NIPADDUWO 97
Yezu Onda Ninga Mwene
MUDHIDHI muñgonovi mumaleliye wavulumutxa anamakumbirha abale eeli aliba ohoona, Yezu ohifiya mmuruddani muñgono waddamana na o Yeruzalemi. Iyene ohapanga eeli mwa anamasunza aye: ‘Kadhowani mmuruddani nanda munela onfanya mwana bulu. Mmutapule nanda muddidheelena.’
Buluya mudheeliwanina wa iyene, Yezu ohigilativo. Mumaleliye oheeddana mpaka o Yeruzalemi oddwene oli vakukuvi. Mufiyeliye waddamana sidadiya, muthithi munddimuwa wa athu ohibudduwa wila onfarele. Enjiya mwa awene ahirula malaya awa nanda bathanddika mu dila. Ena ahigwadda makubari a nyagororo. Ahithanddika vina makubari aba mu dila, nanda ahikuwa dhahi: ‘Mulugu amureelihe mwene onda mu nzina na Yehova!’
Walewale mu Izraeli amwene aswa andowa o Yeruzalemi vadhulu va mwana bulu wila avithwanyutxe wa nlogo. Ji ejene enkosa Yezu. Nanda athu aba anolagiha wila awene anofuna wila Yezu akale mwene wawa. Mbwenye kayo athu otene aninfuna iyene. Iyo podi woona eji modheela ejile epadduwile Yezu mwadhoweliye mu mparhani.
Mu mparhani Yezu ohavulumutxa athu aliba ohoona vina oragala. Aima añgono moonelani eji, awene ahimutamaala Yezu na lizu nowiweya. Mbwenye eji ehasilidha anamakutha, nanda awene ahimpanga Yezu dhahi: ‘Onowiwa eso dhinloga aima?’ Yezu ohakula:
‘Indde, ddinowiwa. Kamunengesege mBibiliani apale vanloga wila: “Mulugu onela oburutxa ntamaalo mwano mwa aima añgono?’” Noona aimaya ahidhowavi bagamutamaala mwene wa Mulugu.
Ninfuna nikale ninga aima abale, kayo mwenemo? Txino athu ena anotamela onimaaliha ologa mwaha wa omwene wa Mulugu. Mbwenye iyo ninela odhowa banigaapangavi athu ena mwaha wa dhilobo dhotikiniha dhinfuna Yezu wakosela athu.
Bali velaboni ya vati obule kawali mudhidhiya wa Yezu oroma olamulela ninga mwene. Mudhidhi obu onadhe labo gani? Anamasunza a Yezu anfuna aziwe. Ninela wengesa mwaha wa eji vasogorho.
Mateus 21:1-17; Joau 12:12-16.