NIPADDUWO 42
Bulu Ohiloga
WAHIROMAGA wiwa wila bulu onologa? Txino weyo onologa wila: ‘Nne, dhinama kadhinloga.’ Mbwenye Bibilia onologa mwaha wa bulu walogile. Ndoweni noone mukalelo wapadduwile eji.
Ehali vañgono wila Aizraeli akale oovisasanyedhene wila avolowe mwilaboni ya Kana. Balaki, mwene wa Moabe, onowawova Aizraeli. Noona iyene ohimutxemerhiha odha mulobwana wotxenjerha ontxemerhiwa Balaami wila adhe awuulumele Aizraeli. Balaki ohiroromeliha onvaha Balaami kobiri gwe, noona Balaami ohimuwela bulu waye nanda ohiroma oleddo wa odhowa ogumana na Balaki.
Yehova kanfuna wila Balaami oolumele nlogo Naye. Noona iyene ohimuruma mungelo na supadda nolapa wila eemele mu dila yawila amwimetxe Balaami. Balaami kanimoona mungeloya, mbwenye bulu waye onomoona. Noona buluya onotamelavi omurabela mungelo, nanda omagomelowa ologinanti mu dila bahi. Balaami ohiludduwa vaddiddi, nanda ohimbubudda bulu waye na muri.
Mumaleliye Yehova ohimuthiya Balaami omwiwa bulu waye bagamulogela. Bulu ohinvuza: ‘Ddukoseli eni wila weyo oddibubudde?’
Balaami ohiloga: ‘Weyo ohiddikosiha okala ninga zimorha, kokaana supadda ddigahupa!’
Bulu ohinvuza: ‘Ddahiromaga wukosela weyo elobo ninga ejene?’
Balaami ohakula: ‘Nne.’
Mumaleliye Yehova ohimuthiya Balaami omoona mungelo na supadda beemelile mu dila. Mungeloya ohiloga dhahi: ‘Ombubuddeli eni bulu wawo? Ddidheeli obara dila yawo, sabwani weyo kunfanyeela odhowa omuulumela Izraeli. Bulu wawo kohiddirabela, mudhidhi obuno baddupile, mbwenye s’ohimukosela yabure bulu wawo.’
Balaami ohiloga: ‘Ddihithega. Kaddaziwile wila nyuwo mwahimela mu dila.’ Mungeloya ohimuthiya Balaami odhowa, nanda Balaami ohidhowavi ogumana na Balaki. Iyene onotamelavi omuluumela Izraeli, mbwenye, othiya omuulumela, Yehova ohimukosiha iyene omureeliha Izraeli dila tharu.
Olebeliwa 21:21-35; 22:1-40; 23:1-30; 24:1-25.