NIPADDUWO 84
Mungelo Ohinfiyedha Maria
MUYANA oddu wokoddela ddi Maria. Iyene Muizraeli, onkala mu sidadi ya Nazareti. Mulugu ohiziwa wila iyene muthu waderetu vaddiddi. Ji sabwa ya ejene yamurumeliye mungelo waye Gabrieli wila aloge na iyene. Weyo onoziwa txini edheeli Gabrieli ompanga Maria? Ndoweni noone.
Gabrieli ohiloga dhahi wa iyene: ‘Mwenyi, nyuwo mudhaala mahala. Yehova oli na nyuwo.’ Maria kanamoonaga muthu oddu. Iyene ohizuzuma, sabwani kanziwa ejile entapulelani. Mbwenye mohigoneela Gabrieli ohimukurumutxa.
Gabrieli ohiloga dhahi: ‘Kuwove, Maria. Yehova ohiziveliwa vaddiddi na nyuwo. Ji sabwa ya ejene enfuneliye wukoselani elobo yotikiniha. Ovanenevi nyuwo munela okaana mwana. Nanda munela omutxemerha Yezu.’
Gabrieli ohidhowavi bagatapulela: ‘Mwana oddu onela okala munddimuwa, vina onela otxemerhiwa Mwana wa Mulugu Mudhulu-dhulu. Yehova onela omuthoma akale mwene, ninga mwakaleli Davidi. Mbwenye Yezu onakale mwene na mukalakala, nanda omwene waye txipo kunagome!’
Maria ohivuza: ‘Dhilobo esi dhotene dhinapadduwe dhavi? Miyo nne kadditeliwe. Kaddinakalege na mulobwana, ki ddinakaane mwana dhavi?’
Gabrieli ohakula: ‘Guru dha Mulugu dhinela wutitelani. Noona mwanaya onatxemerhiwe Mwana Mulugu.’ Mumaleliye iyene ohimpanga Maria: ‘Kamubuwele mmudhi wawo Elizabeti. Athu aahiloga wila iyene ohuluvala vaddiddi wila kagakaanile ana. Mbwenye ovanenevi iyene onela okaana mwana wa mulobwana. Noona koona yawila kuli elobo enimurutxa Mulugu.’
Mohigoneela Maria ohiloga dhahi: ‘Ddili mudhari wa Yehova! Eddipadduwele txibarene ninga mulogelinyu.’ Mumaleliye mungeloya ohidhowa.
Maria ohimaguvela odhowa omoona Elizabeti. Elizabeti mwiweliye lizu na Maria, nyenye mbani mwa Elizabeti ohilupa na othaba. Elizabeti ohidhaala muya wa Mulugu, nanda ohimpanga Maria: ‘Oreelihiwetxe ddi nyuwo vari va ayana.’ Maria ohikala na Elizabeti othamagela myeri miraru, mumaleliye ohiyelela mmudhi o Nazareti.
Maria ohali vañgono na oteliwa na mulobwana ontxemerhiwa Zuze. Mbwenye Zuze muziweliye wila Maria onfuna akaane mwana, iyene kanoona ninga onofanyeela omutela. Mumalelani mungelo wa Mulugu ohimpanga dhahi: ‘Kuwove omuthukula Maria wila akale mwadhiyo. Vowila ddi Mulugu onvahile mwana.’ Noona Maria na Zuze ahitelana, nanda awene anjedhela obaaliwa wa Yezu.
Lukas 1:26-56; Mateus 1:18-25.