakooddiliye omoonawo muthu bagañgana, iyene ohimbubudda mukudda Ejipito oddule, nanda mukudda Ejipito oddule wahikwa. Venevale Moize wahivita maningoya mmutxesani.
Mmangwananimwa Moize wahidhowa woona wili nlogo naye. Iyene wobuwela wila agahiwodha wakamiha awene ahikale adhari viina. Mbwenye iyene wahawoona alobwana eeli Aizraeli bagawana, noona Moize wahimpanga oddule wakoneyile dhahi: ‘Weyo onimbubuddela eni mbali wawo?’
Mulobwana oddule wahiloga dhahi: ‘Bani wuthomile weyo ninga mulamuleli vina namathonga wehu? Onfuna oddipe ninga ejile empiliwe mukudda Ejipito oddule?’
Veneva Moize wahidha wova. Iyene wahiziwa wila athu aahizinddiyela ejile yamukoseliye mukudda Ejipito. Masiki Farao wahiwa mwaha obu, nanda iyene waharuma alobwana wila ampe Moize. Ji sabwa ya ejene yafanyeeli Moize othawa mu Ejipito.
Moize mubudduweliye mu Ejipito, iyene wahidhowa wolapela, murudda wa Midiani. Wenewo iyene wahigumana na murala wa Jetru, nanda wahimutela mmodha mwa ana aye watxemerhiwa Zipora. Moize wahidha okala mukumbuzi nanda wahifuwa mabila a Jetru. Iyene wahikala mmuruddani mwa Midiani vyaka 40. Venevale iyene wana vyaka 80 dha obaaliwa. Venevo siku nimodha, Moize bagakumbuza mabila a Jetru, yahipadduwa elobo ya wumiha milomo yasaddulile egumi yotene ya Moize. Kafugula nikuku nindawo, nanda ndoweni noone elobo eji ya wumiha milomo txini.
Obudduwa 2:11-25; Merelo 7:22-29.