NIPADDUWO 30
Nikupu Ninthidda Motho
MOIZE waheedda dila yotene mpaka vamwangoni Orebe wila afanye mpodda wa mabila aye. Veneva iyene wahoona nikupu banigathidda motho, mbwenye nthina kanaazwa!
Moize wahubuwela: ‘Eji jotikiniha. Kamahi ddaddamele wila ddoone deretu.’ Mwakoseliye eji, vanikupuniva vaahibudduwa lizu banigaloga dhahi: ‘Kuwaddamele apano. Karula sandalia dhawo, sabwani weyo wimelile vamathakani ookoddela.’ Oddu wali Mulugu waloga modheela mungelo, noona Moize wahikuneela kove yaye.
Mumaleliye Mulugu wahiloga dhahi: ‘Ddinowoonaga goi ya nlogo naga mu Ejipito. Noona ddinfuna ddaafurule awene, nanda ddi weyo onfunimi omuruma wila asogorhele nlogo naga obudduwa mu Ejipito.’ Yehova wafuna athukulele nlogo naye elabo yokoddela ya Kana.
Mbwenye Moize wahiloga dhahi: ‘Miyo kaddili elobo. Ddinakose dhavi eji? Kowiliwa miyo ddihidhowa. Aizraeli agahiddilogela wila: “Wurumile bani?” Venevo ddinaloge eni?’
Mulugu wahakula wila: ‘Kaloga dhahi’ ‘“YEHOVA Mulugu wa Abramu, Mulugu wa Izaki vina Mulugu wa Yakobi ddiddirumile wa nyuwo.”’ Vina Yehova wahenjedhedha: ‘Nthi thi nzina naga na mukalakala.’
Moize wahakula dhahi: ‘Kowiliwa awene kanddirumeela ddigapanga wila nyuwo muhiddiruma.’
Mulugu wahinvuza dhahi: ‘Eli mmadani mwawo txini?’
Moize wahakula dhahi: ‘Mukongozo.’
Mulugu wahiloga dhahi: ‘Kavokedha vati.’ Nanda Moize mwakoseliye eji, mukongozoya wahisadduwa bukala nowa. Mumaleliye Yehova wahimulagiha Moize ntikiniho niina. Iyene wahiloga dhahi: ‘Keeka nlada nawo mwari mwa kapoti wawo.’ Moize wahikosa eji, nanda mwaburutxeliye nlada naye otakulu, nthi nali notxena ninga neve! Nladana nali ninga nakaanile eredda yabure entxemerhiwa maranya. Vasogorhova Yehova wahinvaha Moize ewodhelo ya okosana ntikiniho nanoraru. Omagomelowa iyene wahiloga dhahi: ‘Ogakosa matikiniho aba Aizraeli anela orumeela wila miyo ddihuruma.’
Mumaleli eji Moize wahidhowa vatakulu nanda wahimpanga Jetru dhahi: ‘Ddinowukumbirhani wila muddithiye ddiyelele wa amudhi aga wiJipito wila ddawoone mukalelo olani.’ Venevale Jetru wahimpaganya Moize, nanda Moize wahiroma oleddo waye wowiyelela wiJipito.
Obudduwa 3:1-22; 4:1-20.