NIPADDUWO 96
Yezu Ohavulumutxa Aredda
YEZU bagakosa oleddo waye mwilaboni mpule, iyene ohavulumutxa aredda. Miselu dha matikiniho aba dhinologiwa ozugunuwa mmiruddani vina sidadi dhotene. Noona athu ahimudheelana aragali vina aliba ohoona na aliba ohiwa, vina athu ena enjene ali aredda. Nanda Yezu ohavulumutxa awene otene.
Ovanene okwaranya vyaka tharu dhihivira ovenya mudhidhi wabatiziwe Yezu na Joau. Nanda Yezu ohapanga arumiwi aye wila mohigoneela iyene onela odhowa o Yeruzalemi, wenewo onapiwiye, nanda agamala bavenyihiwa mu okwani. Mudhidhene obo, Yezu wela wavulumutxavi aredda.
Siku nimodha Yezu onosunziha siku na Sabuddu. Sabuddu thi siku na ovuma wa Ayuda. Muyana oddu onimooniwe apa wali muredda vaddiddi. Mwari mwa vyaka 18 iyene weedda baputhamile, nanda kawodha wogowa. Noona Yezu ohimwika mada aye, nanda iyene ohiroma wogowa. Iyene ohivulumuwa!
Eji ehasilidha asogorheli a relijiau. Mmodha mwa awene ohipanga muthithiya na okuwa, ‘Ohikala masiku matanu na nimodha anfanyeelihu olaba, abene ba masiku anfanyeelinyu odha ovulumutxiwa, kayo siku na Sabuddu!’
Mbwenye Yezu ohakula dhahi: ‘Nyuwo athu abure. Muthu muthuvi mwa nyuwo onotapula bulu waye nanda badhowana omwa siku na Sabuddu. Noona muyana oddu wa muyelegi, oddwene oli muredda mwari mwa vyaka 18, kagafanyeeli ovulumutxiwa siku na Sabuddu?’ Yowakula ya Yezu ehavaha manyazo alobwana aba abure.
Vasogorhova Yezu na arumiwi aye ahikosa oleddo wodhowa o Yeruzalemi. Bali wene otakulu wa sidadi ya Jeriko, anamakumbirha eeli aliba ohoona ahiwa wila Yezu onovira wenewale. Noona awene ahikuwa: ‘Yezu, kanikamiheni!’
Yezu ohatxemerha alobwana abale aliba ohoona wila adhe, nanda ohavuza dhahi: ‘Munfuna wila ddukoseleni eni?’ Awene ahiloga dhahi: ‘Nabuya, kafugulani mento ehu.’ Yezu ohiddiginya mento awa, nanda mohigoneela venevale awene ahiwodha woona! Weyo onoziwa sabwa enkosela Yezu matikiniho aba otene ootikiniha? Sabwani iyene onowakwela athuya nanda onfuna wila awene amukaanele nroromelo. Vina iyo podi okaana ebaribari yawila iyene agalamulelaga ninga Mwene kavo muthu velaboni ya vati onakale muredda wili.
Mateus 15:30, 31; Lukas 13:10-17; Mateus 20:29-34.