NIPADDUWO 63
Salomoni Mwene Wa Zelu
SALOMONI odhile okala mwene bali muzombwe. Iyene onomukwela Yehova, nanda onofarihedha malago aderetu anvahile babi waye Davidi. Yehova onoziveliwa na Salomoni, noona omathiyu dhahi iyene ohiloga mu orohani: ‘Salomoni, ogaziveliwe wila dduvahe eni?’
Venevale Salomoni ohakula dhahi: ‘Yehova Mulugu waga, ddili mima vaddiddi nanda kaddinziwa olamulela. Noona kaddivaheni zelu wila ddilamulelege nlogo nenyu mmukaleloni onfanyeelela.’
Yehova ohiziveliwa ejile ekumbirhile Salomoni. Noona Iyene ohiloga dhahi: ‘Sabwani weyo okumbirhile zelu othiya egumi yogoneela obe dhoreela, ddinela wuvaha zelu yinjene, opitha muthu muthuvi wakalilegewo. Mbwenye vina ddinela wuvaha ejile ehikumbirhiliwe, dhobiili dhoreela vamodha na nthithimiho.’
Mudhidhi muñgonovi vasogorhova ayana eeli ahidha wa Salomoni na muladdu worutxa. Mmodha ohitapulela dhahi: ‘Muyana oddu na miyo ninkala numba modha. Miyo ddahimbaala mwanamulobwana, nanda masiku meeli vasogorhova iyene vina wahimbaala nyenye wa mulobwana. Mumalelani omathiyu dhahi nyenye waye wahikwa. Mbwenye miyo baddigagona, iyene ohimwika mwana waye wokwa waddamana na miyo nanda bamuthukula nyenye waga. Muvenyelimi nanda baddimwañgana mwana oddule wokwaya, ddahoona wila oddule kaali waga.’
Na ejene muyana oddule mwina ohiloga dhahi: ‘Nne! Mwana wa mento ddwaga, nanda oddu okwile ddwaye!’ Muyana woroma ohakula dhahi: ‘Nne! Mwana okwile ddwawo, nanda oddu wa mento ddwaga!’ Bu mukalelo ologile ayana aba. Salomoni onakose eni?
Iyene ohiruma wila nidhiwena supadda, nanda nthi mudheeliwanina, iyene ohiloga dhahi: ‘Kamugwaddeni nyenye oddu wa mento mpaddi mili, nanda munvahe kadda muyana mpaddi mmodha.’
Mambaliya wa txibarene ohikuwa: ‘Nne! Ddinowuthiddani myeddo kamumpe nyenyeya. Kanvaheni iyene!’ Mbwenye muyana mwinagu ohiloga dhahi: ‘Kamunvahe nne mmodha wa iyo; kamugwaddeni mpaddi mili.’
Omagomelowa Salomoni ohiloga dhahi: ‘Kumpe mwanaya! Kanvahedhe muyana woroma. Iyene ddi mambaliya wa txibarene.’ Salomoni ohiziwa eji sabwani mambali wa txibarene onomukwela nyenyeya vaddiddi mpaka ofuna onvaha muyana mwina wila anapiwe. Athu mwiwelani mukalelo othongile Salomoni muladdu obu, awene ahiziveliwa sabwa ya okaana mwene oddu wa zelu.
Vari va olamulela wa Salomoni, Mulugu ohireeliha nlogona modheela okosiha mathaka obaala vaddiddi tirigu na mayele, uva na figu vamodha na milima dhiina. Athu annabala guwo dhaderetu vina ankala mu numba dhaderetu. Ohikala dhilobo dhotene dhaderetu dhokwaranya dhowakwanela athu otene.
1 Amwene 3:3-28; 4:29-34.