NIPADDUWO 104
Yezu Ohiyelela Odhulu
NA OVIRA wa masiku, Yezu ohivilagiha dila dhinjidhene wa anamafara aye. Dila yina othamagela anamasunza 500 ahimoona. Iyene mwaathwanyuweliye awene, weyo onoziwa txini yalogile Yezu na awene? Omwene wa Mulugu. Yehova wahimuruma Yezu velaboni ya vati wila asunzihe mwaha wa Omwene. Nanda iyene wankosavi ejene masiki muvenyihedhiwiye mu okwani.
Weyo onowubuwela omwene wa Mulugu txini? Indde, Omwene thi nlamulelo na txibarene na Mulugu nili odhulu, nanda Yezu ddi Oddule omusakuli Mulugu wila akale mweneya. Ninga musunzelihu, Yezu wahilagiha wila onela okala mwene wotikiniha modheela wajiha aliba dala, wavulumutxa aredda, masiki vina wavenyihedha egumi abale akwile!
Noona Yezu agalamulelaga ninga mwene odhulu mwari mwa vyaka txikwi, velaboni ya vati vanakale dhavi? Indde, elabo yotene ya vati enela osadduliwa ekale paraizu wokoddela. Kamunakale viina koddo, obe opanga, obe maredda, masiki vina okwa. Nihiziwa wila eji ebaribari sabwani Mulugu okoseli elabo ya vati ekale paraizu wila athu ajegevo. Ji sabwa ya ejene yakoseliye mundda wa Edeni omaromo. Nanda Yezu onela okosiha wila ejile enfuna Mulugu omagomelowa ekosiwe.
Ovanene ohifiya mudhidhi wa Yezu wiyelela odhulu. Mwari mwa masiku 40 Yezu wela ovilagiha wa anamasunza aye. Noona awene ahikaana ebaribari yawila iyene ohikalawo wili. Mbwenye ahinathi wathiya anamasunza aye iyene ohapanga dhahi: ‘Mukale mu Yeruzalemi mpaka nyuwo wakela muya wokoddela.’ Muya wokoddela ji guru yoliba ya Mulugu, ninga pevo envudheela, ejene enakamihe anamafara aye okosa efunelo ya Mulugu. Omagomelowa, Yezu ohiloga dhahi: ‘Munofanyeela olaleya mwaha wa miyo mpaka dhipaddi dholapeletxa dha elabo ya vati.’
Mumaleli Yezu ologa ejene, ehipadduwa elobo yowumiha mulomo. Iyene ohiroma owela odhulu, ninga munooneliwe apa. Mumalelani murabo ohimukuneela vamentoni vawa, nanda anamasunzaya kamoonile Yezu viina. Yezu ohidhowa odhulu, nanda ovenyedha wenewale iyene ohiroma walamulela anamafara aye velaboni ya vati.
1 Korinto 15:3-8; Ovuhulela 21:3, 4; Merelo 1:1-11.