NIPADDUWO 49
Nzuwa Nihiimela
KAMWAÑGANE Josue. Iyene onologa dhahi: ‘Nzuwa, keemela!’ Nanda nzuwana nihiimela. Nthi nihikala wenewale vari va nthabo mpaka siku notene. Yehova ohikosiha eji opadduwa! Mbwenye ndoweni noone sabwa enfunela Josue nzuwa woobagavi.
Amwene abale abure atanu a elabo ya Kana muromelani oraba koddo na akudda Jibeau, akudda Jibeau ahimuruma mulobwana wila amukumbirhe Josue nikamihedho. Iyene ohiloga dhahi: ‘Kamaguvani, kadhawunoni munivune! Amwene otene a murudda wa mu thukuwani ahidha oraba koddo na adhari enyu.’
Mohigoneela Josue na anyakoddo aye otene ahidhowa. Aheedda omathiyu wotene. Mufiyelani o Jibeau, anyakoddo a amwene abure atanu anowova nanda ahiroma othawa. Mumaleliye Yehova ohimothiha maralala manddimuwa ovenyedha odhulu, nanda anyakoddo enjiya ahikwa sabwa ya obubuddiwa na maralala opitha abale apiwe na anyakoddo a Josue.
Josue ohoona wila mohigoneela nzuwa ninela oddowela. Vati vanela oriba, nanda anyakoddo enjene a amwene abure atanu anela othawa. Noona ji sabwa ya ejene elobeleli Josue wa Yehova nanda mumaleliye baloga dhahi: ‘Nzuwa, keemela!’ Nanda nzuwana mukalelani banigoobavi, Aizraeli ahiwodha ogomiha vina opemberha koddoya.
Mu Kana muhikalavi amwene ena abure enjene abene anidda nlogo na Mulugu. Eji ehimuthukulela Josue na nikuru naye na anyakoddo othamagela vyaka tanu na modha wila aapemberhe amwene 31 mwilabonimwa. Mukoseliwe ejene, Josue ohisasanyedha wila elabo ya Kana egaweliwe maziza abale anfuna murudda.
Vyaka dhinjidhene dhihivira, nanda omagomelowa Josue ohikwa na vyaka 110 dha obaaliwa. Iyene na amarho aye baliwo, athu annimwiwelela Yehova. Mbwenye alobwana aba aderetu mukwelani, athu ahiroma okosa dhilobo dhabure nanda ovitotela makathamiho. Veneva pafunani txibarene nikamihedho na Mulugu.
Josue 10:6-15; 12:7-24; 14:1-5; Anamathonga 2:8-13.