NIPADDUWO 48
Akudda Jibeau A Zelu
OVANENE sidadi dhinjidhene mu Kana dhihimala ovisasanyedha wila dhirabe koddo na Izraeli. Awene anubuwela ninga podi opemberha. Mbwenye nlogo na mu sidadi yaddamelile ya Jibeau kaninubuwela dhaene. Awene anorumeela wila Mulugu onowakamiha Aizraeli, nanda awene kanfuna oraba koddo na Mulugu. Noona weyo onoziwa txini enkosa akudda Jibeau?
Awene ahigana ovikosiha okala ninga ankala wego wolapela vaddiddi. Noona alobwana ena ahabala guwo dhootaya na sandalia dhoolala. Awene ahathukuliha abulu awa saku dhowaseya, vina ahithukula mikathe dhiñgonovi dhawale dhowuma. Mumalelani awene ahidhowa wa Josue nanda ahiloga dhahi: ‘Nidhile wilaboni yolapela vaddiddi, sabwani nahiwa mwaha wa Mulugu wenyu munddimuwa, Yehova. Nahiwa dhilobo dhotene dhukoseliyeni mu Ejipito. Noona asogorheli ehu aahinipanga wila nithukule dhoja dhiñgonovi nivisasanyele oleddo wila nidhe wa nyuwo nanda nupangeni eji: “Nili adhari enyu. Kalibelani wila kamunaarabe koddo na iyo.” Nyuwo podi woona wila guwo dhehu dhihaseya sabwa ya oleddo onddimuwa vina mikathe dhehu dhihidha ovudda vina wuma.’
Josue na asogorheli ena aharumeela akudda Jibeau. Noona awene ahilibela wila kanaarabe koddo na awene. Mbwenye muvireli masiku mararu awene ahiziwa wila akudda Jibeau ankala vakukuvi txibarene.
Josue ohavuza awene: ‘Munipangelini wila mwadhile wilaboni yolapela?’
Akudda Jibeau ahakula dhahi: ‘Nahikosa dhaene sabwani iyo nahipangiwa wila Mulugu wenyu Yehova wahilibela wuvahani elabo eji yotene ya Kana. Noona iyo nela wova wila nyuwo mugahinipa.’ Mbwenye Aizraeli ahithiddeelavi yolibela yawa, nanda awene kaapile akudda Jibeau. Othiya waapa, awene ahakosa ninga adhari awa.
Mwene wa Yeruzalemi ohiludduwa sabwa ya akudda Jibeau okosa murenddele na Izraeli. Noona iyene ohapanga amwene ena anai: ‘Mudhe muddikamihe oraba koddo na Jibeau.’ Nanda amwene aba atanu ahikosa wene ejene. Akudda Jibeau aali a zelu mwa okosa murenddele na Izraeli, vowila amwene aba ahidha oraba koddo na awene? Ninela woona.
Josue 9:1-27; 10:1-5.