NIPADDUWO 61
Davidi Ohikala Mwene
SAULI onotamela wili omuthidda Davidi. Iyene ohathukula anyakoddo aye 3.000 akaliletxe nanda ahidhowa omutamela Davidi. Davidi muziweliye eji, iyene oharuma anamareza wila aziwe okule osamile Sauli na anyakoddo aye omathiyu obule. Mumaleliye Davidi ohavuza eeli mwa alobwana aye: ‘Bani mwa nyuwo onadhowe na miyo o sanjarhani ya Sauli?’
Abizai ohakula: ‘Miyo ddinela odhowa’. Abizai ddi mwana wa Zeruia murogori wa Davidi. Sauli na alobwana aye bagagona, Davidi na Abizai ahiidela musanjarhanimwa. Awene ahithukulamo mwalago wa Sauli na murhingaya wa manje, obwene oli omusorho wa Sauli. Kavo wawoonile obe wawiwale awene sabwani otene anogona kakamwe.
Ovanene kamoone Davidi na Abizai. Awene ahimala othawa, nanda ali deretu omutompini wa thukuwa. Davidi ohimutxemerha mutxiddo kazembe wa nikuru na anyakoddo na Izraeli. ‘Abineri, onkooddela eni omwañganela nabuya wawo, mwene? Kañgana! Mwalago waye na murhingaya wa manje oli wuvi?’
Sauli ohirurumuwa. Iyene ohizindiyela lizu na Davidi, nanda ohivuza dhahi: ‘Ddi weyo Davidi?’ Onowodha omoona Sauli vamodha na Abineri mutxiddo mpule?
Davidi ohimwakula Sauli: ‘Indde, nabuya mwene.’ Nanda Davidi ohivuza: ‘Nyuwo muntamelela eni oddithidda? Elobo gani yabure ekosilimi? Nnyani mwalago wenyu, O, mwene. Kamuthiyeni mmodha mwa alobwana enyu adheele mwalago obu.’
Sauli ohirumeela wila: ‘Ddihikosa elobo yabure. Ddihikosa dha otaduwa.’ Venevale Davidi ohithukula dila yaye badhowa, nanda Sauli ohiyelela mmudhi. Mbwenye Davidi ohiloga yeka: ‘Nimodha mwari mwa masiku aba Sauli onela oddipa. Ddinofanyeela othawela elabo ya akudda Filistia.’ Nanda ji ejene ekosiliye. Davidi ohiwodha wanyengetha akudda Filistia vina wakosiha awene orumeela wila ovanene iyene oli mpaddi wawa.
Dila yina musogorhomwa akudda Filistia ahidhowa oraba koddo na Izraeli. Va koddoniva, oheeli Sauli na Jonatani ahipiwa. Eji ehimukosiha Davidi okubanya vaddiddi, nanda iyene ohileba jibo yoziva, mpwene mwibiliye dhahi: ‘Ddinowukubanyedha weyo, mbali waga Jonatani. Okwela gani wana miyo wa weyo!’
Mumaleli ejene Davidi ohiyelela o Izraeli o sidadi ya Hebroni. Ohikala koddo vari va alobwana abale amusakulile mwana Sauli Isbozeti wila akale mwene na alobwana ena anfuna wila Davidi akale mwene. Mbwenye omagomelowa alobwana a Davidi ahipemberha. Mudhidhi okaliliye mwene Davidi wana vyaka 30 dha obaaliwa. Mwari mwa vyaka tanu na biili na jiddiga iyene ohilamulela mu Hebroni. Ana ena abaaliwe wenewale antxemerhiwa Amnoni, Abisalau na Adonia.
Ohifiya mudhidhi wadhowile Davidi na alobwana aye othukula sidadi yokoddela entxemerhiwa Yeruzalemi. Joabe, mwana mwina wa murogori wa Davidi Zeruia, ohisogorhela koddoya. Noona Davidi ohimuthuva Joabe modheela omuthoma iyene ninga kazembe wa nikuru naye na anyakoddo. Ovanene Davidi ohiroma olamulela mu sidadi ya Yeruzalemi.
1 Samuwel 26:1-25; 27:1-7; 31:1-6; 2 Samuwel 1:26; 3:1-21; 5:1-10; 1 Map 11:1-9.