NIPADDUWO 35
Yehova Ohivaha Malamulo Aye
OTHAMAGELA myeri mili mumalelani obudduwa mu Ejipito, Aizraeli ahifiya va Mwangoni Sinai, obwene ontxemerhiwa vina Orebe. Obu bu mburo wakakene walogile Yehova na Moize va nikupuni ninthidda motho. Nlogo nihisama veneva vina nihikalavo mudhidhi muñgonovi.
Oku nlogona banigajeedha mutxiddo, Moize ohiwela mwango. Wenewale odhulu omutompini wa mwango, Yehova ohimpanga Moize wila Iyene onfuna wila Aizraeli amwiwelelege Iyene nanda akale nlogo Naye na va woka. Moize mutiteliye, iyene ohapanga Aizraeli esile dhalogile Yehova. Nanda nlogona nihiloga wila awene anela omwiwelela Yehova, sabwani anfuna akale nlogo naye.
Ovanene Yehova ohikosa elobo yotikiniha. Iyene ohikosiha mutompiya wa mwango othuwela witxi, vina ohitota jai yoruma vaddiddi. Iyene vina ohiloga na nlogo: ‘Miyo ddili Yehova Mulugu wenyu oddwene wuburutxileni mu Ejipito.’ Mumaleliye iyene ohilamula: ‘Kamwawebedhe amilugu ena muddebedhe miyo bahi.’
Mulugu ohavaha Aizraeli malamulo mena matanu na manai. Athu anowova vaddiddi. Awene ahimpanga Moize: ‘Kaloga weyo na iyo, sabwani iyo ninowova akala Mulugu onologa na iyo ninela okwa.’
Musogorhomwa Yehova ohimpanga Moize: ‘Kawela omwangoni okuno. Ddinela wuvaha myarha mili dhopepeya veneva valebilimi malamulo anfunimi wila nlogo nikoyege.’ Noona Moize ohiwela wili va mwangoni. Mwari mwa omutana na omathiyu 40 iyene ohikala venevale.
Mulugu ohikaana malamulo menjene vaddiddi wa nlogo naye. Moize ohileba malamulo aba. Mulugu vina ohinvaha Moize myarha esile mili dhopepeya. Va myarhani esi, Mulugu mwinyene wahilebavo malamulo 10 abale aapangiliye nlogo notene. Aba antxemerhiwa Malamulo Kumi.
Malamulo aba Kumi bofuneya. Ninga vina malamulo mena menjene aavahile Mulugu Aizraeli. Nimodha mwa malamulo aba thi nthi: ‘Onofanyeela omukwela Yehova Mulugu wawo na murima wawo wotene, mubuwelo wawo wotene, egumi yawo yotene vina guru yawo yotene.’ Nanda niina thi nthi: ‘Onofanyeela omukwela mwaddamani wawo ninga weyene.’ Mwana Mulugu, Yezu Kristu, wahiloga wila aba ba malamulo meeli manddimuwaya abene aavahile Yehova nlogo naye Izraeli. Musogorho ninela osunza dhilobo dhinjidhene mwaha wa Mwana Mulugu vina masunziho aye.
Obudduwa 19:1-25; 20:1-21; 24:12-18; 31:18; Deuteronomo 6:4-6; Onamakutha 19:18; Mateus 22:36-40.