NIPADDUWO 62
Makathamiho Vatakulu Va Davidi
MUMALELI Davidi oroma olamulela mu Yeruzalemi, Yehova ohikamiha nikuru naye na anyakoddo wapemberha amwiddani awa dila dhinjidhene. Yehova wahiroromeliha wavaha Aizraeli elabo ya Kana. Nanda ovanene, na nikamihedho na Yehova, omagomelowa elabo yotene yaroromelihiwani ehikala yawa.
Davidi mulamuleli waderetu. Iyene onomukwela Yehova. Noona elobo modha mwa esile dhiromiliye okosa mumaleliye omuthukula Yeruzalemi ku odhana mwenemwale kasha ya nipagano ya Yehova. Nanda iyene onfuna amage mparha mpwene munfuniye wika kasha eji.
Vasogorhova mu egumini ya Davidi, iyene ohikosa yovirigana enddimuwa. Davidi ohiziwa wila jabure othukula elobo ya muthu mwina. Mbwenye otxuguwo dhahi, bali omutompini wa numba yaye ya mwene, iyene ohañgana mutxiddo nanda bamoona muyana wokoddela vaddiddi. Nzina naye ddi Bateseba, nanda mamuni waye ddi mmodha mwa anyakoddo a Davidi ontxemerhiwa Uria.
Davidi ononfuna vaddiddi Bateseba mpaka iyene omutxemerhiha odha va numbani yaye ya mwene. Mamuni waye kavo, odhowile okoddoni. Dhaene Davidi ohigona na iyene nanda musogorhomwa iyene ohizinddiyela wila Bateseba onela okaana mwana. Davidi ohizuzuma vaddiddi nanda ohiruma nzu wa kazembe waye wa anyakoddo Joabe wila amwike Uria osogorho wa koddo wenewo onapiwiye. Uria mukweliye, Davidi ohimutela Bateseba.
Yehova ohiludduwa vaddiddi na Davidi. Noona iyene ohimuruma mudhari waye Natani wila ampange mwaha wa dhothega dhaye. Weyo podi omoona Natani apale bagaloga na Davidi. Davidi ohitxinuwa vaddiddi sabwa ya esile dhikosiliye, noona Yehova kampile. Mbwenye Yehova ohiloga dhahi: ‘Sabwa ya weyo okosa dhilobo esi dhabure, onela okaana makathamiho menjene vatakulu vawo.’ Nga makathamiho gani ana Davidi!
Voroma, mwana wa mulobwana wa Bateseba ohikwa. Mumalelani Amnoni mwana wa muthajiya wa Davidi ohisasanyedha wila iyene na murogori waye Tamari akalevo woka nanda ohimmagelela ogona na iyene. Abisalau mwana wa Davidi ohiludduwa vaddiddi sabwa ya ejene mpaka ompa Amnoni. Vasogorhova, Abisalau ohigumela omarho na athu enjene a nlogo, nanda iyene ohivithoma mwinyene okala mwene. Omagomelowa, Davidi ohipemberha koddoya na Abisalau, oddwene opiwe. Indde, Davidi ohikaana makathamiho menjene.
Vari va esi dhotene, Bateseba ohimbaala mwana ontxemerhiwa Salomoni. Davidi muluvaleliye nanda bakala muredda, mwana waye Adonia ohitamela ovithoma mwinyene ninga mwene. Venevale Davidi ohimuruma namakutha ontxemerhiwa Zadoki okuthulela makura vamusorho va Salomoni wila alagihe yawila Salomoni onela okala mwene. Mohigoneela mumalelani Davidi ohikwa na vyaka 70 dha obaaliwa. Iyene wahilamulela vyaka 40, mbwenye ovanene Salomoni ddi mwene wa Izraeli.
2 Samuwel 11:1-27; 12:1-18; 1 Amwene 1:1-48.