NIPADDUWO 95
Musunzihedho Wa Yezu
SIKU nimodha Yezu ohimpanga mulobwana dhahi wila onofanyeela omukwela mwaddamani waye. Mulobwana oddu ohinvuza Yezu dhahi: ‘Mwaddamani waga bani?’ Indde, Yezu ohiziwa ejile enubuwela mulobwana oddu. Mulobwana oddu onubuwela wila athu a nlogo vina relijiau yaye bahi bali amwaddamani aye. Noona ndoweni noone txini empangile Yezu.
Dila dhiina Yezu onsunzihaga modheela ologa nladdanihedho. Ji ejene ekosiliye ovanene. Iyene ohiloga nladdanihedho mwaha wa Muyuda na Musamaria. Nihimala osunza wila Ayuda kaaziveliwa Asamaria. Dhaene, nladdanihedhona na Yezu thi nthi:
Siku nimodha Muyuda dhahi wela otita va mwangoni mu dila endowa o Jeriko. Mbwenye mambava ahimbuddugela. Awene ahithukula kobiri dhaye nanda ahimbubudda mpaka ohala vañgono na okwa.
Vasogorhova, namakutha wa Muyuda ohivira mu dila yakakene. Iyene wahimoona mulobwana oddule wabubuddiwe. Weyo onoona ninga iyene wakosile eni? Mmamiyo, iyene ololupela mpaddi mwina wa dilaya nanda badhowa. Mumalelani wahivira muthu mwina wa munyarelijiau vaddiddi. Iyene wali Mulevita. Wahimela? Pwadda, iyene nne keemelile wene wila amukamihe mulobwana oddule wabubuddiwe. Weyo podi omoona namakuthaya na Mulevitaya okule bagatita mu dila bagadhowa.
Mbwenye kamoone bani oli apa vamodha na mulobwana oddu obubuddiwe. Iyene Musamaria. Nanda iyene onomukamiha Muyuda. Iyene onowika mirobwe mu dhiloddani dhaye. Mumaleliye, iyene ohimuthukulela Muyudaya wumburoni onawodhiye ovuma vina ovulumuwa.
Mumarihedhiye ologa nladdanihedho naye, Yezu ohimpanga mulobwana oddule wamukosile nivuzo: ‘Mwa alobwana aba araru bani onimooniwevo okosile ninga mwaddamani wa mulobwana oddule wabubuddiwe? Ddi namakutha, Mulevita obe Musamaria?’
Mulobwana oddu ohakula dhahi: ‘Ddi mulobwana wa musamaria. Iyene wahimukosela oderetu mulobwana oddule wabubuddiwe.’
Yezu ohiloga dhahi: ‘Ohiloga deretu. Noona kadhowa wakoselege athu ena yakakene ninga mukoseliye.’
Kunziveliwa mukalelo onsunziha Yezu? Iyo podi osunza dhilobo dha makamaka gwe nigavuruwanaga esile dhinloga Yezu mBibiliani, kayo mwenemo?